Efesus 2:7 - Kaili Ledo

⁷ Alatala novia ivesia ala ri tempo makava bo sampe ri kasae-saena, manusia manggita kaoge nu toveNa bo kabelo nu raraNa anu ledo ria kasimbayuna. ToveNa bo kabelo raraNa haitu nipopakitaNa ka kita ante anu nipovia i Yesus Kristus.

Efesus 2:7 ပူးပေါင်းရင်းမြစ်များ

Roma 2:4

Alatala mpuu-mpuu nabelo raraNa, Ia nosabara, bo ledo nasalisa nombahuku dosa-dosamiu. Tapi nipandaentemiu kabelo raraNa. Ledo nisanimiu? Alatala nabelo nte komiu sabana Ia madota komiu majea lako ri dosamiu.

Efesus 1:7

Kita nikabasaka lako ri pehuku nu dosa sabana raa kamate i Kristus bo posangu rarata nte Ia. Dosata niampungi nu Alatala sabana toveNa anu nelabi kaogena.

Efesus 2:4

Tapi Alatala naasi mpuu mataNa nanggita kita. Naoge mpuu toveNa anu nipopelabiNa ka kita.

Efesus 3:21

Alatala masipato ratoiya ntodea topomparasaya. Ia masipato ratoiya sii-sii bo sampe ri kasae-saena sabana anu nipovia i Yesus Kristus. Amin!

Efesus 3:5

Ri tempo nggaulu nia haitu dopa nipopaisani ka manusia. Tapi sii-sii Nosa Gasa nu Alatala nompopaisani nia nu Alatala haitu ka kami suro-suroNa bo nabi-nabiNa.

2 Tesalonika 1:12

Patuju kami nerapi ivesia ala Tuputa Yesus rabila bo ratoiya sabana pokainggumiu nabelo. Bo ala komiu muni rabila bo ratoiya i Yesus. Haitu pura-pura majadi sabana kabelo rara nTuamata Alatala bo i Pue Yesus Kristus.

Titus 3:4

Tapi nau kita nokainggu nadaa bara ipia, Alatala nompotove kita bo nipopakitaNa kabelo raraNa tempo nipakasalamaNa kita lako ri dosata.

1 Petrus 1:12

Bo Alatala nompakalanto ka ira anu nibotora haitu ledo nosinggambela ante ira mboto tapi nosinggambela ante komiu anu natuvu sii-sii. Kajadia-kajadia nibotora haitu, nipatolele ntopanggeni Kareba Belo ka komiu sii-sii. Nikenira kareba haitu ante petulungi Nosa Gasa nu Alatala, anu nipopanau lako ri suruga. Kakanana malaeka-malaeka nTupu mboto nadota mangisani batuana kajadia-kajadia pangane anu nipatolele ka komiu.