Efesus 4:12 - Kaili Ledo

¹² NipaleleNa pedekei haitu ala kita todea nu Alatala rapakagana ala rapakuleta mantui pokarajaa nu Alatala. PatujuNa muni ala kita anu najadi karo i Kristus mantambai karosota,

Efesus 4:12 ပူးပေါင်းရင်းမြစ်များ

Lukas 22:32

Tapi niposambayaKukamo iko, Simon, ala pomparasayamu ledo moura. Jadi maupu iko rapesori bo muoseaka mpanjili Yaku, iko kana mompakaroso pomparasaya nu roamu.”

Suro-Suro 1:17

I Yudas haitu roata, sabana i Yesus mboto nompelisi ia majadi suroNa nasimbayu mpo kita.”

Suro-Suro 11:23

Nakavapa i Barnabas ri Antiokhia, nadamba mpuu rarana nanggita kabelo nu Alatala nte ira. Jadi nipakarosona rarara ala ira bate-batena mangoseaka i Pue Yesus ante mpuu-mpuu rarara.

Suro-Suro 20:24

Tapi ledo kupotove katuvuku hitu. Nau yaku mpuu-mpuu rapatesi, ledo makuya, asaa kupakaupu pokarajaa nidekei i Pue Yesus ka yaku mompatolele Kareba Belo anu nombatesa kabelo nu Alatala nte kita.

Suro-Suro 20:28

Komiu kana mombajagai karomiu mboto. Jagai muni todea topomparasaya, anu niparasayaka Nosa Gasa ka komiu. Komiu kana mompiara todea nu Alatala, nasimbayu mpo topoevu nompiara bimbana. Apa Tuputa Yesus namate bo raaNa natiti mombasompo dosata ala kita majadi todeaNa.

Suro-Suro 9:31

Jadi todea topangoseaka i Yesus ri njumangu bagia Yudea, Galilea bo Samaria domo nipandasa. Kasae-sae kadea-dea tona nomparasaya i Yesus, bo todea topomparasaya nantambai karoso pomparasayara sabana ira natundu nte Alatala, bo sabana Nosa Gasa nantulungi ira.

Roma 12:5

Ivesia muni kita topomparasaya i Kristus. Nau kita nadea, kita najadi sangu riara i Kristus. Bo kita nosidai mpo sipa-sipa nu karo.

Roma 12:7

Isema-sema nidekeika pompakule mantulungi tona ntanina, kana ratulungina mpuu ira. Isema-sema nidekeika pompakule mompaguru, kana mompaguru mpuu-mpuu.

Roma 14:19

Haitu sampe kita kana mompasimbuku matuvu mosinggabelo ante roata, bo mosipakaroso rara.

Roma 15:14

Sampesuvu-sampesuvuku, nisaniku mboto komiu batena nokainggu nabelo nte tona ntanina, bo nisanimiumo pura-pura anu masipato rapoviamiu, bo nipakulemiu mosipakaroso rara.

Roma 15:2

Kita masipato movia anu manggeni belo ka roata bo mompakasana rarana, ala mompakaroso pomparasayana.

Roma 15:29

Bo nisaniku ane yaku makava nte komiu, natantumo madea belo lako nte i Kristus kukeni ka komiu.

1 Korintus 12:27

Komiu pura-pura nirapaka karo i Kristus bo komiu saito-saito simbo nirapaka sipa nu karoNa.

1 Korintus 12:7

Kita pura-pura simbo nidekeika pompakule lako ri Nosa Gasa nu Alatala ala manggeni belo ka tona ntanina.

1 Korintus 14:12

Jadi ivesia muni komiu. Ane komiu mompake basa nopuna lako nte Nosa Gasa, tantu ledo rasani nu roa batuana. Komiu mpuu-mpuu madota manggava pompakule lako nte Nosa Gasa nu Alatala. Tapi aginapa komiu merapi Tupu mombadekei ka komiu pompakule mantulungi topomparasaya bo mompakaroso pomparasayara.

1 Korintus 14:14

Apa ane kita mosambaya mompake basa anu nopuna lako nte Nosa Gasa, rara ntaita nosambaya, tapi pekirita ledo najala.

1 Korintus 14:26

Jadi sampesuvu-sampesuvuku, nuapa rapoviata? Ivei: ane kita masiromu mombasomba Alatala, saito-saito simbo maria bagiana. Sanu tona modade, sanu mompatuduki, sanu mompakalanto tesa nitarimana lako nte Alatala. Sanu tona motesa riara basa-basa nopuna lako nte Nosa Gasa, bo tona ntanina mombabatuasi tesa-tesa haitu ala rasani ntodea batuana. Pura-pura anu nipoviamiu haitu kana rapovia ala mompakaroso pomparasaya ntodea.

2 Korintus 12:19

Nipekirimiu tesa kami hitu bara aga manjaliku karo kami ri ngayomiu? Sampesuvu-sampesuvu nipotoveku, ledo ntoto nakana! Pura-pura hitu nitesa kami sabana kami nosangu rara nte i Kristus bo Alatala mboto nanggita kami. Pura-pura anu nipovia kami, nipovia ala mompakaroso pomparasayamiu.

2 Korintus 13:11

Jadi sampesuvu-sampesuvuku, pakadambamo raramiu. Pasimbukumo mompakabelo pokainggumiu mpanjili. Tarimamo pepatudukiku hitu! Komiu kana matuvu mosangu pekiri bo mosangu rara, bo mosinggabelo. Bo Alatala, puna pepotove bo katinonto, mosanggani-nggani ante komiu.

