Pompakita 3:5 - Kaili Ledo

⁵ Isema-sema padagi kana radekeika baju mputi. Bo sangara ledo Kupakalipo lako ri Buku Katuvua, tapi Kusaliku ri ngayo nTuamaKu bo malaeka-malaekaNa.

Pompakita 3:5 ပူးပေါင်းရင်းမြစ်များ

Matius 10:32

Isema-sema manguli ri ngayo ntona ntanina, ia topangoseaka Yaku, Yaku muni manguli ri ngayo nTuamaKu Alatala ri suruga, ia topangoseaka Yaku.

Lukas 10:20

Naupa ivesia, nee madamba raramiu sabana seta-seta natundu nte komiu. Agina madamba sabana sangamiu nitulisi riara buku nu Alatala ri suruga.”

Lukas 12:8

“Pariaramo! Isema-sema manguli ri ngayo ntodea, ia topangoseaka Yaku, Yaku muni manguli ri ngayo malaeka-malaeka nu Alatala, ia topangoseaka Yaku.

Filipi 4:3

Bo kuperapi muni nte vega rapaku i Sunsugos, tulungimo mombine randua pangane ala ira mosangu rara mpanjili. Ira nokarajaa ntamo ante yaku nompatolele Kareba Belo nasimbayu mpo i Klemens bo roa-roaku ntanina sampokarajaa. Sangara nitulisi riara Buku Katuvua, anu nompakatantu isema masipato matuvu mabelo sampe ri kasae-saena.

Yudas 1:24

Ratoiyatamo Alatala sabana Ia nakuasa nombajagai kita ala ledo rakabasakata pomparasayata. Ia nakuasa manggeni kita hau ri suruga mantingayo Ia riara kaogeNa, bo ledo maria salata, bo melabi kadamba rarata.

Pompakita 13:8

Pura-pura manusia nonturo ri dunia mombasomba binata haitu, haitumo pura-pura tona anu ledo nitulisi sangara riara Buku Katuvua dopame dunia nipajadi. Buku haitu naria nte Ana Bimba anu nipatesi.

Pompakita 17:8

Da nokolu, binata nikitamu haitu da naria natuvu, tapi sii-sii domo naria. Tapi ia meumba mpanjili bara maipia lako riara lovu anu ledo rapakule mantuvu kandalana. Maliu haitu ia rahuku sampe ri kasae-saena. Bo tona natuvu ri dunia anu ledo nitulisi sangara riara Buku Katuvua dopame dunia nipajadi nu Alatala, ira mpuu-mpuu mokumaa manggita binata haitu. Sabana, da nokolu binata haitu natuvu, sii-sii domo naria, tapi meumba mpanjili bara maipia.

Pompakita 19:8

Ia nidekeika pakea mputi nalusu nenggila rapakena.” (Pakea nalusu nidekei ka mombine haitu nirapaka pokainggu-pokainggu nanoa anu nipovia ntodea nu Alatala.)

Pompakita 2:11

Isema-sema naria talingana epemo pakabelo-belo anu niuli Nosa Gasa nu Alatala ka todea topomparasaya ri umba-umba ngata. Isema-sema padagi ledo ntoto mambela pehuku anu niuli kamatea karongganina.”

Pompakita 2:7

Isema-sema naria talingana epemo pakabelo-belo anu niuli Nosa Gasa nu Alatala ka todea topomparasaya ri umba-umba ngata. Isema-sema padagi kana Kudekei mangande vua lako ri Kayu Katuvua anu naria riara Pampa nu Alatala ri suruga.”

Pompakita 20:12

Bo nikitaku tona namate neangga ri ngayo Gadera haitu, haitumo, tomaoge bo tona biasa, tona namate nalodo rantasi, tona ntanina anu namate janjina, pura-pura tona lako ri ponturo ntomate. Ira pura-pura neangga ri ngayo Gadera Kamagaua nu Alatala haitu. Bo buku-buku nitimpamo bo niparesa. Riara buku-buku haitu nitulisi pura-pura pokainggu ntona namate. Jadi pehuku ka ira nipakatantu nangoseaka pokainggu-pokainggura nitulisi riara buku-buku. Bo naria buku ntanina nitimpa muni anu niuli Buku Katuvua.

Pompakita 21:27

Tapi anu naruto bo tona novia nadaa bo topodava ledo ntoto mamala mesua riara ngata haitu. Tona mamala mesua hamai aga tona nitulisi sangana riara Buku Katuvua nu Ana Bimba.

Pompakita 22:19

Bo isema-sema mompakalipo isi tesa pombaboto ri buku hitu, Alatala mangala bagiana, haitumo, ia ledo radekei mangande vua lako ri Kayu Katuvua bo ledo radekei mesua riara ngata nu Alatala mpo niuli riara buku hitu.

Pompakita 3:12

Isema-sema padagi, ia masimbayu mpo tinja naroso ri banua nTuamaku Alatala. Ia matetida ri suruga sampe ri kasae-saena. Bo ri karona Kutulisi sanga nTuamaku Alatala, bo sanga nu ngata nTuamaku Alatala, haitumo Yerusalem nabaru anu manau lako nte Tuamaku Alatala ri suruga. Bo sangaKu mboto nabaru kana Kutulisi ri karona.

Pompakita 3:4

Tapi da nariapa nte komiu ri ngata Sardis bara sako-ndua tona nombajagai pakeara sampe ledo natapa. Iramo anu mamala molipa mosanggani-nggani ante Yaku mopakea mputi, sabana iramo anu masipato molipa ante Yaku.

Pompakita 6:11

Naupu haitu, ira saito-saito nidekeika santonga baju mputi. Bo nangulimo Alatala ka ira, “Posabaramo sampalaipa sampe magana kadeana roamiu sampokarajaa, haitumo sampesuvumiu sampomparasaya anu rapatesi nasimbayu mpo komiu.”