Pompakita 16:10 - Kaili Ledo

¹⁰ Naupu haitu malaeka kaalimana nombabusaka isi tubuna ri ponturo binata nadaa. Sampesanika pura-pura ngata niparenta nu binata haitu najadi nalanda mpuu. Bo pura-pura todeana nanggiki dila sabana kandasara.

Pompakita 16:10 ပူးပေါင်းရင်းမြစ်များ

Matius 13:42

Ira pura-pura ratedeaka riara apu narakaa anu navaya-vaya. Ri situmo ira aga motumangi-mangi bo masinggiki baga ante kasusa rara.

Matius 13:50

Tona nadaa ratedeaka riara apu narakaa anu navaya-vaya, bo ri situmo ira motumangi-mangi bo masinggiki baga ante kasusa rara.”

Matius 22:13

Bo nanguli magau ka batuana, ‘Soomo palena bo kadana bo tedeakamo ia hau ri savalikuna ri ponturo nalanda. Hamai ia motumangi bo masinggiki ante kasusa.’ ”

Matius 24:51

Bo batua haitu rapatesi. Ia ratedeaka riara narakaa, ponturo ntona aga nabelo ri sumba. Hamai ira motumangi-mangi bo masinggiki baga ante masusa mpuu rara.”

Matius 8:12

Tapi toYahudi mboto anu masipato majadi todea riara Poparenta nu Alatala ledo mamala. Ira aga ratedaka ri kalandana makavao lako nte Alatala, bo hamai ira aga motumangi-mangi bo masinggiki baga ante kasusa rara.”

Lukas 13:28

Tempo komiu manggita i Abraham, i Ishak, bo i Yakub mosanggani-nggani ante pura-pura nabi nggaulu mosusa madamba-damba ri Poparenta nu Alatala, motumangi komiu bo masusa mpuu raramiu sabana komiu rapopalai hau ri savalikuna!

1 Petrus 2:17

Bilamo pura-pura tona. Potovemo sampesuvumiu sampomparasaya. Pekoumo nte Alatala bo bilamo magau!

Pompakita 11:10

Manggita haitu, tona nadaa nonturo ri dunia madamba mpuu. Ira mosusa madamba-damba bo mosidekeika hadia, sabana namatemo tona randua haitu anu mpuu-mpuu nompandasa toponturo ri dunia.

Pompakita 11:2

Tapi nee mureke kaluona doyata ri savaliku BanuaKu, sabana doyata haitu nidekei ka tona ledo nomparasaya i Yesus. Talu-mpae santanga kasaena ira mombakuasai ngataKu Yerusalem.

Pompakita 11:8

Bo karobatara randua haitu matepalamba nggoo ri dala jama ri ngata mbaso, haitumo ri ngata anu nipompatesi i Yesus ri kayu salib. Ngata mbaso haitu nirapaka Sodom bo Mesir nggaulu sabana nadaa mpuu tupu ngata haitu.

Pompakita 17:17

Haitu pura-pura kana majadi sabana Alatalamo nompakasangu pekiri nu magau sapulu movia nia nu Alatala mboto. Ia nompakasangu rarara mombadekei kuasara ka binata nadaa haitu ala binata haitu momparenta sampe madupa pura-pura anu nitesa nu Alatala.

Pompakita 17:9

Ri sii kita paraluu pekiri manoto. Pitu-angu balengga nu binata nadaa anu nipesavi nu mombine haitu nirapaka papitu bulu nipombabangu ngata. Bo papitu balengga haitu muni nirapaka papitu magau.

Pompakita 18:2

Nongaremo ia ante suara namangga, “Nageromo! Nageromo ngata mbaso Babel! Nompamula sii-sii ngata haitu majadi ponturo nu seta-seta, bo ponturo mpengaya-ngaya anu nadaa, bo ponturo mpengaya tonji naruto anu nipovuu mata nu manusia.

Pompakita 18:21

Naupu haitu nikitaku saito malaeka naroso mpuu nombaanggataka sangu vatu mbaso bo nitedakana hau rantasi. Bo niulina, “Ngata Babel ngata mbaso haitu rapakaropu sanggani, domo maria, nasimbayu mpo vatu hitu nitedaka rantasi domo rakava mpanjili.

Pompakita 18:23

Domo maria reme poindo rakita riarana, bo domo raepe suara boti langgai bo boti mombine madamba-damba. Topopagoli-topopagoli lako ri ngata haitu najadi tomaoge ri dunia. Bo ante pangisani nadaa, tupu ngata haitu nombabagiu pura-pura manusia ri dunia.”

Pompakita 8:12

Naupu haitu malaeka kaampana nompopomoni tabuena. Kaliu-liu naria anu nambela mata nu eo, bula bo betue-betue, sampe nalipomo sabagia lako ri tatalu bagia remera. Jadi, pata-jaa ri eona, mata nu eo ledo nareme, bo ivesia muni bula bo betue-betue tempo nabongi.

Pompakita 9:2

Naupu betue haitu nombabuka vamba lovu, nesuvumo unu nu apu oge lako riara lovu ndala haitu, nasimbayu mpo unu ntalua luo nitunju ntona. Bo mata nu eo bo laerava najadi nalanda sabana unu oge nesuvu lako riara lovu ndala haitu.