Ibrani 7:28 - Kaili Ledo

²⁸ Nangoseaka Atura-atura agama Yahudi, tona nalente bo nadosa nianggataka najadi Pakeni nTopanggeni Pesomba, apa ira aga manusia biasa. Tapi naliu Atura-atura haitu, Alatala nojanji ante sumpa, bo nangoseaka pojanji haitu, nianggatakaNa AnaNa mboto majadi Pakeni nTopanggeni Pesomba. Bo AnaNa haitu nipajadi Topetolo anu ledo nakura nuapa-nuapa sampe ri kasae-saena.

Ibrani 7:28 ပူးပေါင်းရင်းမြစ်များ

Lukas 13:32

Tapi nesana i Yesus, “Koi ulika topeakalani haitu ivei: ‘Eo hitu bo maile Yaku da mompopalai seta-seta, bo mompakabelo tona nadua. Maipua pade Kupakaupu pokarajaaKu.

Yohanes 19:30

Naupu i Yesus nompetami uve anggur napoi haitu niuliNamo, “Naupu puramo.” Naupu haitu notunggamo Ia bo naponjimo.

Ibrani 1:2

Tapi ri tempo nggapuri hitu AnaNa mbotomo nompasimbayu tesaNa ka kita. AnaNa haitu nipopale nu Alatala nompajadi dunia, bo Alatala nompakatantu AnaNa haitumo masipato majadi tupuna pura-pura anu naria.

Ibrani 2:10

Alatalamo anu nompajadi mpengaya-ngaya bo mpengaya-ngaya haitu nipajadiNa nangoseaka dotaNa mboto. PatujuNa ala madea tona majadi ana-anaNa bo manggava bagia ri kaogeNa. Haitumo sampe masipato nipalambaNa i Yesus nombarasai kasusa bo kapari ala i Yesus majadi Topepakasalama anu ledo nakura nuapa-nuapa, anu nobuka dala ala manusia namala rapakasalama.

Ibrani 2:17

Haitu sampe Ia kana najadi nasimbayu ntoto ante kita sampesuvu-sampesuvuNa. Ane Ia nasimbayu ntoto nte kita, Ia namala majadi Pakeni nTopanggeni Pesomba anu naasi mataNa nanggita todeaNa bo natutu nombatui pokarajaa nidekei nu Alatala ka Ia, sampe dosa manusia namala nisompo.

Ibrani 3:1

Jadi, sampesuvu-sampesuvuku anu nipelisi nu Alatala bo nipokioNa matuvu mabelo ri suruga. Pekirimo pakabelo-belo i Yesus hitu. Ia nisuro nu Alatala najadi Pakeni nTopanggeni Pesomba ri agama nioseakata.

Ibrani 3:6

Tapi i Kristus ledo aga potudua, Ia Ana nu Alatala mami anu natutu nompasiayu pura-pura todea nTuamaNa. Bo kitamo nireke todea nu Alatala asaa kita naroo nomparasaya bo ledo nolengga-lengga nanjarumaka i Yesus ante damba rara sampe ri kaupuna.

Ibrani 4:14

Jadi nariamo Pakeni nTopanggeni Pesomba anu naoge mpuu, Iamo i Yesus, Ana nu Alatala. Ia noliu ri langi bo nesua ri suruga ri ngayo nu Alatala ala mantulungi kita. Jadi kita kana maroo momparasaya bo nee menonto mangaku i Yesusmo Tuputa.

Ibrani 5:5

Ivesia muni i Kristus. Ledo nianggatakaNa mboto karoNa majadi Pakeni nTopanggeni Pesomba anu nibila. Tapi Ia nipelisi bo nianggataka nu Alatala. Alatala nanguli ivei: “Ikomo AnaKu, apa eo hitu Yaku najadi TuamaMu.” Mazmur 2:7

Ibrani 7:21

Tapi tempo i Yesus nianggatakaNa, Ia nosumpa. NiuliNa ka i Yesus ivei: “Yaku nosumpa bo ledo ntoto mabali pekiriKu, Iko topanggeni pesomba sampe ri kasae-saena.” Mazmur 110:4

Ibrani 7:24

Tapi i Yesus batena natuvu. Haitu sampe Ia batena nokarajaa mpo topanggeni pesomba. PokarajaaNa ledo nolinja nte tona ntanina.

Ibrani 7:3

I Melkisedek ledo notina, ledo notuama, ledo nisani totuana. Katuvuna ledo ria pamulana bo ledo muni naria kaupuna. Ia nasimbayu mpo Ana nu Alatala, bo ia bate-batena topanggeni pesomba sampe ri kasae-saena.