Kolose 1:10 - Kaili Ledo

¹⁰ Ane rasanimiu dota nu Alatala ka komiu, mamala komiu matuvu ante pokainggu masipato ka topomparasaya i Pue, bo pura-pura inggumiu mompakadamba raraNa. Komiu mompakule movia mpengaya-ngaya anu nabelo, bo posisanimiu ante Alatala mantambai munimo.

Kolose 1:10 ပူးပေါင်းရင်းမြစ်များ

Yohanes 15:16

Ledo komiu nompelisi Yaku, tapi Yaku nompelisi komiu bo nombatudu komiu hau movua madea, haitumo vua anu ledo maupu-upu. Ane komiu movua ivesia, nuapa-nuapa raperapimiu lako nte TuamaKu sabana komiu topangoseaka Yaku, kana radekeiNa ka komiu.

Yohanes 15:8

Ane komiu movua madea, natantu komiu mpuu-mpuu anaguruKu. Bo poviamiu haitu mompopakita kaoge nTuamaKu ka tona.

Yohanes 17:3

Iveimo sampe manusia matuvu mabelo sampe ri kasae-saena: ira mosisani nte Komiu, Alatala aga saito-itoMiu nakana, bo ira mosisani muni ante Yaku, i Yesus Kristus, anu nituduMiu.

Roma 1:13

Sampesuvu-sampesuvu, kana rasanimiu nadea ngganimo yaku nonia tou mosinggava nte komiu tapi nasaro natelava sampe sii-sii. Patujuku mosinggava nte komiu ala madea komiu mangoseaka i Pue Yesus nasimbayu mpo anu najadi nte tona ledo toYahudi ri ngata ntanina.

Roma 4:12

Bo i Abraham muni rapotuama ntoYahudi, haitumo ira anu ledo aga nangoseaka ada posuna tapi nangoseaka jonjo pomparasaya i Abraham dopame ia nisuna.

Roma 6:4

Jadi tempo kita nidiu, mamala raulita kitamo anu namate bo nitana nosanggani-nggani ante i Kristus. Haitu najadi ala kita matuvu ante pokainggu nabaru, nasimbayu mpo i Kristus nipakatuvu mpanjili lako ri kamateNa ante kuasa nTuamata Alatala anu naoge.

2 Korintus 2:14

Yaku nosukuru nte Alatala! Ia batena nanggeniaka kami nosanggani-nggani nte Ia bo nitulungiNa kami najadi padagi sabana kami nosangu rara ante i Kristus. NitulungiNa kami nompatolele Kareba Belo i Kristus ri umba-umba ala pura-pura tona mangepena bo mosisani nte Alatala. Bo Kareba haitu nasimbayu mpo soa navangi nasilele nienga ri umba-umba.

2 Korintus 4:6

Tempo Alatala nompajadi dunia niuliNa, “Lako ri kalandana meumbamo reme!” Ivesia muni nipakaremeNa pekirita ala pekirita majadi manoto bo rasanita kaogeNa. ToIsrael nggaulu nanggita kaoge nu Alatala nenggila ri lenje i Musa. Ivesia muni rasanita kaoge nu Alatala ane raposisanita i Kristus.

2 Korintus 5:9

Jadi kami nompasimbuku mompakadamba raraNa, nau kami da natuvu ri dunia, nau kami mompalaisi dunia hitu.

2 Korintus 9:8

Alatala nakuasa mombadekei belo ka komiu sampe komiu bate-batena ledo makura nuapa-nuapa. Bo belo haitu melabipa kaganana sampe komiu mamala movia mpengaya-ngaya anu nabelo mombatulungi tona ntanina.

Efesus 1:17

Yaku nekakai nte Tuamata Alatala anu nakuasa bo naoge, anu nisomba nTuputa Yesus Kristus. Yaku nerapi ala Ia mombadekei Nosa GasaNa ka komiu. Bo Nosa Gasa mompakanoto raramiu bo mompopaisani Alatala ka komiu sampe komiu mpuu-mpuu mosisani belo ante Alatala.

Efesus 2:10

Kita hii nipajadi nu Alatala manusia nabaru anu nosangu rara nte i Yesus Kristus. Patuju nu Alatala novia ivehaitu ala kita mompakule mokainggu mabelo, mpo nipakatantuNa mami ka kita lako ri nggauluname.

Efesus 4:1

Jadi sampesuvu-sampesuvu, sabana haitu pura-pura, siimo petevai lako nte yaku anu nitarunggu ri sii sabana pomparasayaku i Pue Yesus. Yaku mpuu-mpuu nerapi ala komiu matuvu ante pokainggu masipato ka todea nu Alatala, apa komiu nipokioNa majadi todeaNa.

Efesus 4:13

sampe kaupuna kita pura-pura mpuu-mpuu mosangu rara sabana kita nomparasaya Ana nu Alatala bo mpuu-mpuu nosisani nte Ia. Bo kita pura-pura mantambai manoto, bo pomparasayata mantambai maroso sampe domo makura nuapa-nuapa. Bo kita majadi nasimbayu mpo i Kristus mboto, nanoto bo naroso.

Efesus 5:10

Pasimbukumo ala rasanimiu pokainggu nipokono nu Alatala.

Efesus 5:15

Sabana haitu, pekiri pakabelo katuvumiu; nee matuvu mpo tona nadoyo, tapi komiu kana matuvu mpo tona nanoto.

Efesus 5:2

Bo komiu kana matuvu mompotove roa, nasimbayu mpo i Kristus nompotove kita. Lako ri toveNa haitu, nidekeiNa karoNa nipatesi ala mombatolosi kita. PoviaNa haitu nompakadamba rara nu Alatala nasimbayu mpo pesomba navangi nisomba ka Ia.

