Ibrani 12:3 - Kaili Ledo

³ Pekirikamo kasusa nirasai i Yesus. Ia nieva ntona nadosa anu mpuu-mpuu navuu matara nte Ia. Pekirikamo Ia ala ledo masau raramiu bo ledo maupu raramiu momparasaya.

Ibrani 12:3 ပူးပေါင်းရင်းမြစ်များ

Matius 11:19

Yaku, Ana nu Manusia nakava nangande bo nanginu uve anggur eva tona biasa, tapi niuli ntona, ‘Peintamo tona haitu! Nadoko, nalangu, vega ntopesingara balasitee bo vega ntodosa!’ Tapi nau ivesia, nisanita kanoto nia nu Alatala sabana aselena nikita ri pokainggu ntopangoseaka Ia.”

Matius 12:24

Tapi tempo toFarisi nangepe tesa ntodea haitu, nesana ira, “Bai! Kuasa ntona haitu lako nte i Beelzebul, Magau nu Seta. Haitu sampe Ia nakuasa nompopalai seta-seta.”

Matius 15:2

“Nakuya anaguruMiu nombaliunaka ada-ada ntotuata nggaulu? Tempo nangande, ira ledo nemanjo ntani ruru nangoseaka ada-adata!”

Matius 21:23

I Yesus nesua riara doyata Banua nu Alatala bo nompaguru. Da ranja nompaguru Ia, nakavamo balengga-balengga ntopanggeni pesomba bo totua-totua ntoYahudi. Ira madota mangelo saba, jadi nipekutanara nte i Yesus, “Ante kuasa nuapa nipoviaMiu pura-pura haitu ri Banua nu Alatala? Isema nombadekei kuasa haitu ka Komiu?”

Matius 21:46

Jadi nipasimbukura mombasaka i Yesus. Tapi naeka ira magado todea apa nangoseaka panggava ntodea i Yesus haitu nabi.

Matius 22:15

Naupu haitu bara sako-ndua toFarisi nasiromu notesaki anu rapoviara ala mamala raopara i Yesus motesa.

Lukas 14:1

Naria saeo ri eo penonto, i Yesus hau nangande ri banua pakeni ntoFarisi. Tona ri sia nompariara nuapa rapovia i Yesus.

Lukas 15:2

Nanggita haitu, toFarisi bo guru agama nongau. “Hm! Ledo nabelo tona hitu! Ia nosimporoa ante tona nadaa bo nangande singgani nte ira!”

Lukas 16:14

ToFarisi nangepe pura-pura anu nitesa i Yesus pangane, aga nipongirikara i Yesus sabana ira topompotove doi.

Lukas 2:34

I Simeon nosambaya merapi Alatala mombadekei belo ka ira. Niulikana i Maria, tina nu Ngana haitu, “Ngana hitu mpuu-mpuu nipelisi nu Alatala ala madea toIsrael manavu sabana Ia, tapi madea toIsrael ntanina rapakasalamaNa. Ia majadi tanda lako nte Alatala tapi madea tona mangeva Ia.

Lukas 5:21

Nangepe haitu guru agama bo toFarisi ri sia nompekiri, “Isema ntoto tona hitu sampe nabia nompasimbayu karoNa nte Alatala! Ledo ria manusia nompakule mombaampungi dosa manusia, aga Alatala!”

Yohanes 10:20

Nadea ira nanguli, “Ia haitu nipesua nu seta! Nagila ntotomo Ia! Rapokuya raepeta tesaNa?”

Yohanes 18:22

Tempo i Yesus notesa ivesia, naria saito topojaga Banua nu Alatala neangga napara i Yesus. Nisapana lenje i Yesus, bo niulina, “Ledo nabelo Iko nesana ivesia ka Pakeni nTopanggeni Pesomba!”

Yohanes 5:16

Jadi nompamula lako ri kabelo ntona haitu, nieloramo dala mompandasa i Yesus, sabana nipakabeloNa tona nadua ri eo penonto.

