Matius 13:39 - Kaili Ledo

³⁹ Magau nu Seta nirapaka bali anu nokamburaka vua jono. Kaupu nu Dunia nirapaka tempo nokato bo malaeka-malaeka nu Alatala nirapaka topokato.

Matius 13:39 ပူးပေါင်းရင်းမြစ်များ

Matius 12:32

Isema-sema nombasalai Yaku, Ana nu Manusia mamala raampungi. Tapi isema-sema mombasalai Nosa Gasa nu Alatala, ledo ntoto raampungi, lako ri eo hitu sampe ri kasae-saena.

Matius 13:22

Savua nanavu ranggarui nirapaka tona nangepe Tesa nu Alatala bo niparasayara. Tapi ira aga nasesa nompekirika katuvura mboto riara dunia hitu, bo ira aga naino ka doi. Haitu pura-pura nangupi Tesa nu Alatala sampe ledo ria aselena riara nggatuvura.

Matius 13:25

Tapi naria sambongi tempo pura-pura tona naturumo, nakavamo balina nombakamburaka vua jono ri talua haitu pade nalaimo ia.

Matius 13:28

Nesanamo tupu ntalua, ‘Haitu pokarajaa nu baliku.’ Naupu haitu nanguli vaimo topokarajaa, ‘Tua, ane rapokonomiu, kami hau mombarebu jono haitu.’

Matius 13:40

Eva jono nipasiromu bo nipalabu riara apu, ivesia muni anu majadi ri Kaupu nu Dunia.

Matius 13:49

Ivesia muni majadi ri Kaupu nu Dunia. Malaeka-malaeka nTupu kana hau mombataniaka tona nadaa lako ri tona nanoa.

Matius 24:3

Naupu haitu hau ri Bulu Zaitunmo i Yesus. Tempo Ia da nonturo hamai, ana-anaguruNa nakava motesa nggalino nte Ia. Niulira, “Guru, uli ka kami, maipia majadi pura-pura anu nitesaMiu pangane, bo berimba tandana kakavaMiu bo kaupu nu dunia hitu?”

Matius 25:31

“Tempo Yaku, Ana nu Manusia makava mpanjili ri dunia ante reme bo kuasaKu, nosanggani-nggani ante malaeka-malaekaKu, Yaku monturo ri Gadera PoparentaKu mombatangara mpo Magau.

Matius 28:20

Patudukimo ira ala raoseakara pura-pura anu niparentaKu ka komiu. Bo toramo! Yaku bate-batena mosanggani-nggani ante komiu sampe ri kaupu dunia.”

1 Korintus 10:11

Haitu pura-pura najadi nte ira ala mompopatora ka tona ntanina. Bo kajadia-kajadia haitu nitulisi riara Buku Gasa ala majadi pepatora ka kita anu natuvu sii-sii ri tempo napara kaupu nu dunia.

2 Korintus 11:3

Tapi nakini mpuumo raraku, nee-nee raakalani ntona komiu sampe komiu domo ante raramiu mpuu-mpuu mompotove i Kristus. Apa ivesia najadi nte i Hawa anu niakalani nu ule tempo nggaulu.

2 Korintus 2:17

Nadea tona nompatolele Tesa nu Alatala ala mangelo untu ka karora mboto. Tapi ledo ivesia kami. Patuju kami nagasa bo tesa kami nakana, apa kami nisuro nu Alatala mompatolele TesaNa. Jadi kami notesa ante kuasa i Kristus bo Alatala nanggita povia kami haitu.

Efesus 2:2

Komiu natuvu nangoseaka kabiasa-kabiasa nu manusia ri dunia hitu, haitumo komiu nangoseaka dota nu Magau Seta, pakeni nu kuasa-kuasa nadaa ri laerava. Iamo nombakuasai rara ntai ntona anu ledo natundu nte Alatala.

Ibrani 1:2

Tapi ri tempo nggapuri hitu AnaNa mbotomo nompasimbayu tesaNa ka kita. AnaNa haitu nipopale nu Alatala nompajadi dunia, bo Alatala nompakatantu AnaNa haitumo masipato majadi tupuna pura-pura anu naria.

Ibrani 9:26

Apa ane rapana mpenggani-nggani Ia mesua, batuana mpenggani-nggani muni Ia kana mombarasai kasusa bo kapari nompamula lako ri lamba pamulana. Tapi kakanana, ri tempo sii-sii anu napara kaupu dunia Ia nakava aga sanggani nompakalali dosata ante nombadekei karoNa mboto nipatesi.

1 Petrus 5:8

Komiu kana mainga bo manoto rara, sabana balimiu, Magau nu Seta hau tumai nasimbayu mpo singa nongao-ngao nompengavu tona rasakana.

Yudas 1:14

I Henokh, muli kapitu-ntapina lako nte i Adam, nombaboto pehuku nu Alatala ka guru-guru mpodava gahaitu ivei: “Epemo! Tupu makava bara maipia ante monjobu-njobu malaekaNa

Pompakita 12:9

Jadi ule naga haitu nipopalai lako ri suruga bo nitedaka hau ri dunia nosanggani-nggani ante malaeka-malaeka anu nantulungi ia. Ia haitumo Ule Ntua anu nosanga Topangadu atau Magau nu Seta, anu nombabagiu manusia ri njumangu dunia.

Pompakita 13:14

Nipoviana tanda-tanda haitu ante kuasa nidekei nu binata pamulana ka ia ala mombabagiu tona nonturo ri dunia. Nituduna ira movia bo mompopeangga sangu pinoito nambaso nolenje mpo binata pamulana, anu nitimbe pakaoga tapi ledo namate.

Pompakita 19:20

Tapi binata nadaa nisaka sanggani ante nabi mpodava bo ira randua nitedaka nggatuvu riara ntasi apu anu navaya ante vatu-vatu colonggata navaya. Nabi mpodava haitumo novia tanda-tanda nipokumaaka ante kuasa nidekei nu binata nadaa ka ia. Ante tanda-tanda nipokumaaka, ia nombabagiu tona nimere ante tanda nu binata nadaa bo tona nombasomba pinoitona.