Galatia 5:10 - Kaili Ledo

¹⁰ Tapi kita nosangu rara ante i Pue. Jadi niparasayaku komiu ledo mangoseaka pepatuduki nasala. Bo niparasayaku tona nompakagado pekirimiu ri situ kana rapambela pehuku nu Alatala, nau damo isema ia.

Galatia 5:10 ပူးပေါင်းရင်းမြစ်များ

Suro-Suro 15:24

Niepe kami naria bara sako-ndua tona lako nte kami tou nte komiu nompakasusa bo nompakaingu komiu ante pepatudukira. Tapi kakanana ledo nitudu kami ira movia ivesia.

1 Korintus 5:5

kutudu komiu mombadekei tona haitu riara kuasa Magau nu Seta. Povia ivesia ala karona rahuku bo kaupuna nyawana rapakasalama tempo i Yesus makava mpanjili ri dunia.

2 Korintus 1:15

Nisaniku komiu mpuu-mpuu nadamba nompekirika yaku. Haitu sampe yaku nonia ronggani mesai nte komiu, ala komiu mamala mantarima belo ronggani kadeana lako nte yaku. Patujuku mesai mompelioda komiu ntani ruru pade mapola hau ri propinsi Makedonia. Bo tempo manjili lako ri Makedonia pade mesai vai mompelioda komiu ala komiu mamala mantulungi yaku mompapola polipaku hau ri bagia Yudea.

2 Korintus 10:2

yaku mpuu-mpuu merapi: nee sampe da maria komiu manjauru kuasaku najadi suro i Yesus, ala ledo paraluu yaku marau tempo yaku makava ri situ nte komiu. Apa nasadia mami yaku mangonteaka tona nanguli kami nokainggu mpo tona ledo nosisani nte Alatala.

2 Korintus 10:6

Jadi ane rakita kami komiu pura-pura mpuu-mpuu natundu nte i Kristus, masadiamo kami mombahuku tona ntanina anu ledo natundu.

2 Korintus 13:10

Haitu sampe nitulisiku sura hitu ka komiu dopame yaku tou, ala ane makava ri situ nte komiu yaku, ledo paraluu makasara yaku mompakabelo pokainggumiu ante kuasa nidekei nTupu ka yaku. Apa kuasa haitu nidekeiNa ka yaku ala mompakaroso komiu, ledo ala mompakagero komiu.

2 Korintus 2:3

Bo haitumo patujuku notulisi sura ka komiu bara ipia. Apa ledaku tou ane aga masusa raraku manggita pokainggumiu. Kakanana komiu masipato mompakadamba raraku. Bo ane madamba yaku, tantu komiu muni madamba.

2 Korintus 2:6

Deanapa komiu ri Korintus nombahuku ia. Jadi hitupa kuuli ka komiu naganamo pehuku nipambelamiu ka ia.

2 Korintus 5:16

Jadi haitumo sabana kami domo nombareke tona bara nabelo bara nadaa nangoseaka pekiri manusia. Bara ipia ivesia mami kami nombareke i Kristus, tapi hitupa domo.

2 Korintus 7:16

Nadamba mpuu raraku sabana komiu namala niparasaya riara mpengaya-ngaya.

2 Korintus 8:22

Nitudu kami munimo saitopa sampesuvu ntanina mosangganika gi Titus. Nadea ngganimo nipopakitana kaoge nu rarana mantulungi tona ntanina. Bo sii-sii naoge mpuu rarana mantulungi komiu mompasiayu pompasiromu doi petulungi haitu, sabana ia mpuu-mpuu nanjarumaka komiu muni madota mombatulungi tona napakasi.

Galatia 1:7

Kakanana ledo ria “kareba belo” ntanina, aga Kareba Belo nipatolele kami ka komiu. Tapi naria tona nompakagado pekirimiu ante pepatudukira nasala. Patujura aga mombabaliki Kareba Belo anu nantesaki i Kristus.

Galatia 2:4

Tapi naria tona ntanina madota mompasuu i Titus rasuna, nangoseaka atura agama Yahudi. Panguli ntona haitu, ira topomparasaya i Kristus, tano aga davara. Ira nesua nggalino-lino ri kasiromu kami bo nomata-matai kami. Patujura ala pura-pura topomparasaya matundu nte atura-atura agama Yahudi. Tapi kita ledo paraluu matundu nte atura-atura haitu ala majadi manoa ri panggita nu Alatala. Kita nikabasaka lako ri atura haitu sabana kita nosangu rara ante i Yesus Kristus.

Galatia 2:6

Jadi pakeni-pakeni ntodea topomparasaya anu nireke nalanga nturora nasituju ante Kareba Belo nipatoleleku. (Nau nalanga panggana nau ledo, nasimbayu ri panggitaku, sabana Alatala ledo nompelenje.) Ledo ria nuapa-nuapa nitambaira ka Kareba haitu.

Galatia 3:1

Nadoyo mpuu komiu toGalatia! Isema nanjalipuyo komiu sampe komiu domo nadota nangoseaka pepatuduki nakana? Nipakalantoku mpuu nanguli ka komiu bara ipia patuju kamate i Yesus Kristus ri kayu salib.

Galatia 4:11

Nakini mpuu raraku, nee-nee ledo maria gunana katiti nu iniku nompatuduki Kareba Belo ka komiu bara ipia!

Galatia 4:17

Tona ntanina ri situ nompasimbuku mpuu-mpuu mangala raramiu, tapi patujura ledo nabelo. Ira aga madota mompopogaa kita ala komiu mangoseaka ira ante raramiu mpuu-mpuu.

Galatia 4:20

Nalentora mpuu raraku mosanggani-nggani nte komiu sii-sii, ala raepemiu tesaku bo rasanimiu pombarasaiku, sabana nasudumo raraku nompekirika komiu!

Galatia 5:12

Aginamo topompakagado pomparasayamiu haitu ledo aga nombasuna karora mboto, aginamo ira mombatindi karora mboto!

Galatia 5:7

Bara ipia nioseakamiu nabelo Kareba Belo. Jadi nakuya hitupa komiu domo nadota nangoseaka pepatuduki nakana? Isema nombalava komiu?

Galatia 6:17

Jadi kaupuna, tumo mompakasusa yaku, sabana bela-bela ri karoku najadi tanda yaku mpuu-mpuu batua i Yesus Kristus.

Filipi 3:15

Jadi, kita toroso nomparasaya kana mosangu pekiri mompasimbuku mangoseaka i Kristus evamo niuliku pangane. Tapi ane maria pekirimiu da nosisala nte pekiriku, damo Alatala mboto mompakanoto raramiu.

2 Tesalonika 3:4

I Pue Yesusmo nanggeniaka komiu, jadi nisani kamimo anu nipatuduki kami ka komiu, nioseakamiu sii-sii bo bate-batena raoseakamiu.

1 Timotius 1:20

evamo i Himeneus bo i Aleksander. Nidekeikumo ira randua riara kuasa Magau nu Seta ala rahuku, ala domo rasalaira Alatala.

Filemon 1:21

Yaku notulisi sura hitu ka iko sabana nisaniku iko movia anu niperapiku hitu. Bo ledo aga haitu, nisaniku iko movia melabipa pade anu niperapiku.