Roma 12:2 - Kaili Ledo

² Domo rapasialamiu kabiasa ntona ledo nosisani nte Alatala. Dekeimo Alatala mompakabaru pekirimiu ala inggumiu mabali. Ane ivesia, rasanimiu mpuu-mpuu dota nu Alatala, haitumo, rasanimiu anu nabelo, anu nipokono nu Alatala, bo anu ledo nasala ri panggitaNa.

Roma 12:2 ပူးပေါင်းရင်းမြစ်များ

Matius 13:22

Savua nanavu ranggarui nirapaka tona nangepe Tesa nu Alatala bo niparasayara. Tapi ira aga nasesa nompekirika katuvura mboto riara dunia hitu, bo ira aga naino ka doi. Haitu pura-pura nangupi Tesa nu Alatala sampe ledo ria aselena riara nggatuvura.

Markus 4:19

tapi nabago gaga rarana nompekirika katuvura mboto. Ira aga naino ka doi bo nadidi ka mbara-mbara mpengaya-ngaya ri dunia. Haitu pura-pura nangupi Tesa nu Alatala sampe ledo ria aselena riara nggatuvura.

Yohanes 14:30

Domo madea tesa Kuuli ka komiu, sabana gantanamo Magau nu Seta makava. Ia nombakuasai tona nadaa ri dunia hitu tapi ia ledo nakuasa momparenta Yaku.

Yohanes 15:19

Ane rapana komiu nosangu pekiri ante tona ledo nomparasaya Yaku, natantumo rapotovera komiu sabana komiu roara mboto. Tapi komiu ledo nosangu pekiri ante ira, sabana Yaku nompelisi komiu bo nopatani komiu ka Yaku. Jadi haitu sampe komiu nipovuu matara.

Yohanes 17:14

NipasimbayuKu ka iramo tesaMiu sampe tona riara dunia hitu navuu matara nanggita anaguruKu. Sabana, anaguruKu haitu ledo nosangu pekiri ante ira, nasimbayu mpo Yaku muni ledo nosangu pekiri ante tona haitu.

Yohanes 7:7

apa ledo ria tona navuu matana nte komiu. Tapi Yaku nipovuu mata ntona nadaa ri dunia hitu sabana Yaku nantuenaka pokainggura nadaa.

Roma 12:1

Sampesuvu-sampesuvu, Alatala mpuu-mpuu nabelo nte kita! Sabana haitu, kuperapi ante mpuu-mpuu, dekeimo karomiu ka Alatala mpo pesomba natuvu, anu nipatani ka Alatala, anu mompakadamba raraNa. Haitumo ada pesombamiu nakana.

Roma 13:14

Tapi kita kana mompasiala pokainggu i Pue Yesus Kristus. Haitumo pareva posieva rapasuata. Bo nee rapaloga karomiu mangoseaka dota raramiu nadaa.

Roma 7:12

Jadi, Atura agama nagasa bo parenta-parenta nu Alatala nagasa, nanoa bo nabelo.

Roma 7:14

Sampesuvu-sampesuvu, nisanita Atura agama mpuu-mpuu nabelo sabana Atura haitu lako nte Nosa Gasa nu Alatala. Tapi yaku hii aga manusia nalente, yaku nipobatua nu dosa.

Roma 7:22

Pekiri riara ntaiku, nipokonoku atura nu Alatala.

1 Korintus 3:19

Apa anu nireke napande ri panggita nu manusia nadoyo ri panggita nu Alatala. Evamo nitulisi riara Buku Gasa ivei: “Alatala nompakanavu tona natau ante akalara mboto.” Ayub 5:13

2 Korintus 4:4

Ira ledo nomparasaya sabana Magau nu Seta anu nombakuasai dunia hitu nompakaburo pekirira ala ledo rakitara reme nu Kareba Belo. Kareba Belo haitu nompakalanto kaoge i Kristus anu nasimbayu ntoto ante Alatala.

2 Korintus 5:17

Ane tona nosangu rara ante i Kristus, ia najadi manusia nabaru. Katuvuna nggaulu naliumo bo katuvuna nabaru mpuu-mpuu nariamo.

Galatia 1:4

I Yesus nombadekei karoNa rapatesi mombasompo dosata nangoseaka dota nTuamata Alatala. PatujuNa ala Ia mamala mombakabasaka kita lako ri kuasa nu dunia nadaa.

Efesus 1:18

Kuperapi ala Ia mompakareme pekirimiu ala mpuu-mpuu rasanimiu kabelo anu nisarumakata lako nte Alatala anu nompokio kita majadi todeaNa. Kuperapi ala rasanimiu kabelo bo kaoge nu belo nipakasadia nu Alatala radekei ka todeaNa bara maipia.

Efesus 2:2

Komiu natuvu nangoseaka kabiasa-kabiasa nu manusia ri dunia hitu, haitumo komiu nangoseaka dota nu Magau Seta, pakeni nu kuasa-kuasa nadaa ri laerava. Iamo nombakuasai rara ntai ntona anu ledo natundu nte Alatala.

Efesus 5:17

Jadi nee madoyo, tapi pasimbukumo mangisani bo movia anu nipodota i Pue rapoviamiu.

