Markus 16:9 - Kaili Ledo

⁹ [Eo Aka mpadondona, naliu i Yesus natuvu mpanjili lako ri kamateNa, nipopakitaNamo karoNa ka i Maria Magdalena. I Maria haitumo mombine anu nikabasaka i Yesus lako ri kuasa nu seta papitu bara ipia.

Markus 16:9 ပူးပေါင်းရင်းမြစ်များ

Matius 27:56

Saito nosanga i Maria Magdalena. Saitopa nosanga i Maria, tina i Yakobus bo i Yusuf. Saitopa berei i Zebedeus.

Markus 15:40

Naria muni bara sako-ndua mombine neangga nompeintaka nggavao. Ri tatangara muni naria i Maria Magdalena, i Maria tina i Yoses bo i Yakobus muda. Bo naria muni i Salome.

Markus 15:47

Tempo haitu i Maria Magdalena bo i Maria tina Yoses nanggita ponturo nipombaboli karobata i Yesus.

Markus 16:8

Jadi nesuvumo ira lako ri dayo bo nangova nalai, sabana natekaja bo naeka mpuumo rarara. Ira ledo notesa nuapa-nuapa ka isema-sema sabana naeka. [Mombine gahaitu hau nte i Petrus bo roa-roana, bo kaliu-liu nitesara pura-pura anu niuli nu kabilasa haitu ka ira. Naupu sia i Yesus nantudu anaguruNa hau ri umba-umba ri dunia lako ri mpanauna sampe ri mpandakena mompatolele Kareba lako nte Alatala anu notesaki katuvua nabelo sampe ri kasae-saena. Kareba haitu nagasa bo ledo nabali-bali sampe ri kasae-saena.]

Lukas 24:10

Mombine pangane iamo: i Maria Magdalena, i Yohana, i Maria tina Yakobus, ante mombine-mombine ntanina. Nitesara pura-pura anu najadi pangane ka anaguruNa,

Lukas 8:2

bo naria muni bara sako-ndua mombine nomporoa ira. Mombine gahaitu nipakabelo i Yesus lako ri duara bo seta-seta nipopalaiNa lako ri karora. Saito roara nosanga i Maria Magdalena. Naria papitu seta nipopalai i Yesus lako ri karona bara ipia.

Yohanes 20:12

Ri sia nikitana randua malaeka nobaju nabula mpuu nonturo ri bela pomboli karobata i Yesus. Saito nonturo ri bela nu balenggaNa bo saito ri bela nu kadaNa.

Suro-Suro 20:7

Bongi Aka, kami nasiromu nangande nosanggani-nggani ante topomparasaya ri ngata Troas. I Paulus notesa sampe tanga bongi, apa patujuna maile mpadondona mompapola polipana.

1 Korintus 16:2

Haitumo, ri eo-eo Aka saito-saito komiu simbo kana mompatani sabagia lako ri doi panggavamiu nangoseaka kadea nu asele nikavamiu. Bo doi haitu kana rabolimiu sampe yaku tou nte komiu. Nee damo makava yaku ri situ pade rapasiromumiu doi haitu.

Pompakita 1:10

Ri eo petupu yaku nikuasai Nosa Gasa nu Alatala, bo niepeku suara lako ri puriku namangga mpo moni ntabue.