Roma 12:1 - Kaili Ledo1 Sampesuvu-sampesuvu, Alatala mpuu-mpuu nabelo nte kita! Sabana haitu, kuperapi ante mpuu-mpuu, dekeimo karomiu ka Alatala mpo pesomba natuvu, anu nipatani ka Alatala, anu mompakadamba raraNa. Haitumo ada pesombamiu nakana. အခန်းကိုကြည့်ပါ။ |
Ia nanganggataka yaku nokarajaa ka i Yesus Kristus nanggeni karebaNa ka tona ledo toYahudi. Bo pokarajaaku haitu namala rarapaka pokarajaa ntopanggeni pesomba, sabana yaku nompatolele Kareba Belo lako nte Alatala ka tona ledo toYahudi, bo ira anu nomparasaya i Kristus nirekeku pesomba nipesombaku ka Alatala. Bo pesombaku haitu tantu nitarima nu Alatala sabana Nosa Gasa nompakagasa ira bo nompatani ira majadi bagia nu Alatala.
Nisanimiu mboto ane kita matundu nte tona bo mangoseaka parentana, kita majadi batuana. Ivesia muni ante dosa. Ane kita batena mangoseaka dota rarata anu nadaa, kita majadi batua nu dosa bo kaupuna kita mamate bo rapopogaa lako nte Alatala. Tapi ane kita matundu nte Alatala, kita majadi batuaNa bo kita rapakanoa ri panggitaNa.
Yaku nompake porapa batua ala ledo makaja rapahamiu pepatudukiku, apa kita manusia da nakura pompahata. Bara ipia komiu nipobatua nu dosa sabana komiu nompalamba karomiu nangoseaka dota raramiu nadaa sampe pokainggumiu nantambai kadaana. Jadi hitupa, dekeimo katuvumiu ka Alatala ala komiu majadi batuaNa anu nanoa bo mpuu-mpuu majadi todeaNa.
Pangoseakamiu i Kristus nirapaka pesombamiu ka Alatala anu mompakadamba raraNa. Tempo bara ipia, ane tona nombadekei pesomba ka Alatala, kana nombatoli uve anggur ala mompakagana pesombana. Ane rapana yaku rapatesi sabana pokarajaaku nompatolele Kareba Belo, raaku rarapaka uve anggur nitoli haitu, apa yaku nasadia mamate ane rapodota nTupu. Jadi, nau yaku rapatesi, ledo nakuya! Yaku batena manguli tarima kasi nte Alatala bo yaku muni madamba mpasanggani-nggani nte komiu.
Kaupuna, sampesuvu-sampesuvu: bara ipia kami nompatuduki ka komiu pokainggu masipato rapoviamiu ala madamba rara nu Alatala. Bo nisaniku nipoviamiumo anu nipatuduki kami. Tapi kami merapi nte mpuu-mpuu rara bo mompopatora komiu ante kuasa nidekei i Pue Yesus ka kami: pasimbukumo hanupa matuvu nte pokainggu mompakadamba Alatala!
Komiu muni nasimbayu mpo vatu-vatu natuvu, jadi dekei Alatala mompake komiu majadi banua petupu ka Ia. Bo riara banua petupu haitu komiu majadi mpo topanggeni pesomba, anu natuvu nipatani ka Alatala. Bo komiu namala metupu nte Ia ante pekeniaka Nosa Gasa. Petupumiu haitu najadi pesomba anu rapokonoa rara nu Alatala sabana anu nipovia i Yesus Kristus.