Matius 25:41 - Kaili Ledo

⁴¹ Maupu haitu Kuuli ka ira ri sabingga njidiKu, ‘Palaimo lako nte Yaku, komiu anu nihuku nTuamaKu! Koi hau riara apu anu navaya sampe ri kasae-saena nipakasadia ka Magau nu Seta ante malaeka-malaeka anu nangoseaka ia.

Matius 25:41 ပူးပေါင်းရင်းမြစ်များ

Matius 13:40

Eva jono nipasiromu bo nipalabu riara apu, ivesia muni anu majadi ri Kaupu nu Dunia.

Matius 13:42

Ira pura-pura ratedeaka riara apu narakaa anu navaya-vaya. Ri situmo ira aga motumangi-mangi bo masinggiki baga ante kasusa rara.

Matius 13:50

Tona nadaa ratedeaka riara apu narakaa anu navaya-vaya, bo ri situmo ira motumangi-mangi bo masinggiki baga ante kasusa rara.”

Matius 18:8

Ane rapana palemiu atau kadamiu manggeni komiu movia dosa, agina pale atau kadamiu haitu ratampasi bo ratedeaka. Aginapa komiu mapudu pale atau mapudu kada asaa komiu matuvu mabelo nte Alatala ri suruga. Aginapa ivehaitu pade maria robingga pale bo robingga kada tapi kaupuna aga ratedaka riara apu anu navaya sampe ri kasae-saena.

Matius 25:42

Apa tempo naara taiKu, ledo nipakandemiu. Tempo nabai tamboloKu ledo nipainumiu.

Matius 25:46

Bo i Yesus nompakaupu tesaNa ante nanguli, “Pura-pura tona nadaa haitu rahuku sampe ri kasae-saena. Tapi tona nanoa, matuvu mabelo sampe ri kasae-saena.”

Matius 3:12

Ia nasimbayu eva tona novaro pae. Nasadiamo Ia ante tapi ri paleNa bo ravarona paeNa sampe magasa. Pae naisi raboliNa riara gampiriNa, tapi meena rapalabusiNa riara apu anu ledo mapaya-paya.”

Matius 4:10

Tapi nesanamo i Yesus ka ia, “He, Magau nu Seta! Palaimo iko lako ri sii. Sabana nitulisi riara Buku Gasa ivei: ‘Komiu kana mombasomba Alatala, Tupumiu. Aga Iamo masipato rapetupumiu.’”

Matius 5:22

Tapi Kuuli ka komiu, isema-sema narau rarana nte sampesuvuna masipato ratangara. Bo isema-sema nanjalai sampesuvuna masipato raposintingayo ri Polibu Mbaso Agama. Tapi isema-sema manguli ka sampesuvuna, ‘Kanavumo ri narakaa iko!’ ia haitumo masipato ratedaka riara apu narakaa.

Matius 7:23

Tapi Kupesanaka ira, ‘Ledo nisaniKu komiu! Palaimo lako ri sii, komiu topokainggu nadaa!’ ”

Lukas 13:27

Tapi tupu nu banua haitu aga mesana ka komiu, ‘Ledo nisaniKu komiu, bo ledo nisaniKu lako ri umba komiu. Palaimo lako ri sii. Komiu pura-pura tona nadaa!’

Lukas 16:24

Nongaremo tokalumana haitu, ‘Tuamaku, Abraham, poasimo yaku! Tudumo i Lazarus mombalome koya mpalena ri uve pade tumai mombabanggasi dilaku, nandasa mpuu yaku ri mata nu apu hitu.’

Yohanes 8:44

Komiu nasimbayu ante tuamamiu, Magau nu Seta! Komiu batena madota mangoseaka dotana. Lako ri pamulaname ia bate-batena topepatesi. Ia ledo nosabingga ka anu nakana, sabana ledo ria nuapa-nuapa nakana riara ntaina. Masipato ia modava, apa ia topodava mami bo puna nu dava.

2 Tesalonika 1:7

bo rakabasakaNa komiu lako ri kasusa nirasaimiu sii-sii, bo ivesia muni kami. RakabasakaNa pura kita tempo i Pue Yesus manau lako ri suruga mosanggani-nggani ante malaeka-malaekaNa nakuasa,

2 Tesalonika 1:9

Tona haitu rahuku nu Alatala sampe ri kasae-saena. Ira rapopogaa lako nte i Pue Yesus bo ledo rarasaira kaoge nu kuasaNa.

Ibrani 6:8

Tapi ane tana haitu aga mompakatuvu jono bo karui, ledo ntoto ria gunana. Tana haitu domo masae rapindasi nu Alatala. Bo kaupuna tana haitu rapalabu pakaupu.

2 Petrus 2:4

Toramo! Alatala ledo nombakabasaka malaeka-malaekaNa mboto lako ri pehuku tempo ira novia dosa, tapi ninavusakaNa ira riara narakaa. Ira nisuaraka riara bolo nalanda bo nirante hamai mompopea tempona ira rahuku ri Eo Potangara bara maipia.

1 Yohanes 3:10

Hitumo posisalana ana-ana nu Alatala bo ana-ana Magau nu Seta: isema-sema ledo novia dota nu Alatala bo ledo nompotove sampesuvuna, ia ledo ana nu Alatala.