Filipi 1:11

Bo pokainggumiu mpuu-mpuu majadi mabelo bo manoa sabana pokarajaa i Yesus Kristus riara nggatuvumiu, sampe madea mpuu tona mombabila bo mompakaoge Alatala.

Filipi 1:27

Jadi, nau bara nuapa majadi nte yaku, komiu kana matuvu ante pokainggu masipato ka topangoseaka Kareba Belo i Kristus. Komiu kana matuvu ivesia ala nau kita mosinggava atau ledo, kuepe karebana komiu naroo nosangu rara bo nosangu pekiri bo singgani-nggani nompasimbuku nokarajaa ala madea tona momparasaya Alatala nangoseaka anu niuli riara Kareba Belo.

Filipi 4:18

Jadi, ala rasanimiu, nitarimaku puramo pedekei nipakatumiu, bo nelabi-labi! Pura-pura pedekei nipakatumiu nitarimakumo lako nte i Epafroditus. Sii-sii nagana puramo anu niparaluuku. Pedekeimiu haitu nasimbayu mpo pesomba navangi, anu nitarima nu Alatala bo nipodamba raraNa.

Kolose 2:19

Tona haitu domo nanjarumaka i Kristus. Tano mai, i Kristusmo nirapaka Balengga ntopomparasaya, bo kita anu nomparasaya nirapaka karoNa. I Kristusmo nompiara karoNa bo nompopakasangu todeaNa nasimbayu mpo uva bo oyu nipasiumpu bo nompoposidumpa buku-buku majadi sangu karo. Jadi Iamo nanggeniaka karoNa, haitumo todeaNa, nantambai naroso, nangoseaka dota nu Alatala.

Kolose 2:6

Sampesuvu-sampesuvu, nitarimamiumo i Yesus Kristus najadi Tupumiu. Jadi komiu kana batena matuvu mosangu rara ante Ia.

Kolose 3:20

Ngana-ngana, oseakamo pura-pura parenta tina tuamamiu sabana pokainggu haitumo nompakadamba rara nu Alatala.

Kolose 4:5

Komiu kana mokainggu manoto ante tona dopa nomparasaya i Kristus. Pakemo pura-pura loga naria mompopaisani i Kristus ka ira.

1 Tesalonika 4:1

Kaupuna, sampesuvu-sampesuvu: bara ipia kami nompatuduki ka komiu pokainggu masipato rapoviamiu ala madamba rara nu Alatala. Bo nisaniku nipoviamiumo anu nipatuduki kami. Tapi kami merapi nte mpuu-mpuu rara bo mompopatora komiu ante kuasa nidekei i Pue Yesus ka kami: pasimbukumo hanupa matuvu nte pokainggu mompakadamba Alatala!

2 Timotius 2:4

Apa tantara nabelo ledo notingguka bago ntanina tempo ia nombatui bagona niparasayaka ia. Apa ia madota mompakadamba rara nu tadulakona.

Titus 3:1

Popatoramo topomparasaya i Yesus ri situ, ira masipato matundu bo mangoseaka parenta nu pomarenta bo totua-totua ngata. Ira kana masadia mantui pura-pura pokarajaa nabelo.

Titus 3:14

Sampesuvuta sampomparasaya kana masaro movia anu nabelo, ala mamala mombatulungi tona napepa. Nee sampe katuvura ledo maria gunana.

Ibrani 11:5

Lako ri pomparasaya i Henokh, ia ledo namate tapi nioretaka nu Alatala lako ri dunia hitu. Ia nielo-elo tapi ledo ria nikava ntona sabana ia niore nu Alatala lako ri dunia hitu. Naria tesa ri Buku Gasa nompakalanto dopame i Henokh niore, katuvuna nipodamba nu Alatala.

Ibrani 13:16

Bo nee rakalingasita mositulungi bo movia anu nabelo, sabana haitu muni nireke pesombata anu nompakadamba rara nu Alatala.

2 Petrus 1:8

Ane komiu noinggu ivehaitu bo mantambaipa, posisanimiu ante Tuputa Yesus Kristus mpuu-mpuu maria gunana, bo maria asele mabelo riara nggatuvumiu.

2 Petrus 3:18

Tapi komiu kana mantambai mosisani belo ante Tuputa Yesus Kristus, Topepakasalama, bo mantambai mombarasai kabelo raraNa riara nggatuvumiu. Iamo masipato ratoiyata bo rabilata, sii-sii bo sampe ri kasae-saena. Amin. Tabe lako nte yaku, Petrus

1 Yohanes 3:22

Bo nuapa-nuapa raperapita nte Ia, natantu radekeiNa ka kita, sabana kita nanturusi parenta-parentaNa bo pokaingguta nompakadamba raraNa.

1 Yohanes 5:20

Nisanita muni i Yesus, Ana nu Alatala, nakava ri dunia hitu mompakanoto rarata ala kita mamala mosisani belo ante Alatala anu nakana. Kita natuvu nosangu rara nte Alatala anu nakana sabana kita natuvu nosangu rara nte AnaNa, i Yesus. Iamo Alatala anu nakana bo Iamo nombadekei katuvua nabelo sampe ri kasae-saena.

3 Yohanes 1:6

Riara podade kami ri sii, nitesara kabelo nu raramu nantulungi ira. Jadi kuperapi, ane mesai vai ira nte iko, tulungimo ira mompapola polipara, ala madamba rara nu Alatala.