Roma 1:28 - Kaili Ledo

²⁸ Tona gahaitu ledo nadota mosisani ante Alatala. Jadi Alatala nompalamba ira rakeniaka mpekirira nadaa sampe ira novia anu ledo masipato rapoviara.

Roma 1:28 ပူးပေါင်းရင်းမြစ်များ

Suro-Suro 17:23

Apa tempo yaku nanjayo-njayo riara ngatamiu nikitaku nadea pompakande viata. Bo nikavaku sangu pompakande anu naria nitulisi, ‘Pompakande ka Tupu Ledo Nisani SangaNa.’ Tupu haitu nisombamiu, nau ledo nisanimiu sangaNa. Tupu haitumo kupopaisani ka komiu ri sii.

Suro-Suro 17:32

Tempo todea nangepe tesa tomate natuvu mpanjili lako ri kamatena, naria sanu ira nompongirika i Paulus, sabana ledo niparasayara tomate mamala matuvu mpanjili. Tapi naria muni sanu nanguli, “Kami da madota mangepe hanupa tesamu tutu!”

Roma 1:18

Lako ri suruga Alatala nombahuku manusia anu ledo natundu nte Ia bo nokainggu nadaa. Pokainggura nadaa haitu nombalava tona mangisani pepatuduki nakana.

Roma 1:21

Nisanira Alatala naria bo nisanira Ia masipato rabila, tapi ledo nibilara, bo ledo muni niulira tarima kasi nte Ia. Ira aga nompekirika anu ledo ria gunana. Pekirira nadoyo bo ledo nipahara anu nakana.

Roma 1:24

Manusia ledo nadota netupu nte Alatala, jadi Alatala nompalamba ira nangoseaka dota rarara mboto bo nokainggu nadaa, sampe posipogaura mpuu-mpuu nepakaeya.

Roma 1:26

Ira ledo nadota netupu nte Alatala, jadi Alatala nompalamba ira mangoseaka dota rarara nabuga anu nepakaeya. Mombine-mombine domo nompokono langgai mpo biasana najadi nte manusia, tapi noberei simbo mombinemo.

1 Korintus 15:34

Jadi pakanoto mpanjili pekirimiu bo tumo rapovia dosa! Da nariapa sanu komiu dopa nosisani belo nte Alatala. Niuliku ivesia ala maeya matamiu.

2 Korintus 10:5

Ante kuasa nu Alatala kami nompakule nombadagi pekiri ntopangeva pepatuduki nakana, pekiri ntona nasombo, bo pekiri ntona anu nombalava tona ntanina mosisani nte Alatala. Ante kuasa lako nte Alatala kami nanggeni ira nombabali pekirira sampe ira natundu nte i Kristus.

Efesus 5:4

Ledo muni masipato komiu mosovadaka tesa-tesa nasuloka bara tesa-tesa ledo ria gunana bara kuvava-kuvava anu ledo masipato. Aginapa sumbamiu rapakemiu manguli tarima kasi ka Alatala.

2 Tesalonika 1:8

bo ante apu navaya-vaya. Ia manau mombahuku tona ledo nadota nompeili Alatala bo ledo nadota nangoseaka Kareba Belo anu notesaki Tuputa Yesus.

2 Timotius 3:8

Tona nanggeni pepatuduki anu ledo nakana haitu pekirira nadaamo bo pomparasayara ledo nakana. Ira mpuu-mpuu nangeva pepatuduki nakana, nasimbayu mpo i Yanes bo i Yambres nangeva Nabi Musa nggaulu ante pangisanira.

Titus 1:16

Pangulira ira nosisani ante Alatala, tapi pokainggura ledo nosinggambela nte tesara. Pokainggura aga nompakarunggu rara nu Alatala, bo ira ledo nadota natundu nte Alatala. Ledo nipakulera nokainggu nabelo.

Filemon 1:8

Jadi, nanggita pepotovemu ka topomparasaya, naria anu kuperapi nte iko. Kakanana, namala kuparenta iko movia anu masipato mupovia sabana kuasa nidekei i Kristus ka yaku.

2 Petrus 3:5

Tona notesa ivesia, nitunggaira nombakalingasi anu najadi bara ipia, haitumo, Alatala nompajadi langi nggaulu ante tesaNa, bo ante tesaNa muni tana nipajadiNa lako ri uve bo kabatana neumba lako ri tatanga nu uve.