Galatia 1:4 - Kaili Ledo

⁴ I Yesus nombadekei karoNa rapatesi mombasompo dosata nangoseaka dota nTuamata Alatala. PatujuNa ala Ia mamala mombakabasaka kita lako ri kuasa nu dunia nadaa.

Galatia 1:4 ပူးပေါင်းရင်းမြစ်များ

Matius 13:22

Savua nanavu ranggarui nirapaka tona nangepe Tesa nu Alatala bo niparasayara. Tapi ira aga nasesa nompekirika katuvura mboto riara dunia hitu, bo ira aga naino ka doi. Haitu pura-pura nangupi Tesa nu Alatala sampe ledo ria aselena riara nggatuvura.

Matius 20:28

masimbayu eva Yaku, Ana nu Manusia. Yaku ledo nakava ri dunia hitu ala ratande ntona, tapi ala mombatulungi tona, bo mombadekei karoKu rapatesi mantolo dosa ntona dea.”

Matius 26:28

sabana hitumo raaKu rapatiti ka todea ngena ala mompakaasa Pojanji nu Alatala nabaru. RaaKu hitu rapatiti ka todea ala dosa-dosara raampungi.

Matius 26:42

Naupu haitu, hau vaimo i Yesus saitoNa nosambaya. NiuliNa, “Tata, ane peparajea hitu ledo mamala raala lako nte Yaku, palambamo, damo dotaMiu majadi.”

Matius 6:9

Jadi posambaya ivei: Alatala, Tuama kami ri suruga, Aga Komiu masipato rapetupu bo rapakaoge. Komiumo Magau kami.

Markus 10:45

Sabana nau Yaku, Ana nu Manusia, ledo nakava ratande ntona tapi ala mantulungi tona bo mombadekei karoKu rapatesi mantolo dosa ntodea.>>

Lukas 22:19

Naupu sia, niala i Yesus munimo roti. Naupu niuliNa tarima kasi nte Alatala, nitubi-tubiNa roti haitu bo nibagiNa ka ira bo niuliNa, “Roti hitu karoKu Kudekei mombatolosi komiu. Kandemo roti hitu rapombatora Yaku.”

Lukas 22:42

“Tata, ane rapodotaMiu, lelakasimo peparajea hitu anu rapambela ka Yaku. Tapi nee dotaKu majadi, tapi dotaMiu majadi.”

Yohanes 10:11

“Yakumo hii topoevu nabelo. Yaku nasadia mamate ala bimbaKu matuvu.

Yohanes 12:31

Sii-sii nakavamo tempona dosa nu manusia ri dunia ratangara. Sii-sii temponamo Magau nu Seta anu nakuasa ri dunia, radagi.

Yohanes 5:30

Bo nanguli munimo i Yesus ka pakeni-pakeni ntoYahudi, “Yaku ledo namala novia nuapa-nuapa nangoseaka dotaKu mboto. Yaku nombatangara nangoseaka anu niepeKu lako nte TuamaKu. PotangaraKu nanoa apa Yaku ledo nangoseaka dotaKu mboto tapi aga dota nTuamaKu anu nombatudu Yaku.

Yohanes 6:38

Apa Yaku nanau lako ri suruga, ledo movia dotaKu mboto, tapi movia anu nipodota nu Alatala anu nantudu Yaku.

Roma 1:7

Jadi siamo sampe nitulisiku sura hitu ka komiu pura-pura ri ngata Roma, komiu anu nipotove nu Alatala bo nipokioNa majadi todeaNa. Kuperapi Tuamata Alatala bo i Pue Yesus Kristus mombadekei belo ka komiu bo mompakatinonto raramiu.

Roma 12:2

Domo rapasialamiu kabiasa ntona ledo nosisani nte Alatala. Dekeimo Alatala mompakabaru pekirimiu ala inggumiu mabali. Ane ivesia, rasanimiu mpuu-mpuu dota nu Alatala, haitumo, rasanimiu anu nabelo, anu nipokono nu Alatala, bo anu ledo nasala ri panggitaNa.

Roma 4:25

I Yesus nidekei nu Alatala rapatesi mombasompo dosata bo naupu haitu Ia nipatuvu mpanjili ala kita mamala majadi manoa ri panggita nu Alatala.

Roma 8:27

Bo nisani nu Alatala isi rara ntai manusia, bo nisaniNa patuju nu Nosa Gasa haitu, sabana Nosa Gasa nosambaya ka todea nu Alatala, nangoseaka dota nu Alatala mboto.

