Efesus 1:17 - Kaili Ledo

¹⁷ Yaku nekakai nte Tuamata Alatala anu nakuasa bo naoge, anu nisomba nTuputa Yesus Kristus. Yaku nerapi ala Ia mombadekei Nosa GasaNa ka komiu. Bo Nosa Gasa mompakanoto raramiu bo mompopaisani Alatala ka komiu sampe komiu mpuu-mpuu mosisani belo ante Alatala.

Efesus 1:17 ပူးပေါင်းရင်းမြစ်များ

Matius 11:25

Tempo haitu nosambayamo i Yesus. NiuliNa, “Tata, Komiumo Tupu nu langi bo tana. Yaku nosukuru nte Komiu sabana nipopaisaniMiu pura-pura anu pangane ka tona ledo natau. Tapi nitabuniakaMiu ka tona nangisani bo tona napande,

Matius 11:27

Naupu haitu, i Yesus notesa ka tona ri sia, “Pura-pura nidekei nTuamaKu ka Yaku. Ledo ria tona mpuu-mpuu nosisani ante Yaku, Ana nu Alatala, aga TuamaKu Alatala. Bo ledo ria tona mpuu-mpuu nosisani ante TuamaKu aga Yaku, AnaNa, bo isema-sema Kupodota, Kupopaisanika TuamaKu ka ia.

Matius 16:17

Nanguli i Yesus, “Mabelo mpuu iko, Simon, ana i Yunus! Sabana, ledo manusia nompopaisani haitu ka komiu. TuamaKu ri suruga nompopaisani ka iko isema Yaku.

Matius 20:33

Nesana ira randua, “Pue, kami madota mekita!”

Matius 6:13

Nee rapalamba kami rapesori bo kabasakamo kami lako ri kuasa Magau nu Seta. [Sabana Komiumo Magau nakuasa bo nipokumaaka sampe ri kasae-saena. Amin.]

Lukas 12:12

Apa tempo haitu, Nosa Gasa nu Alatala mboto mompatuduki ka komiu nuapa masipato raulimiu.”

Lukas 2:14

“Ratoiyamo Alatala ri suruga! Bo ri dunia, tona nipokonoa nu Alatala manggava katuvua nabelo!”

Lukas 21:15

Apa Yaku mboto mombadekei ka komiu tesa-tesa bo noto mpekiri sampe ledo maria saitoa balimiu mompakule mombadagi bara mombabali tesamiu.

Yohanes 14:17

Topetulungi haitumo Nosa Gasa nu Alatala anu mompopaisani anu nakana ka komiu. Tona ri dunia hitu anu ledo nomparasaya, ledo mamala mantarima Ia sabana ledo nikitara Ia bo ledo nosisani ante Ia. Tapi komiu nosisani ante Ia sabana Ia nosanggani-nggani ante komiu sii-sii, bo domo masae Ia monturo riara ntaimiu.

Yohanes 14:26

Tapi ane Nosa Gasa nu Alatala makava, rapatudukiNa ka komiu mpengaya-ngaya bo rapopatoraNa ka komiu pura-pura anu nitesaKu ka komiu. Apa Iamo Topetulungi anu ratudu nTuamaKu manjambei Yaku.

Yohanes 16:3

Rapoviara ivesia ka komiu sabana ira ledo nosisani ante TuamaKu bo ledo muni nosisani nte Yaku.

Yohanes 17:3

Iveimo sampe manusia matuvu mabelo sampe ri kasae-saena: ira mosisani nte Komiu, Alatala aga saito-itoMiu nakana, bo ira mosisani muni ante Yaku, i Yesus Kristus, anu nituduMiu.

Yohanes 20:17

Nanguli i Yesus ka ia, “Nee rakabe Yaku, apa Yaku dopa neore hau nte TuamaKu. Tapi koimo hau nte sampesuvu-sampesuvuKu bo uli ka ira ivei: ‘Yaku hau nte TuamaKu bo Tuamamiu, haitumo Alatala nisombaKu bo nisombamiu.’ ”

Suro-Suro 6:10

Tapi ledo nipakulera nombasapu anu niuli i Stefanus, sabana Nosa Gasa nu Alatala nombadekei kapande ka ia notesa.

Suro-Suro 7:2

Nesana i Stefanus, “Totua-totua bo sampesuvu-sampesuvu. Epemo tesaku hitu. Dopame i Abraham totuata nggaulu nolinja hau ri ngata Haran, tempo ia da nonturo ri tana Mesopotamia, Alatala toNeliu KaogeNa nakava nte ia.

Roma 1:28

Tona gahaitu ledo nadota mosisani ante Alatala. Jadi Alatala nompalamba ira rakeniaka mpekirira nadaa sampe ira novia anu ledo masipato rapoviara.