Kolose 1:9

Jadi nompamula lako ri tempo niepe kami karebamiu, kami nasaro nosambaya ka komiu. Kami nerapi nte Alatala ala Nosa GasaNa mombadekei noto bo pangisani ka komiu ala rasanimiu pura-pura dota nu Alatala ka komiu.

Kolose 3:10

bo nitarimatamo katuvu nabaru. Kita nipajadi nu Alatala manusia nabaru bo Ia bate-batena nombabaliki ingguta majadi masimbayu nte ingguNa mboto. PatujuNa ala kita mpuu-mpuu mosisani belo ante Ia.

Kolose 4:12

Bo tabe muni lako nte i Epafras, batua i Yesus Kristus lako ri ngatamiu mboto. Ia bate-batena nekakai nte Alatala ante mpuu-mpuu rarana ala ledo molengga-lengga pomparasayamiu, bo ala komiu majadi topomparasaya anu ledo makura nuapa-nuapa ri panggita nu Alatala, bo ala komiu maroo mangoseaka pura-pura dota nu Alatala.

1 Tesalonika 4:3

Dota nu Alatala ala komiu majadi todeaNa nagasa, bo nee mosampaturu ante tona ledo bereimu mboto.

Titus 3:5

Kita nipakasalamaNa, ledo sabana pokaingguta nanoa, tapi sabana kaasi mataNa nanggita kita. Alatala nompakasalama kita ante nompakagasa kita bo nombalelaka dosata. Haitu nipoviaNa ante kuasa Nosa Gasa anu nombadekei katuvu nabaru ka kita bo nombabaliki rarata majadi nabelo.

Yakobus 1:27

Tapi poagama nakana, anu ledo rasalai nTuamata Alatala, haitumo nantulungi ngana-ngana pailu bo timbala-timbala nasusa, bo nombajagai karo mboto ala ledo mangoseaka pokainggu nadaa nipovia ntona anu ledo nosisani nte Alatala.

Yakobus 4:4

Komiu nasimbayu mpo topobualo apa komiu ledo natutu nangoseaka Alatala. Ledo nisanimiu? Ane rapoinota anu nipodota ntona nadaa ri dunia hitu, kita majadi bali nu Alatala. Isema-sema mompoino anu nipoino ntona nadaa ri dunia hitu, ia nompajadi karona mboto bali nu Alatala.

1 Petrus 1:14

Komiu kana matuvu mpo ana-ana nu Alatala anu natundu nte Ia. Nee mangoseaka dota raramiu nadaa anu nombakuasai komiu tempo komiu da natuvu ri kalandana.

1 Petrus 1:18

Pekoumo nte Alatala sabana nisanimiu mbotomo sompo nibayariNa mombakabasaka komiu lako ri katuvumiu nggaulu. Katuvumiu ledo ria gunana haitu, nipasialamiu lako nte ntotua nggaulu. Tapi Alatala nombakabasaka komiu lako ri katuvumiu nokolu haitu. Sompo ledo nibayariNa ante mbara-mbara anu ledo nainti evamo bulava atau salaka

1 Petrus 2:3

Komiu kana maino ka Tesa nu Alatala, apa nirasaimiu mamimo kabelo rara i Pue.

1 Petrus 4:2

Jadi da natuvu riara dunia hitu, komiu kana matuvu mangoseaka dota nu Alatala, nee mangoseaka dota rara manusia anu nadaa.

2 Petrus 1:4

Ivesia muni Alatala nombadekei ka kita pedekei-pedekei nijanjiNa, anu nabelo mpuu bo nelabi noguna. Ane rapaketa pedekei-pedekei haitu, domo raoseakata dota rarata nadaa ri dunia hitu anu nompakagero katuvu manusia, bo rapakuleta mompasiala inggu nu Alatala mboto.

2 Petrus 2:20

Mandasa mpuumo ira! Apa bara ipia ira mpuu-mpuu nosisani nte Tuputa Yesus, Topompakasalama kita, sampe ira nikabasakamo lako ri pokainggu nadaa anu nompakagero manusia ri dunia hitu. Tapi naupu sia, ira nipemala bo nikuasai nu pokainggu-pokainggu nadaa haitu mpanjili. Kaupuna, nelabipa kandasa katuvura pade ri pamulana.

1 Yohanes 3:13

Jadi sampesuvu-sampesuvuku, nee mokumaa ane tona ledo nomparasaya i Yesus navuu matara nanggita komiu.

1 Yohanes 5:19

Nisanita kita najadi ana-ana nu Alatala, bo nisanita tona ledo nomparasaya i Yesus nikuasai Magau nu Seta.

Pompakita 12:9

Jadi ule naga haitu nipopalai lako ri suruga bo nitedaka hau ri dunia nosanggani-nggani ante malaeka-malaeka anu nantulungi ia. Ia haitumo Ule Ntua anu nosanga Topangadu atau Magau nu Seta, anu nombabagiu manusia ri njumangu dunia.

Pompakita 13:8

Pura-pura manusia nonturo ri dunia mombasomba binata haitu, haitumo pura-pura tona anu ledo nitulisi sangara riara Buku Katuvua dopame dunia nipajadi. Buku haitu naria nte Ana Bimba anu nipatesi.