Matius 5:28 - Kaili Ledo

²⁸ Tapi Kuuli ka komiu, isema-sema mombalele mata manggita mombine bo madota mompogau ia, natantu tona haitu nireke nombabualoni mombine haitu riara pekirina.

Matius 5:28 ပူးပေါင်းရင်းမြစ်များ

Matius 15:19

Apa lako riara ntai neumba mpengaya pekiri nadaa, anu nanggeni tona nepatesi, nobualo, nogau nabuga, nangangga, nosabi dava, bo nesalai.

Matius 5:22

Tapi Kuuli ka komiu, isema-sema narau rarana nte sampesuvuna masipato ratangara. Bo isema-sema nanjalai sampesuvuna masipato raposintingayo ri Polibu Mbaso Agama. Tapi isema-sema manguli ka sampesuvuna, ‘Kanavumo ri narakaa iko!’ ia haitumo masipato ratedaka riara apu narakaa.

Matius 5:39

Tapi Kuuli ka komiu, nee rapesavamiu. Ane maria tona mombasapa kalimpi ngganamiu, dekei muni sabingga kalimpi njidimiu rasapana.

Roma 7:14

Sampesuvu-sampesuvu, nisanita Atura agama mpuu-mpuu nabelo sabana Atura haitu lako nte Nosa Gasa nu Alatala. Tapi yaku hii aga manusia nalente, yaku nipobatua nu dosa.

2 Petrus 2:14

Ira bate-batena naino mompogau sambara mombine nikitara. Ledo nabasa-basa ira novia dosa! Ira nombaopa tona ledo naroso pomparasayana ala movia dosa. Bo najadi kabiasara nario mata ante ledo ria kabasa-basana. Ira mpuu-mpuu tona nasurukavu!

1 Yohanes 2:16

Apa pura-pura riara dunia, evamo dota rarata nadaa, anu nikitata bo nipoino rarata, bo pura-pura anu nompakalanga rarata, haitu puramo ledo nopuna lako nte Alatala tapi aga nopuna lako ri dunia nadaa.