2 Korintus 13:9

Nadamba mpuu rara kami ane kami nalente, asaa komiu maroso momparasaya. Jadi kami bate-batena mosambaya ala pokainggumiu majadi mabelo pura.

2 Korintus 3:8

natantumo nelabipa kaogeNa rakita riara pokarajaa Nosa Gasa!

2 Korintus 4:1

Jadi ledo naupu rara kami nompatolele Kareba Belo sabana pokarajaa hitu niparasaya nu Alatala ka kami lako ri kabelo raraNa.

2 Korintus 5:18

Alatalamo anu nompakajadi pura-pura haitu. NipoposinggabeloNa kita nte Ia ante kamate i Kristus. Bo niparasayaNa ka kami pokarajaa mompatolele kareba posinggabelo ka tona ntanina ala ira muni mamala mosinggabelo nte Ia.

2 Korintus 6:3

Kami nompasimbuku matuvu ante pokainggu nabelo ala ledo maria tona manjalai pokarajaa kami nompatolele Tesa nu Alatala.

2 Korintus 7:1

Sampesuvu-sampesuvu nipotoveku. Pura-pura janji nu Alatala haitu nipambela ka kita. Jadi kita kana mombakabasaka pura-pura pokainggu bo pekiri nadaa. Kita kana mangoseaka Alatala ante rarata mpuu-mpuu, bo kana maeka movia anu ledo rapokonoNa.

Efesus 1:23

bo kita todea topomparasaya nirapaka karoNa. Todea topomparasaya nipakagana i Kristus anu nompakagana pura-pura nuapa naria, ri umba-umba ri dunia bo ri suruga.

Efesus 4:16

bo kita todea topomparasaya nirapaka sipa nu karoNa. Ri karo manusia sipa nu karo nikuasai nu balengga. Sipa-sipa haitu niposidumpa pakabelo-belo bo niposiumpu ante uva ala majadi sangu karo. Bo ane pura-pura sipa haitu mokarajaa mangoseaka pompakule nidekei ka ia, njumangu karo haitu matuvu mabelo bo mantambai maroso. Ivesia muni kita topomparasaya. Kita pura-pura nosangu rara nte i Kristus bo Ia nompopakasangu kita. Jadi ane kita mosimpotove bo mositulungi, mantambai kabelona kasintuvuta bo karoso pangoseakata i Pue.

Efesus 4:29

Sampesuvu-sampesuvu, ane komiu motesa, nee rasovadakamiu tesa nadaa tapi sovadakamo tesa-tesa masipato, anu mombatulungi bo mompakaroso rara ntona ntanina. Tesa-tesa ivehaitu manggeni belo ka topangepena.

Efesus 4:4

Pura-pura kita topomparasaya i Kristus najadi sangu karo i Kristus. Bo sangu Nosa Gasa nu Alatala anu naria riara ntaita pura-pura. Ivesia muni panjarumakata aga sangu, haitumo kita pura-pura nipokio nu Alatala matuvu mosanggani-nggani nte Ia sampe ri kasae-saena.

Kolose 1:24

Sampesuvu-sampesuvu, sii-sii nadamba raraku nombarasai susa bo pari nikavaku sabana yaku nokarajaa nantulungi komiu. Apa yaku nombadupai ri karoku susa bo pari nipakatantu i Kristus kana kurasai. Bo susa bo pari nirasaiku nanggeni belo ka todea topomparasaya. Pura-pura kita topomparasaya nirapaka karo i Kristus.

Kolose 1:28

Jadi Kareba i Kristusmo nipatolele kami ka pura-pura tona. Nipake kami pura-pura noto anu naria riara ntai kami nompopatora ira anu ledo mabelo rapoviara bo nompatuduki ira movia anu nabelo. Patuju kami ala pura-pura ira mamala rakeni mantingayo Alatala bo pomparasayara ledo makura nuapa-nuapa ri panggitaNa sabana posangu rarara ante i Kristus.

Kolose 4:17

Bo ulika i Arkhipus ivei: “Pakaupumo pokarajaa nidekei nu Alatala ka iko!”

1 Timotius 1:12

Yaku notarima kasi nte Tuputa Yesus Kristus sabana nipekiriNa yaku namala raparasaya mompatolele Kareba Belo, bo nidekeiNa kuasa ka yaku ala kupakule mombatui pokarajaa haitu.

2 Timotius 4:11

Damo i Lukas naboli ri sii nte yaku. Ane tumai iko ngena, tuusaka muni i Markus, sabana ia mamala mombatulungi pokarajaaku ri sii.

2 Timotius 4:5

Haitumo sampe niuliku ka iko, Timotius, iko kana mombakuasai karomu mboto nau bara nuapa majadi. Tidamakamo tempo nasusa. Pasimbukumo mompatolele Kareba Belo, bo povia puramo pokarajaa niparasaya nu Alatala ka iko.

Ibrani 13:17

Oseakamo parenta-parenta nu pakeni-pakenimiu bo pekoumo nte ira, sabana iramo nombajagai pomparasayamiu. Makava tempona bara maipia ira kana manguli pakalanto ri ngayo nu Alatala berimbana komiu nikeniakara. Jadi pekoumo nte ira ala ira mamala mantui pokarajaa haitu ante damba nu rara. Ane komiu ledo mekou, aga masusa rarara bo haitu ledo manggeni belo ka komiu.

Ibrani 6:1

Jadi sampesuvu-sampesuvu, nee kita aga mompekirika pepatuduki agama Kristen pamulana. Tapi aginamo kita meguru pepatuduki kapolana. Nee aga mombasili pepatuduki pamulana, evamo majea lako ri pokainggu nadaa anu ledo ria gunana, bo pepatuduki momparasaya Alatala.