Efesus 4:11 - Kaili Ledo

¹¹ Iamo nompalele pedekei-pedekei ka kita. Sanu nidekeikaNa pompakule majadi suro, sanu nidekeikaNa pompakule majadi nabi anu mompasimbayu tesa nitarimana lako nte Alatala. Sanu muni nidekeikaNa pompakule majadi topompatolele Kareba Belo, bo ntanina nidekeikaNa pompakule manggeniaka bo mompatuduki todea topomparasaya.

Efesus 4:11 ပူးပေါင်းရင်းမြစ်များ

Matius 28:20

Patudukimo ira ala raoseakara pura-pura anu niparentaKu ka komiu. Bo toramo! Yaku bate-batena mosanggani-nggani ante komiu sampe ri kaupu dunia.”

Suro-Suro 13:1

Ri tatanga ntodea topomparasaya ri ngata Antiokhia naria bara sako-ndua guru bo nabi anu nompasimbayu Tesa nu Alatala, haitumo, i Barnabas, i Simeon anu nidae i Vuri, bo i Lukius toKirene, i Menahem anu nipakambaso nosanggani-nggani ante Magau Herodes Antipas, bo i Saulus.

Suro-Suro 20:28

Komiu kana mombajagai karomiu mboto. Jagai muni todea topomparasaya, anu niparasayaka Nosa Gasa ka komiu. Komiu kana mompiara todea nu Alatala, nasimbayu mpo topoevu nompiara bimbana. Apa Tuputa Yesus namate bo raaNa natiti mombasompo dosata ala kita majadi todeaNa.

Suro-Suro 21:8

Naeo mpadondo napolamo kami sampe nakava ri ngata Kaisarea. Ri sia, kami hau nonturo ri banua i Filipus, saito topompatolele Kareba Belo. Ia muni saito lako ri ira papitu anu nipelisi ri ngata Yerusalem bara ipia mantulungi suro-suro.

Roma 12:7

Isema-sema nidekeika pompakule mantulungi tona ntanina, kana ratulungina mpuu ira. Isema-sema nidekeika pompakule mompaguru, kana mompaguru mpuu-mpuu.

1 Korintus 12:4

Naria mpengaya-ngaya pompakule lako nte Nosa Gasa, tapi pura-pura pompakule haitu nopuna lako ri sangu Nosa Gasa.

Efesus 2:20

Kita topomparasaya i Kristus nirapaka gana-gana nu banua nibangu nu Alatala. Suro-suro i Kristus bo nabi-nabi nirapaka pandasi nu banua haitu. I Yesus Kristus nirapaka vatu nu pandasi anu nelabi nopoko.

Efesus 3:5

Ri tempo nggaulu nia haitu dopa nipopaisani ka manusia. Tapi sii-sii Nosa Gasa nu Alatala nompopaisani nia nu Alatala haitu ka kami suro-suroNa bo nabi-nabiNa.

Efesus 4:8

Naria nitulisi riara Buku Gasa anu nombaboto pompakule haitu ivei: “Tempo Ia neore hau ri ponturo ri kalangana, Nadea tona nitavani nikeniNa. Bo Ia nompalele pedekei-pedekei ka manusia.” Mazmur 68:19

2 Timotius 4:5

Haitumo sampe niuliku ka iko, Timotius, iko kana mombakuasai karomu mboto nau bara nuapa majadi. Tidamakamo tempo nasusa. Pasimbukumo mompatolele Kareba Belo, bo povia puramo pokarajaa niparasaya nu Alatala ka iko.

Ibrani 5:12

Kakanana temponamo komiu majadi guru mompatuduki tona ntanina, sabana nasaemo komiu nomparasaya i Yesus. Tapi komiu da noparaluu guru mompatuduki ka komiu pepatuduki pamulana lako ri Tesa nu Alatala, komiu dopa nasadia nantarima pepatuduki kapolana. Komiu nasimbayu mpo ngana kodi da netomi, anu dopa nasadia mangande kandea nakaa!

Yudas 1:17

Sampesuvu-sampesuvu nipotoveku, toramo tesa niuli nu suro-suro nTuputa i Yesus Kristus bara ipia.

Pompakita 18:20

Bo nanguli malaeka, “Umbamo komiu toponturo ri suruga! Pakadambamo raramiu! Pakadambamo raramiu todea nu Alatala mosanggani-nggani ante suro-suroNa bo nabi-nabiNa! Sabana, tupu ngata mbaso Babel nihuku nu Alatalamo! NibalasiNamo pokainggura nadaa nte komiu.”

Pompakita 21:14

Tembo ngata haitu nipopeangga ri bavo sapulu rolonta vatu pandasi bo ri vatu pandasi haitu naria nitulisi sanga sapulu randua suro nu Ana Bimba.