Efesus 5:3 - Kaili Ledo

³ Komiu todea nu Alatala. Jadi ledo ntoto masipato komiu mosipogau ante tona ledo bereimiu mboto, atau mokainggu nabuga, atau mario mata bo ledo ria kabasa-basana. Nee sampe maria sabana raraika ntona komiu nokainggu ivehaitu.

Efesus 5:3 ပူးပေါင်းရင်းမြစ်များ

Matius 15:19

Apa lako riara ntai neumba mpengaya pekiri nadaa, anu nanggeni tona nepatesi, nobualo, nogau nabuga, nangangga, nosabi dava, bo nesalai.

Lukas 12:15

Pade nanguli i Yesus ka todea, “Pakabelo-belo! Nee madamba gaga raramiu ante mbara-mbara, sabana naupa mbara-mbaramiu nadea ledo haitu mompakajadi katuvumiu mabelo.”

Lukas 16:14

ToFarisi nangepe pura-pura anu nitesa i Yesus pangane, aga nipongirikara i Yesus sabana ira topompotove doi.

Suro-Suro 15:20

Tapi kita kana motulisi sura manguli ka ira nee mangande kandea anu naruto sabana nipesomba ka tupu-tupu ntanina, bo nee mangande bau nu binata nikoje, anu ledo nisuvuraka raana, bo nee mangande raana. Bo muni ala ira nee mosampaturu ante tona ledo bereira mboto.

Suro-Suro 20:33

Ledo ria sanggania nario mataku ka doi bara ka pakea ntona.

Roma 1:29

Mpengaya-ngaya pekiri nadaa bo natenggo rarara. Ledo naosa rarara ante anu naria nte ira, navau rarara, nasiriati, nepatesi, nebagiu, bo nosinggarau. Ira nomboli rau rara, nantunturaka tona

Roma 16:2

Kuperapi komiu mantarima ia sabana pomparasayana i Pue Yesus, apa ivesia mamimo kita todea nu Alatala masipato mantarima roata sampomparasaya. Ane maria anu niparaluuna, tulungimo ia, sabana ia mboto nadea tona nitulungina, yakumo hii saito.

Roma 6:13

Bo nee rapalamba karomiu movia nadaa. Tapi dekeimo katuvumiu ka Alatala apa kita nikabasakamo lako ri kamatea bo nitarimatamo katuvu nabaru. Dekeimo katuvumiu ka Alatala ala karomiu rapake movia anu nanoa.

1 Korintus 10:8

Nee kita mosimpogau ante tona ledo bereita mboto mpo anu nipovia roara ntanina. Toramo! Riara saeo, ropulu bo talu-njobu ira namate singgani-nggani sabana poviara haitu.

1 Korintus 5:1

Niepeku lelena naria saito komiu nokainggu nabuga ntoto. Ia nompogau berei ntuamana mboto. Iyapa tona ledo nomparasaya Alatala, ledo nokainggu nadaa ivehaitu!

1 Korintus 6:13

Sanu muni nanguli kandea nipasadia rakande, bo tailiko nipovia rapangisi kandea. Bo kandea bo tailiko rapakaropu nu Alatala pura bara maipia. Jadi, nisarumakamiu ledo makuya nuapa-nuapa rapoviata ante karota. Kakanana ledo ivesia. Karota ledo nipovia mompogau tona ledo bereita mboto. Tapi karota nipovia ala rapaketa movia dota i Pue. Iamo Tupu nu karota.

1 Korintus 6:18

Nemo mpuu rapogaumiu tona ledo bereimiu mboto! Apa dosa haitu ledo ria kasimbayuna. Isema-sema nompogau tona ledo bereina mboto, mpuu-mpuu nompakagero posangu rarana ante i Pue.

2 Korintus 12:21

Nakini raraku ane tou nte komiu vai yaku, Alatala mompakaeya yaku ri ngayomiu, bo yaku motumangi ri ngayomiu sabana madea komiu anu nadosa bara ipia dopa najea lako ri pokainggura nadaa bo nabuga. Bara maria da nompogau tona ledo bereina mboto, bara movia anu ledo ntoto masipato mpo anu nabiasa nipoviara bara ipia.

Efesus 5:12

Apa pokainggu nipoviara nggalino haitu mpuu-mpuu nepakaeya, nau aga ratesa-tesa, naeya pura mata.

Efesus 5:5

Toramo pakabelo-belo! Tona nosipogau nte tona ledo bereina mboto bo tona nokainggu nabuga ledo ntoto manggava bagia riara Poparenta nu Alatala bo i Kristus. Ivesia muni ante tona nario matana bo ledo ria kabasa-basana, sabana anu niporiona haitu najadi anu nisombana bo haitu nasimbayu kadaana nte topompakande tupu-tupu ntanina.

Filipi 1:27

Jadi, nau bara nuapa majadi nte yaku, komiu kana matuvu ante pokainggu masipato ka topangoseaka Kareba Belo i Kristus. Komiu kana matuvu ivesia ala nau kita mosinggava atau ledo, kuepe karebana komiu naroo nosangu rara bo nosangu pekiri bo singgani-nggani nompasimbuku nokarajaa ala madea tona momparasaya Alatala nangoseaka anu niuli riara Kareba Belo.

Kolose 3:5

Sabana haitu, kabasakamo pokainggu-pokainggu anu nopuna lako ri dunia nadaa hitu. Nee mosipogau ante tona ledo bereimiu mboto, nee movia pokainggu anu ledo masipato, nee mangoseaka dota raramiu nabuga bo dota-dota ntanina anu nadaa. Bo nee muni maoge rara manggava melabipa pade tona ntanina, sabana anu nipooge rarata haitumo najadi anu nisombata, bo haitu nasimbayu nte metupu nte tupu ntanina.

