Pompakita 20:12 - Kaili Ledo

^12-13 Bo nikitaku tona namate neangga ri ngayo Gadera haitu, haitumo, tomaoge bo tona biasa, tona namate nalodo rantasi, tona ntanina anu namate janjina, pura-pura tona lako ri ponturo ntomate. Ira pura-pura neangga ri ngayo Gadera Kamagaua nu Alatala haitu. Bo buku-buku nitimpamo bo niparesa. Riara buku-buku haitu nitulisi pura-pura pokainggu ntona namate. Jadi pehuku ka ira nipakatantu nangoseaka pokainggu-pokainggura nitulisi riara buku-buku. Bo naria buku ntanina nitimpa muni anu niuli Buku Katuvua.

Pompakita 20:12 ပူးပေါင်းရင်းမြစ်များ

Matius 11:22

Pariaramo! Tempo Alatala mombatangara manusia bara maipia, pehuku ka komiu melabipa kantamona pade pehuku ka toponturo ri ngata Tirus bo Sidon.

Matius 16:27

Jadi, oseakamo Yaku nau sampe mamate. Apa domo masae Yaku, Ana nu Manusia makava lako ri suruga ante kuasa bo reme lako nte TuamaKu, mosanggani-nggani ante malaeka-malaekaNa. Bo tempo haitu Kubalasi pura-pura tona nangoseaka pokaingguna.

Lukas 10:20

Naupa ivesia, nee madamba raramiu sabana seta-seta natundu nte komiu. Agina madamba sabana sangamiu nitulisi riara buku nu Alatala ri suruga.”

Suro-Suro 24:15

Yaku nasimbayu ante toYahudi gahitu, yaku muni nanjarumaka Alatala mompakatuvu pura-pura tona lako ri kamatera, tona nanoa bo muni tona nadaa.

Roma 2:6

Apa Alatala mombabalasi pokainggu ntona pura-pura.

1 Korintus 4:5

Jadi nee komiu masalisa mompakatantu sala ntona ane dopa nakava tempona. Popea sampe i Pue Yesus makava mpanjili ri dunia. Iamo mompakalanto pura-pura anu nitabuniaka ri kalandana sii-sii. Iamo mompakalanto mpengaya-ngaya patuju nitabuniaka riara ntai manusia. Ri tempo haitu, Alatala mombatoiya isema-sema masipato ratoiyaNa.

2 Korintus 5:10

Apa kita pura-pura kana mantingayo i Kristus bara maipia ala ratangaraNa. Maupu ratangaraNa, simbo rakavata anu nipakatantu nangoseaka anu nipoviata tempo kita natuvu ri dunia hitu, bara povia nabelo bara povia nadaa.

Filipi 4:3

Bo kuperapi muni nte vega rapaku i Sunsugos, tulungimo mombine randua pangane ala ira mosangu rara mpanjili. Ira nokarajaa ntamo ante yaku nompatolele Kareba Belo nasimbayu mpo i Klemens bo roa-roaku ntanina sampokarajaa. Sangara nitulisi riara Buku Katuvua, anu nompakatantu isema masipato matuvu mabelo sampe ri kasae-saena.

Pompakita 11:18

Tona ledo nosisani nte Komiu narau bo nangeva Komiu. Tapi nakavamo gantana Komiu mompopakita rau nu raraMiu ka ira. Nakavamo gantana Komiu mombatangara tona namate. Bo nakava munimo gantana Komiu mombadekei tambo ka batua-batuaMiu, haitumo, nabi-nabi anu nompasimbayu tesaMiu, bo ka pura-pura todeaMiu, ira anu nombabila Komiu, nau tona biasa, nau tona naoge katuvuna. Nakavamo gantana Komiu mombahuku tona anu nompakaropu manusia ri dunia hitu.”

Pompakita 13:8

Pura-pura manusia nonturo ri dunia mombasomba binata haitu, haitumo pura-pura tona anu ledo nitulisi sangara riara Buku Katuvua dopame dunia nipajadi. Buku haitu naria nte Ana Bimba anu nipatesi.

Pompakita 17:8

Da nokolu, binata nikitamu haitu da naria natuvu, tapi sii-sii domo naria. Tapi ia meumba mpanjili bara maipia lako riara lovu anu ledo rapakule mantuvu kandalana. Maliu haitu ia rahuku sampe ri kasae-saena. Bo tona natuvu ri dunia anu ledo nitulisi sangara riara Buku Katuvua dopame dunia nipajadi nu Alatala, ira mpuu-mpuu mokumaa manggita binata haitu. Sabana, da nokolu binata haitu natuvu, sii-sii domo naria, tapi meumba mpanjili bara maipia.

Pompakita 19:5

Naupu haitu naria suara lako ri Gadera Kamagaua haitu nanguli, “Umba komiu pura-pura topangoseaka Alatala! Toiyamo Tuputa Alatala! Toiyamo Ia, komiu anu natundu nte Ia, nau tona biasa nau tona naoge katuvuna!”

Pompakita 2:23

Bo ana-anana Kupatesi sampe malanto ka pura-pura topomparasaya, Yakumo anu nomparesa pekiri bo rara ntai manusia, bo Yakumo anu mombabalasi komiu saito-saito nangoseaka pokainggumiu.

Pompakita 20:11

Naupu haitu nikitaku sangu Gadera Kamagaua nabula bo nambaso. Bo nikitaku muni Toponturo ri Gadera haitu. Nariapa Ia ri sia, nalipo singganimo dunia, bo domo naria nikita.

Pompakita 21:27

Tapi anu naruto bo tona novia nadaa bo topodava ledo ntoto mamala mesua riara ngata haitu. Tona mamala mesua hamai aga tona nitulisi sangana riara Buku Katuvua nu Ana Bimba.

Pompakita 22:12

Bo nanguli munimo i Yesus, “Pariaramo! Domo masae makavamo Yaku manggeni tambo bo Kubalasi pura-pura tona nangoseaka pokainggura.

Pompakita 3:5

Isema-sema padagi kana radekeika baju mputi. Bo sangara ledo Kupakalipo lako ri Buku Katuvua, tapi Kusaliku ri ngayo nTuamaKu bo malaeka-malaekaNa.