2 Timotius 2:19 - Kaili Ledo

¹⁹ Tapi naupa ivesia, Tesa nu Alatala batena nakana bo namala raparasaya. Tesa nu Alatala naroso mpo pandasi nau ragoya ledo mogoya. Tesa nu Alatala haitu nitulisi ivei: “Nisani nTupu isema todeaNa.” Bo naria tesa ntanina nanguli, “Isema-sema nanguli ia topangoseaka Tupu, kana menonto mokainggu nadaa.”

2 Timotius 2:19 ပူးပေါင်းရင်းမြစ်များ

Matius 24:24

Apa kana meumba topodava manguli iramo Magau Topepakasalama, bo meumba muni nabi-nabi mpodava anu movia tanda-tanda nipokumaaka bo kabaraka-kabaraka mombabagiu tona. Ane mamala, nau tona nipelisi nu Alatala rabagiura muni!

Matius 28:19

Jadi koimo komiu, hau ri umba-umba ri dunia, mompatuduki tona lako ri umba-umba ngata majadi topangoseaka Yaku. Diumo ira ante kuasa nTuamata Alatala, Yaku AnaNa, bo Nosa Gasa.

Matius 7:23

Tapi Kupesanaka ira, ‘Ledo nisaniKu komiu! Palaimo lako ri sii, komiu topokainggu nadaa!’ ”

Matius 7:25

Nauda romba bo nakava lono ante poiri nombaburu banua haitu, tapi banua haitu ledo nagero sabana nipovia ri bavo vatu.

Markus 12:16

Jadi nikenira mpuumo. Bo nekutanamo Ia, <> Nesanamo ira, <>

Markus 13:22

Sabana meumba topodava manguli iramo Magau Topepakasalama, bo meumba muni nabi-nabi mpodava. Ira pura-pura movia tanda-tanda nipokumaaka bo kabaraka-kabaraka mombabagiu tona. Ane mamala, nau damo tona nipelisi nu Alatala rabagiura muni.

Lukas 13:27

Tapi tupu nu banua haitu aga mesana ka komiu, ‘Ledo nisaniKu komiu, bo ledo nisaniKu lako ri umba komiu. Palaimo lako ri sii. Komiu pura-pura tona nadaa!’

Lukas 6:48

ia nasimbayu mpo topovia banua. Nikaena pakandala tana bo nipoviana pandasi vatu. Tempo lono bo uve binangga nanggabuntu nodala ri banua, banua haitu ledo nogoya sabana pandasina naroso.

Yohanes 10:14

Yakumo hii topoevu nabelo. TuamaKu nisaniNa Yaku bo Yaku nisaniKu muni Ia. Ivesia muni nisaniKu pura-pura bimbaKu bo bimba-bimbaKu nisanira Yaku. Bo Yaku mamate ala bimba-bimbaKu mamala matuvu.

Yohanes 13:18

Anu niuliKu pangane ledo nambela komiu pura-pura. NisaniKu mamimo tona nipelisiKu, bo kana rapakadupa anu nitulisi riara Buku Gasa ivei: ‘Tona nangande nosanggani-nggani ante Yaku, iamo najadi baliKu.’

Yohanes 3:33

Tapi isema-sema nomparasaya tesaNa haitu, raulina Alatala mpuu-mpuu nakana.

Suro-Suro 11:26

Nosinggavapa ia ante i Saulus, haumo ira randua ri ngata Antiokhia. I Barnabas bo i Saulus nonturo sumai sampae kasaena. Ira nasaro nasiromu nosanggani-nggani nte todea topomparasaya bo nadea mpuu tona nipatudukira. Ri ngata Antiokhia haitumo topangoseaka i Yesus pamula-mulana niuli toKristen.

Suro-Suro 9:14

Sii-sii ia nakava muni ri sii, nidekei kuasa lako ri balengga-balengga ntopanggeni pesomba mombasaka pura-pura kami topomparasaya Komiu.”

Roma 11:2

Alatala ledo nompoara todeaNa anu nipelisiNa lako bara ipiame. Toramo tesa Nabi Elia nitulisi ri Buku Gasa. Tempo ia nompangadu toIsrael ri ngayo nu Alatala niulina ivei:

Roma 12:9

Kita kana mpuu-mpuu mompotove roata. Nee aga mosimpotove ri sumba. Kabasakamo anu nadaa, bo oseakamo anu nabelo

Roma 15:20

Riara pokarajaaku haitu yaku bate-batena nompasimbuku nompatolele Kareba Belo ka tona anu dopa niepera sanga i Kristus. Yaku ledo madota mombangu banua ri bavo pandasi nipovia ntona ntanina.

Roma 15:9

Bo muni i Kristus nakava ala tona ledo toYahudi mantoiya Alatala, sabana kabelo raraNa nte ira. Riara Buku Gasa naria tesa nombaboto tempona tona ledo toYahudi mantoiya Alatala mosanggani-nggani nte toYahudi ivei: <> 2 Samuel 22:50; Mazmur 18:50

Roma 8:28

Bara nuapa-nuapa majadi, nisanita Alatala nompasiayuna ala manggeni belo ka kita topompotove Ia, haitumo kita anu nipokioNa majadi todeaNa nangoseaka niaNa mboto.

