Pompakita 1:4 - Kaili Ledo

⁴ Sampesuvu-sampesuvu sampomparasaya anu nonturo ri pitu ngata ri propinsi Asia. Yaku i Yohanes, merapi komiu mantarima katinonto bo belo lako nte Alatala anu nariamo lako ri lamba pamulana, bo naria sii-sii, bo maria sampe ri kasae-saena. Bo kuperapi ratarimamiu belo bo katinonto lako nte papitu Nosa nu Alatala anu naria ri ngayo Gadera Kamagaua nu Alatala,

Pompakita 1:4 ပူးပေါင်းရင်းမြစ်များ

Yohanes 1:1

Ri lamba pamulana naria mamimo Tesa nu Alatala. Tesa haitu nosinggani-nggani ante Alatala, bo Ia nasimbayu nte Alatala.

Suro-Suro 19:10

Aga ivesiamo nipovia i Paulus rompae kasaena, sampe pura-pura tona nonturo ri propinsi Asia, toYahudi bo tona ledo toYahudi, nangepe Tesa nTupu.

Suro-Suro 2:9

Kita hii tona lako ri umba-umba, lako ri tana Partia, Media, Elam, lako ri tana Mesopotamia, Yudea bo Kapadokia. Naria muni lako ri tana Pontus bo Asia,

Roma 1:7

Jadi siamo sampe nitulisiku sura hitu ka komiu pura-pura ri ngata Roma, komiu anu nipotove nu Alatala bo nipokioNa majadi todeaNa. Kuperapi Tuamata Alatala bo i Pue Yesus Kristus mombadekei belo ka komiu bo mompakatinonto raramiu.

1 Korintus 1:3

Kuperapi Tuamata Alatala bo Tuputa Yesus Kristus mombadekei belo ka komiu bo mompakatinonto raramiu.

2 Korintus 1:2

Kuperapi Tuamata Alatala bo Tuputa Yesus Kristus mombadekei belo ka komiu bo mompakatinonto raramiu.

Ibrani 13:8

Toramo! I Yesus Kristus ledo nabali-bali, lako ri nggauluname sampe sii-sii bo sampe ri kasae-saena.

Yakobus 1:17

Pura-pura pedekei nabelo, anu ledo ria galona nadaa, nakava lako nte Alatala ri suruga. Ia nompajadi pura-pura anu nareme ri langi. Vayo-vayo najadi lako ri reme haitu nasaro nabali, tapi Ia ledo nabali. Ia bate-batena nabelo.

Pompakita 1:1

Isi buku hitu notesaki kajadia-kajadia anu majadi bara maipia, anu nipopaisani nu Alatala ka i Yesus Kristus. I Yesus nitudu nu Alatala mompopaisani kajadia haitu ka topangoseaka Ia ala rasanira anu domo masae majadimo. Jadi i Yesus nombatudu malaekaNa hau mompopaisani anu majadi haitu ka batuaNa i Yohanes.

Pompakita 1:11

Suara haitu nanguli ivei: “Tulisimo anu mukita bo pakatu ka todea topomparasaya nonturo ri pitu ngata, haitumo ngata-ngata Efesus, Smirna, Pergamus, Tiatira, Sardis, Filadelfia bo Laodikia.”

Pompakita 1:17

Nikitakupa Ia, kaliu-liu nadungga ntuobomo yaku ri ngayoNa mpo tomate. Tapi Ia nombatuu pale ngganaNa ri karoku bo nanguli ka yaku, “Nee maeka. Yakumo hii Pamulana bo Kaupuna.

Pompakita 1:20

Dopa nisanimu batuana pitu-angu betue nikitamu ri pale ngganaKu hitu bo pitu nggada poindo bulava. Jadi kupakalanto batuana ivei: pitu-angu betue haitu nirapaka papitu malaeka anu nanggeniaka todea topomparasaya anu nonturo ri pitu-ngata. Bo pitu nggada poindo bulava haitu nirapaka todea topomparasaya anu naria ri pitu-ngata haitu.”

Pompakita 1:8

Tupu Alatala nanguli, “Yakumo hii Pamulana bo Kaupuna. Yaku naria mamimo lako ri lamba pamulana, Yaku naria sii-sii bo Yaku batena maria sampe ri kasae-saena. Yakumo toNeliu KakuasaKu.”

Pompakita 1:9

Yaku hii i Yohanes, sampesuvumiu sampomparasaya. Yaku nombarasai susa bo pari nasimbayu ante pura-pura topangoseaka i Yesus, bo yaku muni najadi todea riara PoparentaNa nasimbayu ante pura-pura topangoseaka i Yesus, bo yaku muni nosabara tempo nipandasa, nasimbayu ante pura-pura topangoseaka i Yesus. Yaku nitaniaka ri levuto Patmos, sabana nompatolele Tesa nu Alatala bo pepatuduki i Yesus.