Roma 15:6

ala komiu mosangu rara bo mosangu suara mompakaoge Alatala, Tuama nTuputa i Yesus Kristus.

1 Korintus 12:8

Saito tona nidekeika nu Nosa Gasa pompakule mapande motesa. Tona ntanina nidekeika nu Nosa Gasa haitu muni pompakule mombatentei anu nipopaisani nTupu ka ia.

1 Korintus 14:6

Sampesuvu-sampesuvu, ane rapana yaku makava nte komiu bo mompake basa-basa nopuna lako nte Nosa Gasa, nuapa gunana haitu ka komiu? Natantu ledo ntoto ria gunana. Tapi kana mariapa gunana ka komiu ane kupakalanto pepatuduki nitarimaku lako nte Alatala, atau kutentei ka komiu pangisaniku Alatala, atau kupasimbayu tesa nitarimaku lako nte Alatala, atau kupatuduki komiu.

1 Korintus 2:10

Tapi belo nipakasadia nu Alatala haitu, nipopaisaniNa ka kita lako ri Nosa GasaNa. Apa Nosa Gasa nu Alatala nangisani mpengaya-ngaya, sampe nau patuju nu Alatala anu dopa nisani nu manusia, nisaniNa pura.

1 Korintus 2:8

Ledo ria saitoa topoparenta ri dunia nadaa hitu nangisani patuju nu Alatala haitu. Apa ane rapana nisanira patujuNa haitu, natantumo ledo rapakura ri kayu salib i Pue anu nakuasa.

2 Korintus 12:1

Yaku kana mangoe karoku mboto, nau ledo ria gunana. Jadi kutesa ruru anu nipopakita bo anu nipopaisani i Pue Yesus ka yaku.

Efesus 1:3

Ratoiyata Alatala, Tuama nTuputa Yesus Kristus! NidekeiNa ka kita mpengaya-ngaya belo lako ri suruga sabana kita nosangu rara ante i Yesus Kristus.

Efesus 3:5

Ri tempo nggaulu nia haitu dopa nipopaisani ka manusia. Tapi sii-sii Nosa Gasa nu Alatala nompopaisani nia nu Alatala haitu ka kami suro-suroNa bo nabi-nabiNa.

Efesus 4:13

sampe kaupuna kita pura-pura mpuu-mpuu mosangu rara sabana kita nomparasaya Ana nu Alatala bo mpuu-mpuu nosisani nte Ia. Bo kita pura-pura mantambai manoto, bo pomparasayata mantambai maroso sampe domo makura nuapa-nuapa. Bo kita majadi nasimbayu mpo i Kristus mboto, nanoto bo naroso.

Filipi 3:15

Jadi, kita toroso nomparasaya kana mosangu pekiri mompasimbuku mangoseaka i Kristus evamo niuliku pangane. Tapi ane maria pekirimiu da nosisala nte pekiriku, damo Alatala mboto mompakanoto raramiu.

2 Timotius 2:25

Ia kana malusu rarana mompatuduki tona nangeva ia, mbelaka da mamala ira rakeni nu Alatala majea lako ri pokainggura nasala bo mangisani pepatuduki nakana.

Titus 1:1

Sampesuvuku i Titus: Sura hitu lako nte yaku Paulus, batua nu Alatala bo suro i Yesus Kristus. Yaku nianggatakaNa bo nisuroNa mompakaroso pomparasaya ntona nipelisi nu Alatala. NituduNa muni yaku mompatuduki ira ala rasanira pepatuduki nakana, anu manggeni ira matuvu nangoseaka dota nu Alatala.

Yakobus 2:1

Sampesuvu-sampesuvuku, komiu nomparasaya i Yesus Kristus, Tuputa nakuasa, jadi nee aga mompelenje.

2 Petrus 1:3

Alatala nompake barakaNa mboto mombadekei pura-pura niparaluuta ala rapakuleta matuvu mangoseaka dotaNa. Nitarimata pura-pura haitu sabana kita nosisani ante Alatala, anu nompokio kita mombarasai kaogeNa bo kabeloNa.

2 Petrus 3:18

Tapi komiu kana mantambai mosisani belo ante Tuputa Yesus Kristus, Topepakasalama, bo mantambai mombarasai kabelo raraNa riara nggatuvumiu. Iamo masipato ratoiyata bo rabilata, sii-sii bo sampe ri kasae-saena. Amin. Tabe lako nte yaku, Petrus

Pompakita 7:12

Niulira, “Amin! Ratoiyata Tuputa Alatala! Rapakaogeta Ia! Ratesata kanotoNa, raulita tarima kasi ka Ia. Rabilata Ia bo ratesata kuasaNa bo kabarakaNa sampe ri kasae-saena. Amin!”