Roma 11:22 - Kaili Ledo

²² Jadi lako rahaitu nisanita kabelo rara nu Alatala, bo nisanita Ia nasadia mombahuku. Ia nombahuku topesapuaka, tapi nabelo raraNa nte komiu anu nomparasaya, asaa komiu maroo manjarumaka kabeloNa haitu. Ane ledo, komiu muni rapoaraNa!

Roma 11:22 ပူးပေါင်းရင်းမြစ်များ

Lukas 8:15

Savua nanavu ri tana naboya, nirapaka tona nanoa bo nabelo rarara. Niepera Tesa nu Alatala bo nipariarara. Ira bate-batena nangoseaka Tesa nu Alatala sampe noguna mpuu katuvura.”

Yohanes 15:2

Tinggu-tingguKu anu ledo novua nikoto bo nitedakaNa. Tapi tinggu-tinggu novua nipegasaNa pakabelo-belo ala mantambai kadea vuana.

Yohanes 8:31

Naupu haitu, i Yesus nanguli ka toYahudi anu nomparasaya Ia, “Ane komiu maroo mangoseaka tesaKu, komiu mpuu-mpuu topangoseaka Yaku.

Suro-Suro 11:23

Nakavapa i Barnabas ri Antiokhia, nadamba mpuu rarana nanggita kabelo nu Alatala nte ira. Jadi nipakarosona rarara ala ira bate-batena mangoseaka i Pue Yesus ante mpuu-mpuu rarara.

Suro-Suro 14:22

Ri ngata-ngata haitu ira nompakaroso rara ntopangoseaka i Yesus bo nompopatora ira nee molengga-lengga momparasaya. Niulira, “Kita kana mombarasai kasusa bo kapari ruru pade mamala kita mombarasai kasana ri Poparenta nu Alatala.”

Roma 11:21

Apa ane Alatala nompoara toYahudi anu nirapaka tinggu nu kayu mami, nee rasarumakamiu Ia ledo mompoara komiu ane ledo raparasayamiu!

Roma 2:7

Sanu tona ledo nasau rarara nokainggu nabelo sabana ira madota ratoiya bo rabila nu Alatala, bo madota manggava katuvu nabelo anu ledo maupu-upu. Bo Alatala mombadekei katuvu nabelo sampe ri kasae-saena ka tona gahaitu.

1 Korintus 15:2

Kareba Belo haitu namala manggeni komiu rapakasalama ane komiu bate-batena momparasaya tesa nipatoleleku ka komiu. Ane ledo, pomparasayamiu tutu ledo nakana.

Galatia 6:9

Sabana haitu, nee mabasa rarata movia anu nabelo, sabana ane ledo maupu rarata movia anu nabelo, makava tempona ratarimata aselena.

1 Tesalonika 3:5

Jadi sia sampe nituduku i Timotius tou nte komiu, ala kusani berimba pomparasayamiu, sabana domo nipakuleku mantaamaka kalentora raraku nompekirika komiu. Nakini raraku nee-nee komiu bara mamala radagi nu Magau Seta ante pesori-pesorina sampe domo ria asele lako ri katiti nu ini kami nanggeni Kareba Belo ka komiu.

1 Tesalonika 3:8

Apa mpuu-mpuu maosa rara kami ane komiu batena maroo mosangu rara nte i Pue.

Ibrani 10:23

Kita kana bate-batena manjarumaka i Yesus, kita nangaku Iamo Tuputa. Nee molengga-lengga apa nisanita Alatala namala raparasaya mompakadupa pojanjiNa.

Ibrani 3:14

Apa kita manggava bagia lako ri pura-pura anu naria nte i Kristus asaa anu niparasayata lako ri pamulana bate-batena raparasayata sampe ri kaupuna bo ledo molengga-lengga.

Ibrani 3:6

Tapi i Kristus ledo aga potudua, Ia Ana nu Alatala mami anu natutu nompasiayu pura-pura todea nTuamaNa. Bo kitamo nireke todea nu Alatala asaa kita naroo nomparasaya bo ledo nolengga-lengga nanjarumaka i Yesus ante damba rara sampe ri kaupuna.

1 Yohanes 2:19

Bali-bali i Kristus nesuvu lako nte kita, tapi kakanana ira ledo nosangu pomparasaya ante kita. Ane ira mpuu-mpuu nosangu pomparasaya ante kita, natantu ira da mosanggani-nggani ante kita. Tapi nipalaikaramo kita, jadi nisanita ira ledo mpuu nosangu pomparasaya ante kita.

Pompakita 2:5

Nakavao ntotomo kanavumiu! Haitu sampe Kuuli ka komiu, pakabelo-belo! Kajeamo komiu, bo poviamo mpo anu nipoviamiu ri pamulana. Ane ledo majea komiu, Kualasi kada mpoindo bulavamiu lako ri ponturona.