Roma 9:11

Dopame i Ribka noana, Alatala nanguli ka ia ivei: <> Tempo haitu, ngana randua pangane dopa nipoanaka bo dopa novia nuapa-nuapa nabelo atau nadaa. Tapi Alatala nompakatantu mamimo ngana mbana nipelisiNa mantarima belo lako nte Ia. PatujuNa ala malanto ka kita, ane Alatala nompelisi tona manggava belo lako nte Ia, ledo nipelisiNa nangoseaka pokainggura, tapi nipelisiNa nangoseaka dotaNa mboto.

1 Korintus 8:3

Tapi isema-sema mpuu-mpuu nompotove Alatala, ia niposisani nu Alatala.

2 Korintus 7:1

Sampesuvu-sampesuvu nipotoveku. Pura-pura janji nu Alatala haitu nipambela ka kita. Jadi kita kana mombakabasaka pura-pura pokainggu bo pekiri nadaa. Kita kana mangoseaka Alatala ante rarata mpuu-mpuu, bo kana maeka movia anu ledo rapokonoNa.

Galatia 4:9

Tapi sii-sii nisanimiumo Alatala—atau nabelopa rauli, nisani nu Alatala komiu. Jadi nakuya komiu madota matundu mpanjili nte anu ledo nompakule mantulungi komiu majadi manoa ri panggita nu Alatala? Nakuya komiu madota rapobatuara mpanjili?

Efesus 2:20

Kita topomparasaya i Kristus nirapaka gana-gana nu banua nibangu nu Alatala. Suro-suro i Kristus bo nabi-nabi nirapaka pandasi nu banua haitu. I Yesus Kristus nirapaka vatu nu pandasi anu nelabi nopoko.

Efesus 3:15

Iamo Tuama nu pura-pura anu naria, nau kita ri dunia, nau isi suruga.

Efesus 4:30

Jadi, nee rapoviamiu anu mompakabuku rara Nosa Gasa nu Alatala. Toramo! Alatala nombadekei Nosa Gasa ka kita, tandana kita najadi todeaNa. Bo Nosa GasaNa haitu muni najadi panggingisita ala rasanita kita mpuu-mpuu rakabasaka lako ri dunia nadaa hitu ngena.

1 Timotius 3:15

mbelaka masae pade makava yaku, musanimo pokainggu masipato ka pura-pura tona nireke nu Alatala ana-anaNa. Apa kitamo todea anu nombasomba Alatala anu Natuvu sampe ri kasae-saena. Kitamo nanggangisi bo nombajagai pepatuduki nakana lako nte Alatala ala ledo rabaliki ntona, nasimbayu mpo tinja bo pandasi nombatande pakaroso banua.

1 Timotius 6:19

Ane ivesia pokainggura, namala raulita ira nompasiromu kakalumana ri suruga, anu mamala rasarumakara ri tempo makava, bo rakavara katuvu nabelo sampe ri kasae-saena.

Ibrani 11:10

I Abraham nosabara nonturo ri tenda mpo topesovo sabana ia da nantongoraka ponturo ri ngata anu maria sampe ri kasae-saena, ngata niponia bo nibangu nu Alatala.

2 Petrus 3:14

Sampesuvu-sampesuvu nipotoveku, komiu nompopea kajadia-kajadia haitu, jadi pasimbukumo ala pokainggumiu mabelo bo ledo maria anu rasalai atau mepakaeya ri panggita nu Alatala. Bo pasimbukumo matuvu mosinggabelo ante Ia.

1 Yohanes 2:19

Bali-bali i Kristus nesuvu lako nte kita, tapi kakanana ira ledo nosangu pomparasaya ante kita. Ane ira mpuu-mpuu nosangu pomparasaya ante kita, natantu ira da mosanggani-nggani ante kita. Tapi nipalaikaramo kita, jadi nisanita ira ledo mpuu nosangu pomparasaya ante kita.

Pompakita 17:8

Da nokolu, binata nikitamu haitu da naria natuvu, tapi sii-sii domo naria. Tapi ia meumba mpanjili bara maipia lako riara lovu anu ledo rapakule mantuvu kandalana. Maliu haitu ia rahuku sampe ri kasae-saena. Bo tona natuvu ri dunia anu ledo nitulisi sangara riara Buku Katuvua dopame dunia nipajadi nu Alatala, ira mpuu-mpuu mokumaa manggita binata haitu. Sabana, da nokolu binata haitu natuvu, sii-sii domo naria, tapi meumba mpanjili bara maipia.

Pompakita 2:13

NisaniKumo ngata niponturomiu, haitumo ri ngata ponturo Magau nu Seta. Tapi naupa ivesia, naroso pomparasayamiu Yaku. Tempo sabiKu nosanga i Antipas nipatesi ri ngatamiu, komiu ledo nesapu nomparasaya Yaku. I Antipas haitu sabiKu bo ia bate-batena nomparasaya Yaku sampe ia nipatesi ntona ri ngatamiu, haitumo ri ngata nikuasai Magau nu Seta.

Pompakita 21:14

Tembo ngata haitu nipopeangga ri bavo sapulu rolonta vatu pandasi bo ri vatu pandasi haitu naria nitulisi sanga sapulu randua suro nu Ana Bimba.

Pompakita 22:4

Bo ira manggita lenjeNa mpuu. Bo sangaNa ratulisi ri kirera pura-pura.

Pompakita 3:8

NisaniKumo pura-pura pokainggumiu. NisaniKu munimo ledo naroso ntoto pomparasayamiu, tapi komiu natutu nangoseaka tesaKu bo ledo nisapumiu Yaku. Epemo! Yaku nobuka ka komiu sangu vamba, bo ledo ria saitoa tona mamala mombatutuina.