1 Tesalonika 4:3

Dota nu Alatala ala komiu majadi todeaNa nagasa, bo nee mosampaturu ante tona ledo bereimu mboto.

1 Tesalonika 4:7

Kita nipokio nu Alatala ledo matuvu mabuga, tapi nipokioNa matuvu magasa ante pokainggu anu mompakadamba raraNa.

1 Timotius 2:10

Aginapa mombine mombavera karora ante pokainggu nabelo anu masipato ka mombine anu natundu nte Alatala.

1 Timotius 3:3

Ia ledo tolangu, bo ledo toposibaga. Tapi ia kana nalusu rarana bo natuvu nosinggabelo. Ia ledo muni aga nadoko ka doi.

1 Timotius 6:10

sabana pompotove doi puna mpengaya-ngaya kadaa. Sanu tona nompasimbuku nangelo doi sampe nasalandalamo bo domo nioseakara pepatuduki nakana, bo aga mpengaya-ngaya kasusa nikavara anu nompakabuku rarara.

2 Timotius 3:2

Tempo haitu madea tona aga mompotove karora mboto. Ira madoko doi, mamango, malanga rara, mantunturaka roa, bo ledo matundu nte totuara. Ledo rasanira motarima kasi, bo ledo rapeilira agama.

Titus 1:11

Tona ivehaitu kana ratagi, nee mpuu mudekei ira mompatuduki! Apa nadea pobanua ntona naingu nangepe pepatudukira anu ledo masipato. Patujura mompatuduki aga manggava doi ante akala ledo nabelo.

Titus 1:7

Pakeni ntopomparasaya haitu topompasiayu todea nu Alatala. Jadi ia ledo novia pokainggu rasalai ntona. Ia ledo tona nalanga pekirina bara nasalisa narau, ledo topanginu, ledo toposibaga, bo ledo muni tona nadoko doi.

Titus 2:3

Ivesia muni ante totua-totua mombine. Patudukimo ira matuvu nte pokainggu nagasa anu masipato rapovia ntona natundu nte Alatala. Ulika ira nee mombatunturaka tona ntanina, nee sampe majadi batua ntule. Ira kana mompatuduki tona ntanina matuvu mabelo.

Ibrani 12:16

Nee sampe maria tona mosipogau nte tona ledo bereina mboto. Bo nee sampe maria tona moinggu mpo i Esau, apa ia aga nompekirika kasana karona ri dunia hitu bo ledo nipekirikana dota nu Alatala. Kalumbuana nisulakana sanjuraya kandea.

1 Petrus 5:2

ala komiu mompiara todea nu Alatala anu niparasayaka komiu, nasimbayu mpo topoevu nompiara bimba-bimbana. Piaramo ira ante damba rara, nangoseaka dota nu Alatala, nemo mpo tona nipasuu. Bo nee aga mangelo untu ka karomiu mboto, tapi tuimo pokarajaa haitu sabana komiu mpuu-mpuu madota mantulungi todea topomparasaya.

2 Petrus 2:10

Tona rahukuNa ivesia, nelabipa tona natuvu nangoseaka dota rarara nadaa bo nabuga, bo tona nanjapuaka kuasa nu Alatala momparenta ira. Guru-guru mpodava haitu nabia mpuu bo nalanga rarara. Ledo naeka ira nanjalai malaeka-malaeka anu nipokumaaka.

2 Petrus 2:14

Ira bate-batena naino mompogau sambara mombine nikitara. Ledo nabasa-basa ira novia dosa! Ira nombaopa tona ledo naroso pomparasayana ala movia dosa. Bo najadi kabiasara nario mata ante ledo ria kabasa-basana. Ira mpuu-mpuu tona nasurukavu!

2 Petrus 2:3

Guru-guru mpodava haitu nadoko doi. Haitu sampe ira aga mangelo untu lako nte komiu ante tesa-tesa ledo nakana, anu nikarara mboto. Tapi pehuku ka ira nasaemo nipakatantu. Ira rahuku nu Alatala bo tempona ledo rasoro-soro.

Pompakita 2:14

Tapi da nariapa bara sako-ngaya inggumiu anu ledo nipodambaKu. Naria tona nte komiu nangoseaka pepatuduki i Bileam nggaulu. I Bileam nompatuduki Magau Balak mompakanavu toIsrael riara dosa. Nipatudukina ia mompakeni ira mangande kandea nipopali sabana nipakande ka tupu-tupu ntanina, bo nompatuduki ira ledo makuya mosipogau nte tona ledo bereina mboto.

Pompakita 2:21

NidekeiKumo loga ka ia majea lako ri pokaingguna nadaa haitu, tapi ia ledo ntoto nadota majea.

Pompakita 21:8

Aga tona naeka mangoseaka Yaku, atau ledo niparasayana Yaku, bo tona nadaa pokaingguna, topepatesi, tona nokainggu nabuga, topedoti, tona nombasomba tupu-tupu ntanina, bo pura-pura topodava, ira pura-pura kana rahuku riara ntasi apu anu navaya ante vatu-vatu colonggata. Haitumo niuli kamatea karongganina.”

Pompakita 22:15

Tapi tona nadaa, topedoti, tona nogau sala ante tona ledo bereina mboto, topepatesi, tona netupu nte tupu ntanina, topodava bo pura-pura tona nompokono dava, ponturora pura-pura aga ri savaliku ngata haitu.