Efesus 1:5 - Kaili Ledo

⁵ Lako ri lamba pamulana Ia nompakatantu manganggataka kita majadi ana-anaNa sabana Ia nompotove kita. Kita najadi ana-anaNa lako ri kamate i Yesus Kristus, sabana haitumo nia bo dota nu Alatala mami lako ri pamulana.

Efesus 1:5 ပူးပေါင်းရင်းမြစ်များ

Matius 1:25

tapi ira dopa nosampaturu dopame i Maria moanaka anana langgai haitu. Bo i Yusuf nompoposanga ngana haitu i Yesus.

Matius 11:26

apa ivesiamo dotaMiu.”

Lukas 10:21

Tempo haitu muni Nosa Gasa nu Alatala nombakuasai i Yesus bo Ia nosambaya nte damba raraNa ivei: “Tata, Komiu Tupu nu langi bo tana! Nosukuru mpuu Yaku sabana nipopaisaniMiu pura-pura anu pangane ka tona ledo natau. Tapi nitabuniakaMiu ka tona nangisani bo tona napande, apa ivesiamo dotaMiu.”

Lukas 11:32

Ivesia muni ri Eo Potangara tupu ngata Niniwe rapakatuvu mpanjili mosanggani-nggani nte komiu anu natuvu sii-sii. Bo ira mombasalai pokainggumiu sabana ira najeamo nangepe tesa Nabi Yunus. Sii-sii naria saito ri tatangamiu naogepa pade Nabi Yunus, tapi ledo nadota komiu nomparasaya tesaNa.”

Lukas 12:32

I Yesus nompapola tesaNa ivei: “Nau ledo nadea komiu anaguruKu, nee maeka, sabana komiu nipelisi nTuamamiu Alatala, lako ri kabelo raraNa ala komiu moparenta mosanggani-nggani nte Ia riara poparentaNa.

Yohanes 1:12

Tapi isema-sema nantarima Ia bo nomparasaya Ia, nidekeikaNa kuasa majadi ana-ana nu Alatala.

Yohanes 11:52

Bo ledo aga toYahudi, tapi nibotusina muni i Yesus mamate ka pura-pura ana-ana nu Alatala ntanina ri umba-umba ri dunia, ala ira rapasiromu majadi sangu.

Yohanes 20:17

Nanguli i Yesus ka ia, “Nee rakabe Yaku, apa Yaku dopa neore hau nte TuamaKu. Tapi koimo hau nte sampesuvu-sampesuvuKu bo uli ka ira ivei: ‘Yaku hau nte TuamaKu bo Tuamamiu, haitumo Alatala nisombaKu bo nisombamiu.’ ”

Suro-Suro 13:48

Tempo tona ledo toYahudi ri sia nangepe tesa haitu, nadamba mpuu rarara bo niulira, “Nabelo mpuu Tesa nu Alatala!” Isema-sema nipelisi nu Alatala manggava katuvua mabelo sampe ri kasae-saena, iramo nomparasaya i Yesus.

Roma 8:23

Ledo aga dunia nandasa, tapi kita topomparasaya muni nandasa nirasaita, nantongoraka tempona Alatala mombakabasaka karota lako ri kuasa kamatea, bo mombadekei belo ka kita ana-anaNa. Nisanita tempo haitu kana makava, sabana nitarimatamo Nosa Gasa nu Alatala, tandana Alatala mpuu-mpuu mompakadupa pojanjiNa ka kita.

1 Korintus 1:1

Sampesuvu-sampesuvu, todea nu Alatala ri ngata Korintus: Komiu nipelisi nu Alatala majadi todeaNa mboto sabana komiu nosangu rara ante i Yesus Kristus. Komiu nipokio majadi todea nu Alatala mosanggani-nggani ante pura-pura tona ri umba-umba dunia anu nekakai nte i Yesus Kristus, Tupura bo Tuputa muni. Sura hitu lako nte kami, i Paulus bo sampesuvuta sampomparasaya i Sostenes. Yaku nipelisi nu Alatala majadi suro i Yesus Kristus nangoseaka dota nu Alatala mboto.

1 Korintus 1:21

Alatala napande mpuu, bo nipakatantuNa manusia ledo mamala mosisani ante Ia ane aga manjarumaka kapandera mboto. Tapi nibotusiNa mompakasalama isema-sema momparasaya Kareba Belo nipatolele kami. Tano mai tona ri dunia nanguli Kareba haitu aga tesa ntodoyo.

2 Korintus 6:18

Niuli muni ri Buku Gasa ivei: “Yaku majadi Tuamamiu bo komiu majadi ana-anaKu. Ivesiamo panguli nTupu anu Neliu KakuasaNa.” 2 Samuel 7:14, 1 Tawarikh 17:13, Yesaya 43:6, Yeremia 31:9

Galatia 3:26

Jadi, komiu pura-pura nosangu rara nte i Yesus Kristus, komiu najadi ana-ana nu Alatala sabana komiu nomparasaya i Kristus.

Efesus 1:11

Alatala novia mpengaya-ngaya nangoseaka patujuNa bo pobotusiNa mboto. Jadi, nangoseaka pobotusiNa lako ri lamba pamulana, Alatala nompelisi kita, apa patujuNa kita majadi todeaNa lako ri posangu rarata nte i Kristus.

Efesus 1:9

Alatala nompopaisani ka kita niaNa anu dopa nisani nu manusia bara ipia. Nangoseaka dotaNa mboto, Alatala nompakatantu lako ri nggauluname ala niaNa haitu rapakadupa i Kristus

Filipi 2:13

Apa Alatala mbotomo nokarajaa riara ntaimiu nombadekei ka komiu dota rara bo pompakule mangoseaka dotaNa.

Kolose 1:19

Dota nu Alatala mboto sampe pura-pura ingguNa bo kuasaNa naria muni nte AnaNa, bo ledo ria nakura.

2 Tesalonika 1:11

Haitu sampe kami nasaro nosambaya ka komiu. Kami merapi ala Alatala mombatulungi komiu ala pokainggumiu majadi masipato ka tona nipokio nu Alatala majadi todeaNa. Kami merapi Alatala mombatulungi komiu ante kuasaNa ala pura-pura niamiu movia anu nabelo majadi mpuu, bo pura-pura pokarajaa nipoviamiu sabana pomparasayamiu rapapolamiu sampe maupu.

Ibrani 2:4

Bo Alatala mboto nompakalanto kareba nipatolelera mpuu-mpuu nakana. Apa nipoviaNa mpengaya-ngaya kabaraka bo tanda nipokumaaka, bo nipaleleNa pompakule lako ri Nosa GasaNa nangoseaka dotaNa mboto.

1 Yohanes 3:1

Namovo mpuu kaoge tove nu Alatala ka kita sampe kita niuliNa ana-anaNa! Bo kita mpuu-mpuu ana-anaNa mami. Tona ledo nomparasaya i Yesus ledo nisanira kita ana-ana nu Alatala, sabana ira mboto ledo nosisani ante Alatala.

Pompakita 21:7

Isema-sema padagi, rakavana pura-pura anu niuliKu pangane. Bo Yakumo majadi Alatalara bo ira majadi anaKu.