Roma 5:2 - Kaili Ledo

² Kita nomparasaya i Yesus, jadi nidekeiNa ka kita loga mombarasai kabelo rara nu Alatala bo sii-sii nirasaitamo riara nggatuvuta. Nadamba mpuu rarata sabana naroso panjarumakata rakavata bagia ri kaoge nu Alatala.

Roma 5:2 ပူးပေါင်းရင်းမြစ်များ

Matius 25:21

Nanguli madika, ‘Nabelomo! Komiu batua nabelo, natutu nantui bago anu niparasayaka komiu. Komiu namala niparasaya ante mbara-mbara sakide. Sabana haitu, mbara-mbara nadea kuparasayaka komiu. Kamaimo madamba mosanggani ante yaku.’

Yohanes 10:7

Sabana haitu, nanguli vaimo i Yesus ka ira, “Pariaramo tesaKu hitu! Yakumo hii bobaa rapesua nu bimba hau riara gimpu.

Yohanes 10:9

Yakumo hii bobaa. Isema-sema mesua modala nte Yaku rapakasalama. Ia mamala mesua bo mesuvu manggava kandea.

Yohanes 14:6

Nesana i Yesus, “Yakumo hii dala, Yakumo nompopaisani anu nakana bo Yakumo nombadekei katuvua nabelo. Ledo ria saitoa mamala makava ri ngayo nTuamaKu ane ledo ante Yaku.

Yohanes 5:24

Pariaramo tesaKu, isema-sema nangepe tesaKu bo nomparasaya Alatala anu nantudu Yaku, ia manggava katuvua nabelo sampe ri kasae-saena. Ia ledo mambela pehuku bo ledo rapopogaa lako nte Alatala tapi nariamo katuvua nabaru nte ia.

Suro-Suro 14:27

Tempo nakava ri ngata Antiokhia, nipasiromura topomparasaya i Yesus bo nitesakara pura-pura anu nipovia nu Alatala ri polipara. Nitesara muni Alatala nombadekei loga ka tona ledo toYahudi momparasaya i Yesus.

Roma 11:20

Haitu nakana mami, tapi toramo, ira nipoara sabana ira ledo nomparasaya, bo komiu nitarima sabana komiu nomparasaya. Jadi nee malanga raramiu, agina komiu maeka!

Roma 12:12

Kana madamba raramiu sabana komiu nanjarumaka anu rapovia nTupu ka komiu. Kana mosabara tempo masusa. Nee masau raramiu mosambaya.

Roma 14:4

Roata haitu batua nu Alatala, ledo batuata. Ledo masipato kita manjalai batua ntona ntanina. Bara makana bara masala batua haitu, haitu urusa nu tuana mboto, ledo urusata. Bo tona nangande mpengaya-ngaya kandea haitu tantu rareke nakana sabana Tupu nakuasa nombatulungi ia novia anu nakana.

Roma 15:13

Alatala mpuu-mpuu puna panjarumakata! Kuperapi Ia mompakadamba mpuu raramiu bo mombadekei ka komiu katuvua mabelo sabana komiu nomparasaya Ia. Kuperapi panjarumakamiu nte Ia mantambai maroso ante kuasa lako ri Nosa GasaNa.

Roma 2:7

Sanu tona ledo nasau rarara nokainggu nabelo sabana ira madota ratoiya bo rabila nu Alatala, bo madota manggava katuvu nabelo anu ledo maupu-upu. Bo Alatala mombadekei katuvu nabelo sampe ri kasae-saena ka tona gahaitu.

Roma 3:23

Pura-pura manusia nadosa bo ledo masipato manggava bagia ri kaoge nu Alatala.

Roma 5:5

Ane kita manjarumaka Alatala, ledo masoa bukuta. Nisanita Ia mpuu-mpuu mompakadupa pura-pura pojanjiNa, sabana nirasaita tove nu Alatala riara ntaita lako ri pokarajaa nu Nosa Gasa anu nidekei nu Alatala ka kita.

Roma 8:1

Jadi sii-sii domo ria pehuku rapambela ka tona nosangu rara ante i Yesus Kristus.

Roma 8:24

Sii-sii kita nikabasakamo lako ri pehuku nu dosata sabana kita nanjarumaka Alatala. Kita nanjarumaka Ia mombadekei ka kita pura-pura anu nijanjiNa ka kita. Bo ane raulita kita nanjarumaka, batuana dopa nitarima anu nisarumakata. Apa ledo ria tona manjarumaka anu nariamo nte ia.

