Pompakita 3:3 - Kaili Ledo

³ Jadi toramo pepatuduki niepemiu bo nitarimamiu bara ipia. Oseakamo pepatuduki haitu bo kajeamo lako ri dosamiu. Ane ledo mainga komiu, sampesanika Yaku makavamo mombahuku komiu. Yaku makava mpo topangangga, ledo rasanimiu maipia Yaku makava.

Pompakita 3:3 ပူးပေါင်းရင်းမြစ်များ

Matius 25:13

I Yesus nompakaupu porapaNa ivei: “Haitu sampe komiu kana mainga-inga, apa ledo nisanimiu eona atau jaana Yaku makava.”

Markus 13:33

Jadi mainga-ingamo bo jagaimo, apa ledo nisanimiu maipia Yaku makava.

Markus 13:36

Ane sampesanika Yaku makavamo, nee sampe Kukava komiu da namonjo.

1 Tesalonika 5:2

Apa nisanimiu mboto kakava i Pue Yesus bara maipia masimbayu mpo kakava ntopangangga bongina tempo ledo nisani-sani ntona.

1 Timotius 6:20

Timotius, jagaimo pakabelo-belo pepatuduki nakana anu niparasaya nu Alatala ka iko ala ledo rabaliki ntona. Nee mompariara tesa ledo ria gunana bo ledo nanggeni kita mangoseaka dota nu Alatala, bo tesa-tesa anu nosisala nte pepatuduki nakana. Tesa-tesa haitu niuli ntona “pangisani”, tano ledo nakana.

2 Timotius 1:13

Timotius, toramo pura-pura pepatuduki niepemu lako nte yaku. Pepatuduki haitu nakana mpuu bo kana majadi jonjo mupasiala bo mupatuduki ka tona ntanina. Pakaroso pomparasayamu bo potovemo singgamanusiamu sabana posangu raramu nte i Yesus Kristus.

Ibrani 2:1

I Yesus naogepa pade malaeka. Sabana haitu, kita kana manggangisi pakabelo-belo pepatuduki niepeta ala kita ledo masalandala lako ri dala nakana.

2 Petrus 1:13

Nipekiriku ane yaku da natuvu, masipato kupakaroso raramiu ante pepatoraku hitu.

2 Petrus 3:1

Sampesuvu-sampesuvu nipotoveku, hitumo suraku karanduana ka komiu. Riara suraku karanduana hitu muni yaku nompasimbuku mompopatora ka komiu pepatuduki nakana ala pekirimiu batena magasa.

2 Petrus 3:10

Tapi i Pue Yesus mpuu-mpuu makava mpanjili! KakavaNa ledo rasani-sani ntona, nasimbayu mpo kakava ntopangangga. Ri eo haitu langi malipo sanggani ante moni mamangga mpuu mpo suu nu apu oge. Bo pura-pura anu naria ri langi maropu rakande nu apu, bo dunia ante pura-pura isina malipo sanggani.

Pompakita 16:15

Bo nangulimo i Yesus, “Pariaramo! Yaku makava ri tempo ledo nisani-sanimiu nasimbayu mpo topangangga. Mabelo mpuu tona batena mainga bo mombajagai pakeana ala tempo Yaku makava ledo maeya matana mpo tona novuloa nelaya ri ngayo ntodea.”

Pompakita 2:25

Kingisi pakarosomo pepatuduki anu naria nte komiu sampe Yaku makava mpanjili.

Pompakita 2:5

Nakavao ntotomo kanavumiu! Haitu sampe Kuuli ka komiu, pakabelo-belo! Kajeamo komiu, bo poviamo mpo anu nipoviamiu ri pamulana. Ane ledo majea komiu, Kualasi kada mpoindo bulavamiu lako ri ponturona.

Pompakita 22:7

Bo nangulimo i Yesus, “Pariaramo! Domo masae makavamo Yaku. Nabelo mpuumo tona nompariara anu niboto ri buku hitu!”

Pompakita 3:11

Domo masae Yaku makava! Jadi kingisi pakarosomo pepatuduki nipatuduki ka komiu ala komiu manggava hadia padagi lako nte Alatala. Nee sampe maria tona mangago hadia haitu lako nte komiu.

Pompakita 3:19

Isema-sema nipotoveKu, Kuonteaka bo Kujeani ala mompatuduki ira. Haitu sampe Kuuli ka komiu, pakadidi raramiu bo kajeamo lako ri dosamiu.

Pompakita 3:2

Pembangumo! Pakarosomo pomparasayamiu anu damo sakide. Dopame mamate pomparasayamiu anu damo sakide, pakaroso mamimo. Apa nikitaKu lako ri pura-pura pokainggumiu, nau sangaya dopa ria nagana ri panggita nu Alatala.