2 Timotius 4:17 - Kaili Ledo

¹⁷ Tapi i Pue Yesus nantulungi yaku, bo Ia nompakaroso yaku sampe nipakuleku nompatolele pura-pura Kareba Belo ka pura-pura tona anu ledo toYahudi ri sii. Kaupuna yaku nikabasaka lako ri kuasa ntona madota mompatesi yaku.

2 Timotius 4:17 ပူးပေါင်းရင်းမြစ်များ

Matius 10:19

Ane komiu rakeni ri ngayora, nee makini raramiu mompekirika nuapa raulimiu bara berimba komiu mesana ka ira. Apa ri tempo haitu radekei ka komiu tesa-tesa masipato raulimiu ka ira.

Lukas 1:1

Teopilus nibilaku: Nadeamo tona nompasimbuku notulisi nakana sunju pura-pura anu nipovia i Yesus ri tatangata.

Lukas 21:15

Apa Yaku mboto mombadekei ka komiu tesa-tesa bo noto mpekiri sampe ledo maria saitoa balimiu mompakule mombadagi bara mombabali tesamiu.

Suro-Suro 23:11

Kamaile bongina, i Pue Yesus neangga ri sinjori i Paulus bo nanguli, “Pakaroo raramu. Nipatolelemumo tesaKu ri ngata Yerusalem, ivesia muni tesaKu kana mupatolele ri ngata Roma!”

Suro-Suro 9:15

Tapi nanguli i Pue, “Koimo! Apa nipelisiKumo ia mokarajaa ka Yaku mompatolele karebaKu ka tona ledo noagama Yahudi, ka magau-magau bo ka todea toIsrael muni.

Roma 15:31

Posambayamo ala yaku ledo rapakadaa ntoYahudi ri bagia Yudea anu ledo nomparasaya i Yesus. Bo posambayaka munimo ala topomparasaya ri Yerusalem mantarima mabelo doi petulungi kukeni hitu.

2 Korintus 12:9

Tapi niuliNa ka yaku, “Nemo. Nipotoveku iko, bo haitu naganamo ka iko. Apa ane nalente iko, kuasaKu malanto mpuumo riara nggatuvumu.” Jadi, haitumo sampe yaku nadamba nangoe anu nompopakita kalenteku, apa ane yaku nalente, kuasa i Kristus nokarajaa riara ntaiku.

Efesus 3:8

Yaku natueipa pade pura-pura todea nu Alatala ntanina. Tapi naupa ivesia, Alatala nabelo mpuu nte yaku bo nidekeiNa ka yaku pokarajaa mompatolele Kareba Belo ka komiu tona ledo toYahudi. Kareba haitu notesaki kabelo i Kristus anu naoge mpuu, ledo rapakuleta mombarekena.

1 Timotius 1:12

Yaku notarima kasi nte Tuputa Yesus Kristus sabana nipekiriNa yaku namala raparasaya mompatolele Kareba Belo, bo nidekeiNa kuasa ka yaku ala kupakule mombatui pokarajaa haitu.

2 Timotius 2:1

Jadi Timotius, anaku, pakaroso raramu ante petulungi nidekei nu Alatala lako ri kabelo raraNa ka kita anu nosangu rara nte i Yesus Kristus.

2 Timotius 2:9

Yaku hii nipandasa sabana nompatolele Kareba Belo haitu. Yaku nipou rante nasimbayu mpo tona nadaa. Tapi Tesa nu Alatala ledo namala rarante, kana matolele ri umba-umba.

2 Timotius 3:11

Nipeintamu mbotomo berimba yaku naroo tempo yaku nipandasa bo nipakasusa evamo najadi ri karoku ri ngata-ngata Antiokhia, Ikonium, bo Listra bara ipia. Yaku mpuu-mpuu nipandasa, tapi Tupu bate-batena nompakasalama yaku lako ri pura-pura kasusaku haitu.

2 Timotius 4:5

Haitumo sampe niuliku ka iko, Timotius, iko kana mombakuasai karomu mboto nau bara nuapa majadi. Tidamakamo tempo nasusa. Pasimbukumo mompatolele Kareba Belo, bo povia puramo pokarajaa niparasaya nu Alatala ka iko.

Titus 1:3

Sii-sii ri tempo nipakatantuNa mboto, nipopaisani nu Alatala mpuumo pojanjiNa haitu ka manusia riara karebaNa anu nipatoleleku. Kareba Belo haitu niparasayaNa ka yaku bo nipatoleleku nangoseaka parenta nu Alatala, Topompakasalama kita.

Ibrani 11:33

Lako ri pomparasayara, sanu ira nombadagi magau-magau. Nipoviara dota nu Alatala jadi nitarimara anu nijanji nu Alatala ka ira. Sanu ira nombaramu nganga nu singa.

1 Petrus 5:8

Komiu kana mainga bo manoto rara, sabana balimiu, Magau nu Seta hau tumai nasimbayu mpo singa nongao-ngao nompengavu tona rasakana.

2 Petrus 2:9

Jadi lako ri tesa pangane, nisanita Alatala nompakule mompakasalama topangoseaka dotaNa tempo ira manggava pesori. Bo nipakuleNa muni mombatavani tona nadaa sampe ira rahuku ri Eo Potangara.