2 Timotius 4:5 - Kaili Ledo

⁵ Haitumo sampe niuliku ka iko, Timotius, iko kana mombakuasai karomu mboto nau bara nuapa majadi. Tidamakamo tempo nasusa. Pasimbukumo mompatolele Kareba Belo, bo povia puramo pokarajaa niparasaya nu Alatala ka iko.

2 Timotius 4:5 ပူးပေါင်းရင်းမြစ်များ

Matius 25:16

Tona niparasayaka lima-njobu mpeka doi bulava kaliu-liu hau nompagoli doi haitu sampe nikavana anana lima-njobu mpeka muni.

Markus 13:34

Haitu nasimbayu nte porapa hitu: Naria saito tona hau ri ngata nakavao. Dopame ia hau, nidekeina mami kuasa ka batua-batuana mombaurusi banuana. Saito-saito nipakatantuna pokarajaa ka ira. Bo topojagai vamba nitevaina mainga-inga ante kakavana.

Markus 13:37

Anu nitesaKu hitu ka komiu, Kutesa muni ka pura-pura tona. Komiu kana mainga mompopea kakavaKu!>>

Lukas 12:37

Nabelo mpuu batua haitu ane manjili madikara bo rakavana ira da nemata! Pariaramo! Madika haitu mompasua baju pokarajaa bo ratuduna ira monturo, bo ia mboto mombasondu kandea ka ira!

Suro-Suro 21:8

Naeo mpadondo napolamo kami sampe nakava ri ngata Kaisarea. Ri sia, kami hau nonturo ri banua i Filipus, saito topompatolele Kareba Belo. Ia muni saito lako ri ira papitu anu nipelisi ri ngata Yerusalem bara ipia mantulungi suro-suro.

Roma 15:19

bo sabana kabaraka-kabaraka bo tanda-tanda nipokumaaka nipoviaku ante kuasa Nosa Gasa. Lako ri ngata Yerusalem sampe ri tana Ilirikum, nipatoleleku pura-pura Kareba Belo i Yesus Kristus ka tona.

Efesus 4:11

Iamo nompalele pedekei-pedekei ka kita. Sanu nidekeikaNa pompakule majadi suro, sanu nidekeikaNa pompakule majadi nabi anu mompasimbayu tesa nitarimana lako nte Alatala. Sanu muni nidekeikaNa pompakule majadi topompatolele Kareba Belo, bo ntanina nidekeikaNa pompakule manggeniaka bo mompatuduki todea topomparasaya.

Efesus 4:12

NipaleleNa pedekei haitu ala kita todea nu Alatala rapakagana ala rapakuleta mantui pokarajaa nu Alatala. PatujuNa muni ala kita anu najadi karo i Kristus mantambai karosota,

Kolose 1:25

Yaku nianggataka nu Alatala mantulungi todea topomparasaya; niparasayakaNa yaku pokarajaa haitu ala kupasimbayu pura-pura karebaNa ka komiu tona ledo toYahudi.

Kolose 4:17

Bo ulika i Arkhipus ivei: “Pakaupumo pokarajaa nidekei nu Alatala ka iko!”

1 Tesalonika 5:6

Jadi kita kana mainga bo manoto rarata, nee mamonjo-monjo mpo tona da natuvu ri kalandana.

1 Timotius 4:12

Nee mupalamba tona mompandaente iko sabana iko da namuda. Tapi iko kana majadi jonjo ka topomparasaya riara tesamu, pokainggumu, pepotovemu ka roa, pomparasayamu nte i Pue, bo kagasa katuvumu.

1 Timotius 4:15

Poviamo pura-pura pokarajaa haitu ante mpuu-mpuu rara ala rasani ntodea iko batena nantambai pangoseakamiu dota nu Alatala ka iko.

2 Timotius 1:8

Jadi, nee maeya matamu motesaki Tuputa i Yesus, bo nee maeya matamu manggita yaku nitarunggu sabana pokarajaaku nompatolele Kareba i Yesus. Tapi iko kana masadia mantingayo kasusa nasimbayu mpo yaku sabana iko nompatolele Kareba Belo. Bo Alatala mombadekei kuasa ka iko mantingayo kasusa haitu.

2 Timotius 2:10

Jadi yaku nombatidamaka mpengaya-ngaya kasusa ala mamala kutulungi tona nipelisi nu Alatala sampe ira muni mamala momparasaya i Yesus Kristus bo rapakasalama bo matuvu mabelo mosanggani-nggani nte Alatala sampe ri kasae-saena.

2 Timotius 2:3

Iko tantara i Yesus Kristus nabelo. Jadi iko kana masadia mombarasai kasusa nosanggani-nggani nte yaku.

2 Timotius 4:17

Tapi i Pue Yesus nantulungi yaku, bo Ia nompakaroso yaku sampe nipakuleku nompatolele pura-pura Kareba Belo ka pura-pura tona anu ledo toYahudi ri sii. Kaupuna yaku nikabasaka lako ri kuasa ntona madota mompatesi yaku.

Ibrani 13:17

Oseakamo parenta-parenta nu pakeni-pakenimiu bo pekoumo nte ira, sabana iramo nombajagai pomparasayamiu. Makava tempona bara maipia ira kana manguli pakalanto ri ngayo nu Alatala berimbana komiu nikeniakara. Jadi pekoumo nte ira ala ira mamala mantui pokarajaa haitu ante damba nu rara. Ane komiu ledo mekou, aga masusa rarara bo haitu ledo manggeni belo ka komiu.

1 Petrus 1:13

Sampesuvu-sampesuvu, naria mamimo panjarumakata naroso. Sabana haitu, komiu kana mompakanoto raramiu bo mainga, bo maroo manjarumaka belo radekei ka komiu tempo i Yesus Kristus makava mpanjili.

Pompakita 3:2

Pembangumo! Pakarosomo pomparasayamiu anu damo sakide. Dopame mamate pomparasayamiu anu damo sakide, pakaroso mamimo. Apa nikitaKu lako ri pura-pura pokainggumiu, nau sangaya dopa ria nagana ri panggita nu Alatala.