9 Ira mompesayoki dunia bo makava lako ri umba-umba dunia mombatiku ngata nipotove nu Alatala, haitumo ponturo ntodea nu Alatala. Tapi apu manau lako ri langi mompalabu ira pura-pura sampe maupu.
Niepe i Yakobus bo i Yohanespa tona ri ngata haitu ledo nadota mantarima i Yesus, niulira ka i Yesus, “Pue, ane rapodotaMiu, raperapi kami apu lako ri langi manau mompalabu ira.”
Sabana haitu, kita kana mesuvu hau nte Ia ri savaliku ngata, nasadia rasalai nosanggani-nggani nte Ia. Batuana, kita kana mombakabasaka anu nioseakata nggaulu bo aga momparasaya i Yesus, nau bara isema manjalai kita.
Ane maria tona madota mompakadaa ira, maria apu mesuvu lako ri ngangara bo mompakaropu bali-balira gahaitu. Ivesiamo isema-sema madota mompakadaa ira rapatesi ante apu haitu.