Roma 8:3

Atura agama ledo namala mombakabasaka kita lako ri kuasa dosa sabana kita manusia ledo nompakule mangoseaka Atura haitu. Tapi anu ledo namala nipovia nu Atura agama, namala nipovia nu Alatala. NituduNa AnaNa mboto tumai ri dunia, bo AnaNa najadi manusia ante karo nasimbayu mpo karo nu manusia nadosa ala Ia mombarasai pehuku nu Alatala ri karoNa sabana dosata. Bo ante pohuku karo i Yesus, Alatala nombadagi kuasa nu dosa riara ntaita.

Roma 8:32

Ledo natove raraNa nte AnaNa mboto, nidekeiNa rapatesi mantolo dosata. Sabana haitu, nisanita kana radekeiNa muni ka kita mpengaya-ngaya anu niparaluuta ante joi raraNa.

1 Korintus 15:3

Nitarimaku kareba nelabi nopoko bo haitumo nipasimbayuku ka komiu. Haitumo, i Kristus namate sabana dosata bo haitu najadi nangoseaka anu nitulisi riara Buku Gasa.

2 Korintus 4:4

Ira ledo nomparasaya sabana Magau nu Seta anu nombakuasai dunia hitu nompakaburo pekirira ala ledo rakitara reme nu Kareba Belo. Kareba Belo haitu nompakalanto kaoge i Kristus anu nasimbayu ntoto ante Alatala.

Galatia 2:20

Jadi namala rauli ivei: nau yaku natuvu, domo aga yaku saitoku natuvu, tapi i Kristus natuvu riara nggatuvuku. Bo ri katuvuku ri dunia hitu, yaku natuvu mpuu-mpuu nomparasaya Ana nu Alatala anu nompotove yaku bo nombadekei karoNa rapatesi manjambei yaku.

Galatia 6:14

Tapi yaku ledo ntoto madota mangoe ka nuapa-nuapa; yaku aga mangoeka anu nipovia nTuputa i Yesus Kristus ri kayu salib. Lako ri kamateNa haitu, nalantomo ka yaku ledo ria nuapa-nuapa riara dunia anu namala mompakanoa yaku ri panggita nu Alatala. Jadi nikabasakakumo pura-pura anu ri dunia anu nisarumakaku bara ipia, bo yaku aga nanjarumaka i Kristus.

Efesus 1:11

Alatala novia mpengaya-ngaya nangoseaka patujuNa bo pobotusiNa mboto. Jadi, nangoseaka pobotusiNa lako ri lamba pamulana, Alatala nompelisi kita, apa patujuNa kita majadi todeaNa lako ri posangu rarata nte i Kristus.

Efesus 2:2

Komiu natuvu nangoseaka kabiasa-kabiasa nu manusia ri dunia hitu, haitumo komiu nangoseaka dota nu Magau Seta, pakeni nu kuasa-kuasa nadaa ri laerava. Iamo nombakuasai rara ntai ntona anu ledo natundu nte Alatala.

Efesus 5:16

Pakemo loga naria nte komiu movia anu nabelo, sabana tempo sii-sii pokainggu manusia nadaa mpuu.

Efesus 5:2

Bo komiu kana matuvu mompotove roa, nasimbayu mpo i Kristus nompotove kita. Lako ri toveNa haitu, nidekeiNa karoNa nipatesi ala mombatolosi kita. PoviaNa haitu nompakadamba rara nu Alatala nasimbayu mpo pesomba navangi nisomba ka Ia.

Efesus 6:12

Apa kita ledo nangeva manusia. Kita nangeva kuasa-kuasa bo pomarenta-pomarenta nadaa anu ledo nikita. Kita nangeva malaeka-malaeka nadaa anu nakuasa ri dunia hitu. Kita nangeva mpengaya-ngaya seta bo anu daa ri laerava.

Filipi 4:20

Jadi ratoiyata Tuamata Alatala sampe ri kasae-saena. Amin!

1 Tesalonika 3:11

Kami merapi Tuamata Alatala bo Tuputa i Yesus mobuka dala ka kami ala mosinggava ante komiu!

1 Tesalonika 3:13

Kami merapi Alatala mompakaroso raramiu ala komiu magasa bo ledo makura nuapa-nuapa ri ngayo nTuamata Alatala tempo Tuputa i Yesus makava ante pura-pura todeaNa anu nagasa.

