Roma 11:13 - Kaili Ledo

¹³ Sii-sii kupambela tesaku hitu ka komiu, tona ledo toYahudi. Yakumo hii suro i Yesus anu nisuroNa manggeni Kareba Belo ka komiu tona ledo toYahudi. Bo pokarajaaku haitu nirekeku nabelo mpuu.

Roma 11:13 ပူးပေါင်းရင်းမြစ်များ

Suro-Suro 13:2

Naria saeo, todea topomparasaya pura-pura nosambaya bo nombatoiya Alatala bo nopuasa. Nosa Gasa nu Alatala nanguli ka ira, “Pelisi bo patani ka Yakumo i Barnabas bo i Saulus mantui pokarajaa nipakatantuKu ka ira.”

Suro-Suro 22:21

Tapi nanguli vaimo i Pue ka yaku, ‘Koimo. Yaku nantudu iko hau ri ngata-ngata nakavao, nte tona ledo toYahudi.’ ”

Suro-Suro 9:15

Tapi nanguli i Pue, “Koimo! Apa nipelisiKumo ia mokarajaa ka Yaku mompatolele karebaKu ka tona ledo noagama Yahudi, ka magau-magau bo ka todea toIsrael muni.

Galatia 1:16

Ia nompopaisani AnaNa i Yesus ka yaku ala yaku mamala mompatolele Kareba Belo anu notesaki AnaNa haitu ka tona ledo toYahudi. Tempo yaku nipokio nu Alatala, yaku ledo kaliu-liu hau nte manusia merapi rapatuduki, apa i Yesus mbotomo nompopaisani Kareba haitu ka yaku.

Galatia 2:2

Yaku hau ri Yerusalem sabana naria tesa nu Alatala nombatudu yaku hau. Nakavapa hamai, yaku aga nasiromu ante pakeni-pakeni ntodea topomparasaya, bo nipopaisaniku ka ira isi Kareba Belo anu nipatoleleku ka tona ledo toYahudi. Nakini raraku mbelaka rasalaira pepatudukiku sampe domo maria gunana pokarajaaku mompatolele Kareba Belo, nau anu nipoviaku bara ipia, atau anu da nipoviaku sii-sii.

Efesus 3:8

Yaku natueipa pade pura-pura todea nu Alatala ntanina. Tapi naupa ivesia, Alatala nabelo mpuu nte yaku bo nidekeiNa ka yaku pokarajaa mompatolele Kareba Belo ka komiu tona ledo toYahudi. Kareba haitu notesaki kabelo i Kristus anu naoge mpuu, ledo rapakuleta mombarekena.

1 Timotius 2:7

Bo haitumo sabana yaku nianggataka nu Alatala majadi suroNa. NituduNa yaku hau mompatolele Kareba Belo ka tona ledo toYahudi. NituduNa yaku mompatuduki pepatuduki nakana ka ira ala raparasayara i Yesus. Anu nitesaku hitu nakana mpuu, yaku ledo nodava!