Matius 21:31 - Kaili Ledo

³¹ Nanguli i Yesus ka pakeni ntoYahudi haitu, “Jadi lako ri ngana randua haitu, isemana nangoseaka dota ntuamana?” Nesana ira, “Ngana paratamana.” Nanguli i Yesus ka ira, “Nakana pesanamiu. Tapi pariaramo tesaKu hitu, tona nadaa eva topesingara balasitee bo bajinga-bajinga mokolu majadi todea riara Poparenta nu Alatala, ledo komiu.

Matius 21:31 ပူးပေါင်းရင်းမြစ်များ

Matius 12:50

Apa, isema-sema novia dota nTuamaKu ri suruga, ia haitumo nireke sampesuvuKu bo tinaKu.”

Matius 18:3

bo nanguli, “Pariaramo tesaKu hitu! Ane komiu ledo mombabali inggumiu bo majadi nasimbayu eva ngana kodi hitu, komiu ledo majadi todea riara Poparenta nu Alatala.

Matius 20:16

Bo i Yesus nompakaupu porapa haitu ante nanguli, “Ivesia muni bara maipiapa, tona naede panggana sii-sii majadi tona malanga panggana. Bo nadea muni tona nalanga panggana sii-sii majadi tona maede panggana.”

Matius 21:30

Hau vai tuamana nte anana karanduana bo niulikana, ‘Anaku, koimo iko mokarajaa ri talua.’ Tapi nesana ngana haitu, ‘Iyo, Tata. Hau yaku.’ Tano mai, ledo hau ia.”

Matius 5:18

Pariaramo tesaKu hitu! Ane da maria langi bo tana, ledo ria malipo sambelaa lako ri Atura-atura haitu, nau sangu hurupu atau santiti ledo ntoto. Kana madupa puramo.

Matius 5:46

Ane komiu aga mompotove tona nompotove komiu, natantumo komiu ledo masipato ratoiya nu Alatala. Apa nau topesingara balasitee nadaa ingguna, nompotove tona anu nompotove ira.

Matius 6:5

“Ane komiu mosambaya, nee moinggu eva tona aga nabelo ri sumba. Nipokonora neangga mosambaya riara banua-banua petupu bo ri tatanga nu dala ala rakita ntodea. Pariaramo tesaKu hitu! Nitarimaramo petoiya ntona bo haitumo tambo nu posambayara. Domo ria ntanina.

Matius 7:21

Ledo pura-pura tona nanguli Yaku Tupura majadi todea riara Poparenta nu Alatala. Aga tona anu novia dota nu Alatala, TuamaKu ri suruga, masipato mesua riarana.

Matius 9:9

Naupu haitu nalaimo i Yesus lako ri sia. Nolipa-lipamo Ia, nikitaNa saito topesingara balasitee nonturo riara kantoro ntopesingara balasitee. Sangana i Matius. Nanguli i Yesus ka ia, “Kaimo! Oseakamo Yaku!” Nangepe haitu neanggamo i Matius bo hau nangoseaka i Yesus.

Lukas 15:10

Ivesia muni malaeka-malaeka nu Alatala. Madamba mpuu rarara ane saito tona najea nokainggu nadaa.”

Lukas 19:22

Nesana madika ka batua haitu, ‘Iko tu batua nadaa! Tesamu mboto kupake mombatangara iko. Nisanimu Yaku nasoa, bo Yaku nangala anu ledo pomboliku bo Yaku nangala asele ri talua anu ledo potudaku.

Lukas 7:29

Tempo todea bo topesingara balasitee nangepe i Yesus notesaki i Yohanes, nipokonoramo nia nu Alatala bo ira madota radiu i Yohanes, tandana ira najea lako ri dosara.

Yohanes 3:3

Nesana i Yesus, “Pariaramo tesaKu hitu, ledo ria saitoa tona mamala majadi todea riara Poparenta nu Alatala ane ia ledo rapoanaka mpanjili.”

Yohanes 3:5

Nesana i Yesus, “Pariaramo tesaKu hitu; ane tona ledo rapoanaka ante uve bo ante kuasa Nosa Gasa nu Alatala, tona haitu ledo mamala majadi todea riara Poparenta nu Alatala.

Suro-Suro 17:30

Tempo nggaulu ane manusia nombasomba tupu-tupu ntanina, Alatala ledo nombahuku ira. NibotusiNa ledo rarekeNa kadoyora haitu. Tapi sii-sii, nituduNa pura-pura manusia ri umba-umba ri dunia majea lako ri dosara.

Roma 3:19

Jadi lako ri tesa ri Buku Gasa, nisanita ledo ria manusia nanoa. Nisanitamo pura-pura anu nitulisi riara Atura agama nambela ka toYahudi anu natundu ri Atura haitu. Jadi ledo ria saitoa tona namala manguli karona mboto nanoa. Pura-pura manusia masipato rapambela pehuku nu Alatala.

Roma 5:20

Atura agama nidekei nu Alatala ala mantambai kadea dosa nipovia nu manusia. Tapi nau dosa manusia nantambai kadeana, pepotove nu Alatala naogepa.

2 Petrus 3:9

Nadea tona nanguli i Pue nokalera nompakadupa pojanjiNa makava mpanjili ri dunia. Tapi Ia ledo nokalera. Ia dopa nakava sabana Ia nosabara nte komiu, Ia madota ala ledo maria saitoa tona rahuku sampe ri kasae-saena. DotaNa, ala pura-pura tona manggava loga majea lako ri dosara.