Pompakita 16:5

Naliu haitu niepeku suara malaeka anu nombakuasai uve nanguli, “O, Pue Alatala, Komiu naria mamimo lako ri pamulana bo sii-sii bate-batena naria. Komiu toGasa, Nanoa mpuu pobotusiMiu,

Pompakita 2:12

Naupu haitu Ana nu Manusia nombatudu yaku motulisi ka malaeka anu nanggeniaka todea topomparasaya ri ngata Pergamus ivei: “Hitumo tesa lako nte Yaku anu naria guma nomata ntimali bo natada mpuu.

Pompakita 2:18

Bo nitudu Ana nu Manusia vai yaku motulisi ka malaeka anu nanggeniaka todea topomparasaya ri ngata Tiatira ivei: “Hitumo tesa lako nte Yaku, Ana nu Alatala anu nomata narega mpo apu bo nokada nenggila mpo tambaga.

Pompakita 2:8

Naupu haitu nitudu Ana nu Manusia vai yaku motulisi ka malaeka anu nanggeniaka todea topomparasaya ri ngata Smirna ivei: “Hitumo tesa lako nte Yaku anu niuli Pamulana bo Kaupuna, anu namatemo bo natuvu mpanjili.

Pompakita 22:16

“Yaku i Yesus, nombatudu malaekaKu hau mompopaisani petevaiKu hitu ka komiu todea topangoseaka Yaku. Yakumo hii muli bo valaa Magau Daud. Yakumo hii betue pompaeo anu nareme.”

Pompakita 22:8

Yaku i Yohanes nanggita bo nangepe pura-pura kajadia pangane. Naupu yaku nangepe bo nanggita haitu pura-pura, nantaputumo yaku sampe ri tana mombasomba malaeka anu nombatuduaka pura-pura kajadia haitu ka yaku.

Pompakita 3:1

Ana nu Manusia netudu vai ala kutulisi ka malaeka anu nanggeniaka todea topomparasaya ri ngata Sardis ivei: “Hitumo tesa lako nte Yaku anu nombakuasai papitu Nosa nu Alatala bo anu nantipale pitu-angu betue. NisaniKumo pura-pura pokainggumiu. Komiu nireke ntona topomparasaya naroso, tano pomparasayamiu haitu namatemo.

Pompakita 3:14

Ana nu Manusia netudu vai ala kutulisi ka malaeka anu nanggeniaka todea topomparasaya ri ngata Laodikia ivei: “Hitumo tesa lako nte Yaku anu nipoposanga ‘Amin’, haitumo sabi natutu notesa anu nakana. Yakumo Tupu nu pura-pura anu nipajadi nu Alatala.

Pompakita 3:7

Ana nu Manusia netudu vai ala kutulisi ka malaeka anu nanggeniaka todea topomparasaya ri ngata Filadelfia ivei: “Hitumo tesa lako nte Yaku anu nagasa bo nanoa. Yakumo nantipale gunji nu vamba Poparenta Magau Daud. Ane Yaku mombaungge vamba, ledo ria saitoa tona mamala mombatutuina, bo ane Yaku mombatutui vamba ledo muni maria saitoa tona mamala mombaunggena.

Pompakita 4:5

Lako ri Gadera Kamagaua pangane nesuvu kila damo mparea nevanta, bo gente nu guru damo nosinjaleva poguna. Ri ngayo Gadera haitu naria muni pitu-angu sulo narega. Pitu-angu sulo haitu batuana papitu Nosa nu Alatala.

Pompakita 4:8

Anu Natuvu haitu simbo aono kapina, bo ri njumangu karora naria mata, nau ri tambe kapira muni. Eo bongi ira ledo nenonto nodade, “Nagasa, nagasa, nagasa Tupu Alatala Neliu KakuasaNa. Ia naria mamimo lako ri lamba pamulana, bo sii-sii Ia naria. Bo Ia batena maria sampe ri kasae-saena.”

Pompakita 5:6

Naupu haitu nikitaku sangu Ana Bimba neangga ri sinjori Gadera Kamagaua bo nipatiku nu ampa Anu Natuvu bo totua-totua gahaitu. Ri karoNa nikitaku bela baka, belana tempo Ia nipatesi nggaulu. Ri balenggaNa naria papitu tanduNa bo mataNa muni pitu-angu. Pitu-angu mataNa haitu, batuana papitu Nosa nu Alatala anu nituduNa hau ri njumangu dunia.

Pompakita 8:2

Bo nikitaku papitu malaeka neangga ri ngayo nu Alatala. Ira nidekeika pitu-angu tabue.