Roma 14:14 - Kaili Ledo

¹⁴ Yaku nosangu rara ante i Pue Yesus, jadi nisaniku mpuu ledo ria kandea nuapa-nuapa nipopali ri panggita nu Alatala. Tapi ane maria tona nomparasaya sangaya kandea nipopali, ia mpuu-mpuu masala ane rakandena.

Roma 14:14 ပူးပေါင်းရင်းမြစ်များ

Markus 7:2

Nikitara bara sako-ndua anaguru i Yesus nangande mpale, bo palera nireke naruto apa ledo nemanjo nantuntuni ada ntoFarisi.

Suro-Suro 10:28

bo niulikana ira, “Sampesuvu-sampesuvu, nisanimiu mboto, nantuntuni Atura agama Yahudi, kami toYahudi nitagi mosimporoa atau mompanjayo tona ledo toYahudi. Tapi Alatala nompakalanto ka yaku riara anu nipopakitaNa ka yaku, ledo mamala kuuli sanu manusia naruto atau ledo mamala kuporoa, sabana Alatala nantarima pura-pura manusia.

Roma 14:2

Rapana, naria tona nomparasaya ia namala mangande mpengaya-ngaya kandea. Tapi tona ntanina anu dopa naroso pomparasayana, nanguli ledo nipokono nu Alatala kita mangande bau, aga uta-uta mamala rakandeta.

Roma 14:20

Nee rapakagerota anu nabelo nipovia nu Alatala riara nggatuvu roata, sabana nikandeta anu nireke nu roa nipopali. Kakanana pura-pura kandea namala rakande, ledo ria nipopali. Tapi kita nasala ane anu nikandeta mompakeni roata manavu riara dosa.

Roma 14:23

Tapi ane nonggai rarata nangande, nasala kita ane rakandeta kandea haitu, apa ledo nioseakata anu niparasayata. Bo nuapa-nuapa nipoviata anu ledo nangoseaka pomparasayata, pokainggu haitu dosa.

1 Korintus 10:25

Komiu mamala mangande mpengaya-ngaya bau nipobalu ri potomu. Ledo paraluu rapekutanamiu bau haitu bara nipesomba ka tupu-tupu ntanina. Ledo paraluu monggai-nggai raramiu nompekirika bara nasala mangande bara ledo.

1 Korintus 8:10

Patujuku ivei: Nisanimiu ledo nakuya mangande kandea haitu. Tapi rapana, komiu hau mangande ri banua pesomba ka viata, bo rakita ntona anu dopa naroso pomparasayana. Natantumo ia muni mabia mangande kandea nipesomba ka viata atau tupu-tupu ntanina haitu.

1 Korintus 8:7

Tapi naupa ivesia, ledo pura-pura topomparasaya nangisani anu haitu. Dopame ira nomparasaya i Kristus, sanu topomparasaya nabiasa nompakande tupu-tupu ntanina. Jadi sampe sii-sii ane rakandera kandea anu nipakande ka tupu-tupu ntanina, kandea haitu nirekera mpuu-mpuu kandea nu tupu-tupu haitu. Ane mangande kandea haitu, nirasaira nadosa, apa dopa naroso pomparasayara.

1 Timotius 4:4

Apa pura-pura nipajadi nu Alatala nabelo. Ledo ria nuapa-nuapa nipopali ane rakandeta ante manguli tarima kasi nte Alatala.

Titus 1:15

Ane tona nagasa rarana, pura-pura poviana nagasa. Tapi ane tona nadaa pekirina bo ledo nomparasaya Alatala, ledo ria poviana nuapa-nuapa nagasa, sabana pekiri bo rara ntaira nadaa mami.