2 Tesalonika 2:16

Alatala nompotove kita, bo lako ri kabelo nu raraNa, Ia ledo naupu-upu nompakavoe rarata, bo nidekeiNa ka kita panjarumaka nabelo. Jadi kuperapi Tuputa Yesus Kristus bo Tuamata Alatala mompakavoe bo mompakaroso raramiu ala tesamiu bo pokainggumiu batena nabelo.

1 Timotius 2:6

Ia manusia anu nombadekei karoNa mboto nipatesi mombatolosi pura-pura tona. Ia namate ri tempo nipakatantu nu Alatala ala malanto rakitata dota nu Alatala mompakasalama pura-pura manusia.

Titus 2:14

I Kristus nombadekei karoNa nipatesi nanjambei kita ala mombasompo dosata. NikabasakaNa kita lako ri pura-pura pokaingguta nadaa, nipegasaNa kita bo nipataniNa kita majadi todeaNa mboto anu matutu nokainggu nabelo.

Ibrani 2:5

Ledo malaeka-malaeka nanggava kuasa lako nte Alatala moparenta ri dunia nabaru bara maipia, haitumo dunia nitesata ri sii.

Ibrani 6:5

Nirasairamo Tesa nu Alatala nabelo bo nirasairamo kuasa lako ri dunia baru nu Alatala.

Ibrani 9:14

nemopa raa i Kristus anu nelabipa kabisana! I Kristus nombadekei karoNa mboto ka Alatala najadi pesomba anu ledo ria kakurana. Haitu nipoviaNa ante petulungi Nosa Gasa, anu naria sampe ri kasae-saena. Raa i Kristus nompakagasa rara ntaita lako ri pokaingguta ledo ria gunana ala kita mamala metupu nte Alatala anu natuvu sampe ri kasae-saena.

Yakobus 4:4

Komiu nasimbayu mpo topobualo apa komiu ledo natutu nangoseaka Alatala. Ledo nisanimiu? Ane rapoinota anu nipodota ntona nadaa ri dunia hitu, kita majadi bali nu Alatala. Isema-sema mompoino anu nipoino ntona nadaa ri dunia hitu, ia nompajadi karona mboto bali nu Alatala.

1 Petrus 2:24

I Yesus mbotomo nanjimbuaka dosa-dosata tempo Ia nipaku ri kayu salib, ala kita rakabasaka lako ri kuasa nu dosa bo matuvu mangoseaka dota nu Alatala. Bo kita nipakabelomo lako ri baka-baka i Kristus.

1 Petrus 3:18

Apa i Kristus muni nombarasai kasusa nau ledo novia anu nadaa. Ia aga sanggani namate nombasompo dosa manusia nagana sampe ri kasae-saena. Ia ledo nasala, tapi Ia namate nanjambei kita anu nasala, ala mompoposinggabelo kita ante Alatala. Ia nipatesi tapi nipakatuvu mpanjili ante kuasa Nosa Gasa nu Alatala.

1 Yohanes 2:2

I Yesus namate nombatanggu dosa-dosata. Bo ledo aga dosata nitangguNa, tapi pura-pura dosa manusia.

1 Yohanes 3:16

Nanggita pokainggu i Yesus, nisanitamo mosimpotove. Ia namate nanggeni belo ka kita. Jadi kita muni kana masadia mamate mantulungi sampesuvuta.

Pompakita 1:5

bo lako nte i Yesus Kristus. Iamo sabi anu namala raparasaya, Iamo tona paratama nipakatuvu mpanjili lako ri kamateNa. Iamo nomparenta pura-pura magau riara dunia. Ia nompotove kita bo nombakabasaka kita lako ri dosata ante raa kamateNa.

Pompakita 5:9

Totua-totua gahaitu nodade sanggayu dade nabaru ka Ana Bimba ivei: “Komiumo masipato mangala sura haitu bo mombabuka populuna. Sabana, Komiu nipatesi bo ante raa nggamateMiu haitu nitoloMiu manusia lako ri njumangu dunia majadi todea nu Alatala, haitumo tona lako ri pura-pura ngata, bo lako ri pura-pura valaa bo tona lako ri mpengaya-ngaya basa ri dunia.

Pompakita 7:9

Naupu haitu, naria vai anu nipopakita ka yaku. Nikitaku nadea mpuu manusia, ledo rapakule ntona mombabila kadeana! Ira topomparasaya lako ri njumangu dunia, lako ri pura-pura ngata, lako ri pura-pura valaa, bo tona lako ri pura-pura basa ri dunia. Ira neangga ri ngayo Gadera Kamagaua nu Alatala bo ri ngayo Ana Bimba. Ira nopakea mputi pura bo novenggo-venggo tava, tandana nadamba rarara.