Roma 2:29 - Kaili Ledo

²⁹ Tapi toYahudi anu mpuu-mpuu todea nu Alatala, haitumo tona mpuu-mpuu rarana nangoseaka Alatala. Bo tona mpuu-mpuu nisuna, nisuna riara ntaira. Batuana, ira najadi todea nu Alatala sabana pokarajaa Nosa Gasa nu Alatala riara ntaira, ledo sabana pangoseakara atura-atura nitulisi. Tona ivehaitu ratoiya nu Alatala, nau ledo nitoiya nu manusia.

Roma 2:29 ပူးပေါင်းရင်းမြစ်များ

Lukas 11:39

Haitu sampe i Yesus nanguli ka ia, “Komiu toFarisi nangoseaka ada-ada agama anu nikita ntona, tapi raramiu nadaa bo nainoka mbara-mbara ntona ntanina. Komiu nasimbayu mpo tona notoposi boda bo suraya ri savalikuna tapi riarana bate-batena natagara!

Lukas 17:21

Ledo maria tona manguli, ‘Peintamo, siimo Poparenta nu Alatala,’ atau ‘Peintamo, hamaimo Poparenta nu Alatala!’ Sabana Poparenta nu Alatala naria riara ntai ntona.”

Yohanes 12:43

Ira nomparasaya nggalino sabana nipokonorapa ratoiya nu manusia pade ratoiya nu Alatala.

Yohanes 4:23

Tapi makava tempona bara maipia, bo kakanana tempo haitu nariamo, tona anu mpuu-mpuu mombasomba Tuamata Alatala kana mombasomba Ia ante petulungi nu Nosa GasaNa nangoseaka pepatuduki nakana. Pesomba ivehaitu nipokono nu Alatala.

Yohanes 5:44

Berimbamo komiu mamala momparasaya Yaku? Apa komiu aga madota rabila nu roa. Ledo nipasimbukumiu manggava pebila nu Alatala Saito-itoNa!

Roma 14:17

Apa anu nopoko riara Poparenta nu Alatala, ledo anu nikandeta atau niinuta. Anu nopoko, kita manoa rarata, bo matuvu mosinggabelo ante roata, bo madamba rarata sabana Nosa Gasa nu Alatala naria riara ntaita.

Roma 2:27

Ane ivesia, pokainggu ntona ledo toYahudi nompopakita kasala ntoYahudi. Sabana, kita toYahudi naria Atura agama nitulisi, bo kita muni nisuna tandana kita todea nu Alatala, tano mai kita ledo nangoseaka parentaNa. Ira ledo nisuna tapi iramo anu nangoseaka parenta-parenta riara Atura agama.

Roma 3:1

ToYahudi bo tona ledo toYahudi nasimbayu, pura-pura nasala ri panggita nu Alatala. Jadi, ane ivesia, nuapa pelabina toYahudi? Nuapa gunana mangoseaka ada posuna?

Roma 7:6

Tapi sii-sii, kita nikabasakamo lako ri kuasa Atura agama anu nompou kita bara ipia, sabana kita namate nosanggani-nggani ante i Kristus. Jadi kita domo nangoseaka dala nokolu, haitumo kita domo nangoseaka atura-atura nitulisi. Sii-sii kita nangoseaka dala nabaru, haitumo kita nangoseaka dota nu Alatala ante petulungi Nosa Gasa.

1 Korintus 4:5

Jadi nee komiu masalisa mompakatantu sala ntona ane dopa nakava tempona. Popea sampe i Pue Yesus makava mpanjili ri dunia. Iamo mompakalanto pura-pura anu nitabuniaka ri kalandana sii-sii. Iamo mompakalanto mpengaya-ngaya patuju nitabuniaka riara ntai manusia. Ri tempo haitu, Alatala mombatoiya isema-sema masipato ratoiyaNa.

1 Korintus 7:19

Apa ledo ria gunana ane kita mangoseaka ada posuna bo ledo muni naria gunana ane kita ledo mangoseaka ada haitu. Anu noguna ntoto, haitumo, mangoseaka parenta-parenta nu Alatala.

2 Korintus 10:18

Sabana, tona nipokono nu Alatala ledo topantoiya karona mboto tapi tona nitoiya nu Alatala.

2 Korintus 3:6

Iamo nombadekei ka kami pompakule nompatuduki pojanjiNa nabaru ka tona. Pojanji nabaru haitu ledo atura-atura nitulisi, tapi nopuna lako ri Nosa Gasa nu Alatala. Atura-atura anu nitulisi nanggeni kamatea sabana ledo nipakule manusia mangoseakana, tapi Nosa Gasa nu Alatala nombadekei katuvua nabelo sampe ri kasae-saena.

Filipi 3:3

Kakanana, kitamo anu nanoa ri panggita nu Alatala, ledo ira, apa kita nombasomba Alatala ante pekeniaka Nosa GasaNa. Kita nadamba sabana kita nosangu rara nte i Yesus Kristus, bo ledo nisarumakata pompasimbukuta mboto atau tonuapa kita, ala majadi manoa ri panggita nu Alatala.

1 Tesalonika 2:4

Kami ledo notesa aga mompakadamba rara manusia. Kami notesa mompakadamba rara nu Alatala, sabana Iamo nomparesa rara ntai kami, bo Iamo nombareke kami masipato mompatolele Kareba Belo.

1 Petrus 3:4

Tapi kagayamiu kana mopuna lako riara ntaimiu, haitumo lako ri inggumiu nalusu bo natinonto. Haitumo kagayana anu ledo ntoto malipo bo noali mpuu ri panggita nu Alatala.