Efesus 4:3 - Kaili Ledo

³ Pasimbukumo ante mpuu-mpuu raramiu matuvu mosinggabelo. Nosa Gasa nu Alatala nompopakasangu kita pura-pura, jadi kita kana mombajagai kasintuvuta haitu.

Efesus 4:3 ပူးပေါင်းရင်းမြစ်များ

Markus 3:24

Ane maria saito magau bo todeana bate-batena nosipobali, ledo masae mageromo kamagaua haitu.

Yohanes 13:34

Naria parenta nabaru Kudekei ka komiu ivei: Komiu kana mosimpotove. Yaku nompotove komiu, ivesia muni komiu kana mosimpotove.

1 Korintus 1:10

Sampesuvu-sampesuvu, ante kuasa nidekei nTuputa Yesus Kristus ka yaku, kuperapi nte komiu ala komiu mosangu rara. Nemo sampe magero sintuvumiu. Komiu kana masintuvu mosangu rara bo mosangu patuju.

2 Korintus 13:11

Jadi sampesuvu-sampesuvuku, pakadambamo raramiu. Pasimbukumo mompakabelo pokainggumiu mpanjili. Tarimamo pepatudukiku hitu! Komiu kana matuvu mosangu pekiri bo mosangu rara, bo mosinggabelo. Bo Alatala, puna pepotove bo katinonto, mosanggani-nggani ante komiu.

Efesus 4:13

sampe kaupuna kita pura-pura mpuu-mpuu mosangu rara sabana kita nomparasaya Ana nu Alatala bo mpuu-mpuu nosisani nte Ia. Bo kita pura-pura mantambai manoto, bo pomparasayata mantambai maroso sampe domo makura nuapa-nuapa. Bo kita majadi nasimbayu mpo i Kristus mboto, nanoto bo naroso.

Efesus 4:4

Pura-pura kita topomparasaya i Kristus najadi sangu karo i Kristus. Bo sangu Nosa Gasa nu Alatala anu naria riara ntaita pura-pura. Ivesia muni panjarumakata aga sangu, haitumo kita pura-pura nipokio nu Alatala matuvu mosanggani-nggani nte Ia sampe ri kasae-saena.

1 Tesalonika 5:13

Bilamo ira bo potovemo ira ante mpuu-mpuu raramiu, sabana ira mpuu-mpuu nokarajaa nantulungi komiu. Bo komiu kana matuvu mosinggabelo ante roamiu pura-pura.

Ibrani 12:14

Komiu kana mompasimbuku matuvu mosinggabelo ante pura-pura tona. Bo pasimbuku muni matuvu magasa, sabana tona ledo nagasa katuvuna ledo ntoto mamala manggita i Pue.