Yohanes 7:12

Ri tatanga ntodea nadeamo tona nosikalivaya nanguli i Yesus. Naria sanu nanguli, “Ia tona nabelo.” Tapi naria muni sanu nanguli, “Ledo! Ia nombabagiu todea!”

Yohanes 8:13

Nesana toFarisi, “Aga tesaMu mboto tu! Jadi ledo nakana.”

Yohanes 8:52

Nangepe haitu nanguli toYahudi ka i Yesus, “Hitupa nisani kamimo nipesua nu seta mpuumo Iko! I Abraham bo nabi-nabi nggaulu namate puramo. Tapi panguliMu, isema-sema nangoseaka tesaMu ledo mamate sampe ri kasae-saena!

Yohanes 8:59

Nangepe tesa i Yesus haitu, nangala vatumo toYahudi mombarempe Ia. Tapi Ia netinggalipo lako ri tatangara bo nalai lako ri Banua nu Alatala haitu.

Yohanes 9:40

Naria bara sako-ndua toFarisi neangga ri sia bo niepera i Yesus nanguli ivesia, nekutanamo ira, “NisarumakaMu kami hii naburo muni?”

1 Korintus 15:58

Jadi sampesuvu-sampesuvu nipotoveku, pakaroso pomparasayamiu bo nee molengga-lengga. Pasimbuku ante mpuu-mpuu raramiu mantui pokarajaa nidekei i Pue Yesus ka komiu, apa nisanimiu ledo ria nuapa-nuapa anu ledo ria gunana rapoviamiu ka Ia. Natantu kana maria aselena.

2 Korintus 4:1

Jadi ledo naupu rara kami nompatolele Kareba Belo sabana pokarajaa hitu niparasaya nu Alatala ka kami lako ri kabelo raraNa.

2 Korintus 4:16

Jadi haitu sampe ledo naupu rara kami. Nau karo kami nantambai kalentena, tapi eo-eo rara kami nantambai karosona.

Galatia 6:9

Sabana haitu, nee mabasa rarata movia anu nabelo, sabana ane ledo maupu rarata movia anu nabelo, makava tempona ratarimata aselena.

2 Tesalonika 3:13

Tapi komiu sampesuvu-sampesuvu, nee masau raramiu movia anu nabelo.

Ibrani 12:2

Kita kana mangova mompetoto i Yesus, sabana Iamo nanggeni kita nomparasaya bo Iamo nompopompakule kita bate-batena momparasaya sampe ri kaupuna. I Yesus nombatidamaka kasusa bo kapari tempo nipaku ri kayu salib. Ri mata ntodea, namate ri kayu salib nepakaeya. Tapi ledo nipekirikaNa eyaNa, sabana nitoraNa kadamba nipakasadia ka Ia. Bo sii-sii Ia nonturo ri gadera magau ri panggana nu Alatala.

Ibrani 12:5

Nee rakalingasimiu tesa lako ri Buku Gasa anu nompangajari kita, nasimbayu mpo totua nompangajari ngana-ngana, ivei: “Anaku, nee rasapuaka pepatuduki nTupu. Nee maupu raramu ane raonteakaNa iko.

Ibrani 3:1

Jadi, sampesuvu-sampesuvuku anu nipelisi nu Alatala bo nipokioNa matuvu mabelo ri suruga. Pekirimo pakabelo-belo i Yesus hitu. Ia nisuro nu Alatala najadi Pakeni nTopanggeni Pesomba ri agama nioseakata.

1 Petrus 2:23

Tempo Ia nisalai ntona, ledo nibalasiNa. Tempo Ia nipandasa, Ia ledo nesava. Tapi Ia aga nanjarumaka Alatala, Topotangara nanoa anu manjaliku Ia.

Pompakita 2:3

Komiu mpuu-mpuu nosabara. Komiu nipandasa ntona sabana pomparasayamiu, bo ledo naupu raramiu nangoseaka Yaku.