2 Timotius 2:22 - Kaili Ledo

²² Jadi, nee mpuu mangoseaka dota-dota nu rara nadaa anu nipodamba ngana-ngana muda. Tapi pasimbukumo matuvu manoa ri panggita nu Alatala. Pakaroso pomparasayamu, potovemo singgamanusiamu, bo pasimbukumo matuvu mosinggabelo nte ira. Poviamo pura-pura haitu mosanggani-nggani nte pura-pura tona anu nekakai nte i Pue ante rara nagasa.

2 Timotius 2:22 ပူးပေါင်းရင်းမြစ်များ

Suro-Suro 7:59

Tempo i Stefanus da nirempera, nekakaimo ia, “Pue Yesus, siimo nyawaku!”

Suro-Suro 9:14

Sii-sii ia nakava muni ri sii, nidekei kuasa lako ri balengga-balengga ntopanggeni pesomba mombasaka pura-pura kami topomparasaya Komiu.”

Roma 14:17

Apa anu nopoko riara Poparenta nu Alatala, ledo anu nikandeta atau niinuta. Anu nopoko, kita manoa rarata, bo matuvu mosinggabelo ante roata, bo madamba rarata sabana Nosa Gasa nu Alatala naria riara ntaita.

Roma 14:19

Haitu sampe kita kana mompasimbuku matuvu mosinggabelo ante roata, bo mosipakaroso rara.

1 Korintus 1:10

Sampesuvu-sampesuvu, ante kuasa nidekei nTuputa Yesus Kristus ka yaku, kuperapi nte komiu ala komiu mosangu rara. Nemo sampe magero sintuvumiu. Komiu kana masintuvu mosangu rara bo mosangu patuju.

1 Korintus 10:14

Jadi sampesuvu-sampesuvu nipotoveku, haitumo sabana kuuli ka komiu, nee mpuu metupu nte tupu-tupu ntanina.

1 Korintus 14:1

Jadi sampesuvu-sampesuvu, pasimbukumo momparibavo mompotove tona ntanina. Bo pasimbuku munimo manggava pompakule-pompakule lako nte Nosa Gasa. Bo pompakule nogunapa haitumo pompakule mompasimbayu tesa nitarima lako nte Alatala.

1 Korintus 6:18

Nemo mpuu rapogaumiu tona ledo bereimiu mboto! Apa dosa haitu ledo ria kasimbayuna. Isema-sema nompogau tona ledo bereina mboto, mpuu-mpuu nompakagero posangu rarana ante i Pue.

1 Timotius 1:14

Naoge mpuu pepotove nTuputa nte yaku! Lako ri kabelo raraNa nipopompakuleNa yaku momparasaya Ia bo mompotove singgamanusiaku sabana yaku nosangu rara nte i Yesus Kristus.

1 Timotius 1:5

Patuju parentaku hitu ala kita mosimpotove, ante tove neumba lako ri rara nagasa, pekiri rara ntai anu ledo nombasalai kita, bo pomparasayata i Kristus mpuu-mpuu nakana.

1 Timotius 2:8

Dotaku ala ri umba-umba topomparasaya nasiromu mombasomba Alatala, langgai mosambaya ante rara nagasa. Ledo masipato mosambaya ane narau rara atau nosinjanai.

1 Timotius 4:12

Nee mupalamba tona mompandaente iko sabana iko da namuda. Tapi iko kana majadi jonjo ka topomparasaya riara tesamu, pokainggumu, pepotovemu ka roa, pomparasayamu nte i Pue, bo kagasa katuvumu.

1 Timotius 6:11

Tapi iko batua nu Alatala. Nee mpuu mokainggu madaa ivehaitu! Pasimbukumo majadi tona nanoa ri panggita nu Alatala. Pasimbukumo matuvu mangoseaka dotaNa. Kana mupakaroso pomparasayamu, potovemo singgamanusiamu, tidamaka tempo nasusa, bo moinggu malusu.

Ibrani 12:14

Komiu kana mompasimbuku matuvu mosinggabelo ante pura-pura tona. Bo pasimbuku muni matuvu magasa, sabana tona ledo nagasa katuvuna ledo ntoto mamala manggita i Pue.

1 Petrus 2:11

Sampesuvu-sampesuvu nipotoveku, katuvuta ri dunia hitu nasimbayu mpo topesovo bo torata anu nonturo aga sampalai. Jadi yaku mpuu-mpuu nerapi nte komiu, nee raoseakamiu dota rara nadaa anu batena nangeva nyawamiu nangoseaka dota nu Alatala.

1 Petrus 3:11

Ia kana mombakabasaka pokaingguna nadaa bo movia anu nabelo. Ia kana mangelo posinggabelo bo mompasimbuku matuvu mosinggabelo ante tona ntanina.

3 Yohanes 1:11

Vegaku, nee mupasiala pokainggu nadaa, tapi pasialamo pokainggu nabelo. Isema-sema novia anu nabelo, iramo ana-ana nu Alatala. Tapi isema-sema novia anu nadaa, ledo ntoto nosisani nte Alatala.