1 Korintus 15:1

Kapolana sampesuvu-sampesuvu. Yaku madota mompopatora ka komiu Kareba Belo anu nipatoleleku ka komiu. Nitarimamiumo Kareba haitu bo naroso pomparasayamiu i Kristus sampe sii-sii.

2 Korintus 3:18

Sii-sii lenjeta ledo nisalibumbu mpo lenje i Musa nggaulu, apa kita nompopakita kaoge i Pue Yesus riara nggatuvuta. Bo kaoge haitu nakava lako nte Tupu, haitumo Nosa Gasa anu natuvu riara ntaita. Nosa Gasa sakide-sakide nombabaliki kita majadi nasimbayu mpo i Pue Yesus, ala sakide-sakide mantambaipa kaogeNa rakita riara nggatuvuta.

2 Korintus 4:17

Kasusa nirasai kami ri dunia hitu nangaa bo aga sampalai. Bo kami mantarima belo sampe ri kasae-saena sabana nitidamaka kami riara kasusa haitu. Kasusa nirasai kami sii-sii aga sakide kodi ane rapoposisala ante belo ratarimata bara maipia.

Efesus 2:18

Jadi, kita pura-pura, toYahudi bo tona ledo toYahudi, namala mosinggava nte Tuamata Alatala riara posambayata sabana anu nipovia i Kristus. Kita mamala mosinggava nte Ia ante petulungi Nosa GasaNa sangu.

Efesus 3:12

Kita nomparasaya i Kristus bo kita nosangu rara ante Ia, jadi domo makaja rarata mosinggava nte Alatala riara posambayata, bo nisanita ratarimaNa.

Efesus 6:13

Sabana haitu, pakemo pura-pura pareva posieva nidekei nu Alatala ala rapakulemiu mombatidamaka peeva nu balimiu ri tempo posieva ntamo, sampe komiu da bate-batena meangga maroso maupu posieva haitu.

2 Tesalonika 2:16

Alatala nompotove kita, bo lako ri kabelo nu raraNa, Ia ledo naupu-upu nompakavoe rarata, bo nidekeiNa ka kita panjarumaka nabelo. Jadi kuperapi Tuputa Yesus Kristus bo Tuamata Alatala mompakavoe bo mompakaroso raramiu ala tesamiu bo pokainggumiu batena nabelo.

Ibrani 3:6

Tapi i Kristus ledo aga potudua, Ia Ana nu Alatala mami anu natutu nompasiayu pura-pura todea nTuamaNa. Bo kitamo nireke todea nu Alatala asaa kita naroo nomparasaya bo ledo nolengga-lengga nanjarumaka i Yesus ante damba rara sampe ri kaupuna.

Ibrani 6:18

Pojanji bo posumpaNa haitu ledo mabali. Alatala ledo ntoto nodava. PatujuNa nojanji ivesia ala kita anu nekisaliku nte Ia maroso rarata sampe kita maroo manjarumaka anu nijanjiNa haitu.

1 Petrus 3:18

Apa i Kristus muni nombarasai kasusa nau ledo novia anu nadaa. Ia aga sanggani namate nombasompo dosa manusia nagana sampe ri kasae-saena. Ia ledo nasala, tapi Ia namate nanjambei kita anu nasala, ala mompoposinggabelo kita ante Alatala. Ia nipatesi tapi nipakatuvu mpanjili ante kuasa Nosa Gasa nu Alatala.

Pompakita 21:11

Ngata haitu nareme mpuu ante kareme nu Alatala mboto. Karemena damo nenggila mpo mata sinji nasuli alina, mpo vatu yaspis anu nevayo mpo kaca.

Pompakita 21:23

Bo ngata haitu ledo paraluu reme nu eo bara reme nu bula, sabana reme lako nte Alatala nompakaremena, bo Ana Bimba najadi poindona.

Pompakita 21:3

Bo niepeku suara namangga lako ri Gadera Kamagaua nu Alatala haitu nanguli, “Pariaramo! Sii-sii ponturo nu Alatala nosanggani-nggani ante manusia. Ia monturo ri tatangara bo ira majadi todeaNa. Bo Ia mboto mosanggani-nggani ante ira bo majadi Alatala rasombara.

Pompakita 3:21

Isema-sema padagi, ia Kupaloga monturo moparenta mosanggani nte Yaku ri Gadera KamagauaKu, nasimbayu mpo Yaku muni najadi padagi bo sii-sii nonturo bo noparenta nosanggani-nggani nte TuamaKu ri GaderaNa.