Roma 6:13 - Kaili Ledo

¹³ Bo nee rapalamba karomiu movia nadaa. Tapi dekeimo katuvumiu ka Alatala apa kita nikabasakamo lako ri kamatea bo nitarimatamo katuvu nabaru. Dekeimo katuvumiu ka Alatala ala karomiu rapake movia anu nanoa.

Roma 6:13 ပူးပေါင်းရင်းမြစ်များ

Lukas 15:24

sabana anaku hitu, mamala raulita namatemo, tapi siipa natuvu mpanjilimo. Ia nalipomo, tapi siipa nikava mpanjilimo.’ Jadi nipoviara posusa, bo nadamba-damba.

Lukas 15:32

Tapi kita masipato mosusa madamba sabana tueimu namate, natuvu mpanjili. Ia nalipomo tapi sii-sii nikavata mpanjili.’ ”

Yohanes 5:24

Pariaramo tesaKu, isema-sema nangepe tesaKu bo nomparasaya Alatala anu nantudu Yaku, ia manggava katuvua nabelo sampe ri kasae-saena. Ia ledo mambela pehuku bo ledo rapopogaa lako nte Alatala tapi nariamo katuvua nabaru nte ia.

Roma 1:29

Mpengaya-ngaya pekiri nadaa bo natenggo rarara. Ledo naosa rarara ante anu naria nte ira, navau rarara, nasiriati, nepatesi, nebagiu, bo nosinggarau. Ira nomboli rau rara, nantunturaka tona

Roma 12:1

Sampesuvu-sampesuvu, Alatala mpuu-mpuu nabelo nte kita! Sabana haitu, kuperapi ante mpuu-mpuu, dekeimo karomiu ka Alatala mpo pesomba natuvu, anu nipatani ka Alatala, anu mompakadamba raraNa. Haitumo ada pesombamiu nakana.

Roma 6:11

Ivesia muni kita, kita kana rareketa namatemo nosanggani-nggani nte i Kristus bo nikabasakamo lako ri kuasa nu dosa. Jadi sii-sii kita kana matuvu bo mompakadamba rara nu Alatala, sabana kita nosangu rara ante i Yesus Kristus.

Roma 6:16

Nisanimiu mboto ane kita matundu nte tona bo mangoseaka parentana, kita majadi batuana. Ivesia muni ante dosa. Ane kita batena mangoseaka dota rarata anu nadaa, kita majadi batua nu dosa bo kaupuna kita mamate bo rapopogaa lako nte Alatala. Tapi ane kita matundu nte Alatala, kita majadi batuaNa bo kita rapakanoa ri panggitaNa.

Roma 6:19

Yaku nompake porapa batua ala ledo makaja rapahamiu pepatudukiku, apa kita manusia da nakura pompahata. Bara ipia komiu nipobatua nu dosa sabana komiu nompalamba karomiu nangoseaka dota raramiu nadaa sampe pokainggumiu nantambai kadaana. Jadi hitupa, dekeimo katuvumiu ka Alatala ala komiu majadi batuaNa anu nanoa bo mpuu-mpuu majadi todeaNa.

Roma 7:23

Tapi ledo nioseakaku atura nu Alatala sabana naria kuasa ntanina nombadagi yaku. Riara ntaiku, yaku madota mangoseaka atura nu Alatala, tapi kuasa nu dosa riara nggatuvuku nosibali ante pekiri riara ntaiku, sampe yaku nipobatua kuasa nu dosa haitu.

Roma 7:5

Bara ipia, dopame kita nomparasaya i Yesus, kita natuvu nangoseaka dota rarata anu nadaa. Anu nitagi nu Atura agama, aga haitumo nipodotata rapovia. Jadi, nipaketa karota novia dosa sampe kita masipato rahuku mate bo rapopogaa lako nte Alatala.

1 Korintus 6:15

Ledo nisanimiu karota nasimbayu ante sipa nu karo i Kristus? Jadi ledo ntoto masipato kita mompake karota, anu nasimbayu ante sipa nu karo i Kristus, bo mompogau bajinga.

1 Korintus 6:20

Komiu nitolosi nu Alatala bo nibayariNa pakaupumo. Haitumo sabana komiu masipato matuvu ante pokainggu nabelo ala Alatala rabila.

1 Korintus 6:9

Jadi, ledo nisanimiu tona ledo nangoseaka dota nu Alatala ledo ntoto manggava bagia riara Poparenta nu Alatala? Nee sampe komiu rabagiu! Tona nokainggu nabuga, tona nompakande tupu-tupu ntanina, tona nobualo, bo tona nompogau simbo langgai atau simbo mombine, ira pura-pura ledo ntoto manggava bagia riara Poparenta nu Alatala.

