2 Timotius 3:15 - Kaili Ledo

¹⁵ Lako ri kakodimu nisanimu isi Buku Gasa, bo Buku Gasa haitumo nompakanoto raramu sampe iko namala nomparasaya i Yesus Kristus bo rapakasalama.

2 Timotius 3:15 ပူးပေါင်းရင်းမြစ်များ

Matius 22:29

Nesana i Yesus, “Nasala mpuu komiu sabana ledo nisanimiu isi Buku Gasa, bo ledo muni nisanimiu kuasa nu Alatala.

Lukas 1:15

Ia majadi tomaoge ri panggita nu Alatala. Ia ledo manginu anu nepakalangu. Lako ri pompoanakame, ia rakuasai Nosa Gasa nu Alatala.

Lukas 2:40

Ngana haitu nantambai kambasona, bo nantambai karosona. Napore katauna bo ia nipotove nu Alatala.

Lukas 24:27

I Yesus nombatesa ka ira pura-pura anu nitulisi ri Buku Gasa, anu nombaboto karoNa mboto, nompamula lako ri buku-buku nitulisi Nabi Musa sampe ri buku-buku nabi ntanina.

Lukas 24:32

Pade nosiulikamo ira, “Siamo sampe nasana rarata tempo Ia notesa ka kita ri dala pangane bo nombatentei isi Buku Gasa ka kita!”

Lukas 24:45

NipakanotoNa pekirira ala rapakulera mombapaha isi Buku Gasa.

Yohanes 5:47

Tapi ane ledo niparasayamiu anu nitulisi Nabi Musa, berimbamo komiu mamala momparasaya tesaKu?”

Suro-Suro 10:43

Pura-pura nabi nggaulu notesa i Yesus. Niulira isema-sema momparasaya i Yesus, dosana raampungi ante kuasa i Yesus.”

Suro-Suro 13:29

Naupu nipandasara i Yesus, evamo nitulisi ri Buku Gasa, karobataNa nitoraka lako ri kayu salib bo niboli riara nu dayo.

Suro-Suro 16:1

I Paulus bo i Silas nompapola polipara hau ri ngata Derbe, pade napola hau ri ngata Listra. Ri sia naria saito topangoseaka i Yesus nosanga i Timotius. Tinana toYahudi anu nomparasaya i Yesus munimo. Tapi tuamana toYunani.

Suro-Suro 17:2

Jadi i Paulus hau ri banua petupu haitu nangoseaka kabiasana bo nosinjula pekiri ante tona nasiromu ri sia. Talu-minggu nosunju-sunju ri eo penonto, ia notesa isi Buku Gasa ka ira.

Suro-Suro 26:24

Da notesa i Paulus nanjaliku karona, nongaremo Gubernur Festus, “Nabayamo iko, Paulus! Pangisanimu nadea tutu nompakabaya iko!”

Roma 1:2

Kareba haitu nijanjiNa nggaulu bo nipopaisaniNa ka nabi-nabiNa. Pura-pura haitu nitulisi riara Buku Gasa.

Roma 16:26

Tapi ri tempo sii-sii, nia haitu nipopaisani ka kita riara buku nitulisi nu nabi-nabi nggaulu. Bo Alatala anu natuvu sampe ri kasae-saena, nantudu ala niaNa haitu rapopaisani ka tona ri umba-umba ala pura-pura manusia mamala momparasaya bo matundu nte i Kristus.

Roma 2:27

Ane ivesia, pokainggu ntona ledo toYahudi nompopakita kasala ntoYahudi. Sabana, kita toYahudi naria Atura agama nitulisi, bo kita muni nisuna tandana kita todea nu Alatala, tano mai kita ledo nangoseaka parentaNa. Ira ledo nisuna tapi iramo anu nangoseaka parenta-parenta riara Atura agama.

1 Korintus 1:21

Alatala napande mpuu, bo nipakatantuNa manusia ledo mamala mosisani ante Ia ane aga manjarumaka kapandera mboto. Tapi nibotusiNa mompakasalama isema-sema momparasaya Kareba Belo nipatolele kami. Tano mai tona ri dunia nanguli Kareba haitu aga tesa ntodoyo.

Efesus 6:4

Komiu anu najadi tuama-tuama nu ngana, nee rapoviamiu anu mompakadua rara anamiu. Tapi piaramo ira. Patuduki bo popatora ira ante pepatuduki lako nte i Pue.

1 Timotius 4:13

Papolamo mombaca Buku Gasa ka todea topomparasaya bo nee menonto mompakaroso pomparasayara bo mompatuduki ira sampe makava yaku.

2 Timotius 1:1

Timotius, iko nipotoveku mpo anaku mboto: Sura hitu lako nte yaku, i Paulus. Nangoseaka dota nu Alatala, yaku nianggatakaNa majadi suro i Yesus Kristus ala mompatolele kareba anu nantesa katuvu mabelo sampe ri kasae-saena anu nijanji nu Alatala. Kita nanggava katuvu nabelo haitu sabana kita nosangu rara nte i Yesus Kristus. Kuperapi Tuamata Alatala bo Tuputa Yesus Kristus mompoasi iko bo mombadekei belo bo katinonto ka iko.

2 Timotius 1:5

Yaku nosukuru nte Alatala apa nitoraku iko nomparasaya i Yesus nte mpuu-mpuu raramu. Tupumu mombine i Lois, bo tinamu, i Eunike anu nokolu nomparasaya. Bo nisaniku pomparasayamu nasimbayu nte pomparasayara.

2 Petrus 3:16

Ri pura-pura surana, pepatudukina nasimbayu nte anu nitulisiku ri bavona. Naria muni sanu tesana nakaja sakide rapaha. Tesana haitu nabiasa nitenggoaka ntona ledo natau bo tona ledo naroso pomparasayara. Ivesia muni nitenggoakara isi ntanina lako ri Buku Gasa. Tapi ira kana rahuku nu Alatala sabana pokainggura haitu.

Pompakita 19:10

Nangepe tesa haitupa, nantaputumo yaku sampe ri tana ri ngayo malaeka haitu mombasomba ia. Tapi nangulimo ia ka yaku, “Nemo! Nee rasomba yaku. Sombamo Alatala! Sabana yaku hii aga batua nu Alatala nasimbayu mpo iko bo nasimbayu mpo sampesuvumu sampomparasaya anu naroo nanggangisi pepatuduki nakana nipopaisani i Yesus. Apa pepatuduki nakana nipopaisani i Yesus, haitumo poko nu tesa ntona anu nompasimbayu tesa lako nte Alatala.”