2 Korintus 10:4

Kami ledo nangeva ante pompakule nu manusia biasa. Tapi kami nangeva ante pompakule nidekei nu Alatala. Pompakule haitu nabaraka, jadi kami nompakule nombadagi nuapa-nuapa nangeva pepatuduki nakana. Kami namala nirapaka tantara anu nompakaropu kuasa nu balira nau bara berimba karosona.

2 Korintus 5:14

Tove i Kristus nombakuasai kami sampe kami nokainggu ivesia. Apa niparasaya kami, saito tona namate nanjambei kita pura-pura, jadi nasimbayu mpo kita pura-pura namate.

2 Korintus 5:15

Bo i Kristus mpuu-mpuu namate nanjambei kita pura-pura. Patuju nu kamateNa haitu ala kita anu da natuvu ri dunia hitu domo matuvu mangoseaka dotata mboto, tapi dota i Kristus anu namate bo natuvu mpanjili ala manggeni belo ka kita.

2 Korintus 8:5

Anu nidekeira nelabi mpuu lako ri anu nisarumaka kami. Ledo aga doi nidekeira. Tapi nidekeira ntani ruru katuvura ka i Pue. Ira natundu nte Ia bo natundu muni nte kami, sabana haitumo dota nu Alatala.

Efesus 2:5

Tempo kita da nireke namate sabana ledo natundu nte Ia, Ia nompakatuvu mpanjili kita nosanggani-nggani ante i Kristus. Toramo! Komiu nipakasalama sabana kabelo rara nu Alatala!

Efesus 5:14

Bo pura-pura anu rapakalanto ivesia, mabali majadi mareme. Haitumo batuana tesa niuli ivei: “Pembangumo komiu anu namonjo. Pembangumo lako ri tatanga ntomate, Bo reme i Kristus mombavanta komiu.”

Filipi 1:20

Yaku mpuu-mpuu nanjarumaka yaku ledo rapakaeya nokarajaa nompatolele Kareba i Kristus. Nisarumakaku yaku bate-batena mabia mosabi, nemopa sii-sii, ala nau mamate atau matuvu yaku, rakita ntona kaoge i Kristus riara nggatuvuku.

Kolose 2:13

Bara ipia dopame komiu nomparasaya i Kristus, komiu nireke namate sabana komiu nadosa bo ledo nangoseaka atura-atura nu Alatala. Tapi sii-sii, Alatala nompakatuvu komiu nosanggani-nggani nte i Kristus, bo pura-pura dosamiu niampungiNamo.

Kolose 3:5

Sabana haitu, kabasakamo pokainggu-pokainggu anu nopuna lako ri dunia nadaa hitu. Nee mosipogau ante tona ledo bereimiu mboto, nee movia pokainggu anu ledo masipato, nee mangoseaka dota raramiu nabuga bo dota-dota ntanina anu nadaa. Bo nee muni maoge rara manggava melabipa pade tona ntanina, sabana anu nipooge rarata haitumo najadi anu nisombata, bo haitu nasimbayu nte metupu nte tupu ntanina.

2 Tesalonika 2:12

Kaupuna pura-pura tona anu ledo nomparasaya pepatuduki nakana bo aga nadamba novia anu nadaa rahuku nu Alatala.

2 Timotius 2:15

Tapi iko kana mompasimbuku mpuu-mpuu mokarajaa mabelo ala madamba rara nu Alatala bo rarekeNa iko masipato mokarajaa ka Ia. Pasimbukumo ala ledo maeya matamu manggita pokarajaamu tapi mupatuduki tesa nakana lako nte Alatala ante kakana-kanana.

Yakobus 4:1

Nakuya sampe komiu nosinjanai bo nosinggarau? Posinjanai bo posinggarau neumba lako ri dota raramiu anu nadaa. Dota rara nadaa haitu nosieva riara ntaimiu sampe nanggeni komiu novia nadaa.

1 Petrus 2:24

I Yesus mbotomo nanjimbuaka dosa-dosata tempo Ia nipaku ri kayu salib, ala kita rakabasaka lako ri kuasa nu dosa bo matuvu mangoseaka dota nu Alatala. Bo kita nipakabelomo lako ri baka-baka i Kristus.

1 Petrus 4:2

Jadi da natuvu riara dunia hitu, komiu kana matuvu mangoseaka dota nu Alatala, nee mangoseaka dota rara manusia anu nadaa.

1 Yohanes 1:9

Tapi ane kita mombanoa dosa-dosata ri ngayo nu Alatala, raampungiNa dosata bo rapakagasaNa rarata lako ri pura-pura anu nadaa. Apa ivesia nijanjiNa ka kita bo Ia namala rasarumaka mompakadupa pojanjiNa, bo movia anu nanoa.