2 Timotius 1:7 - Kaili Ledo

⁷ Apa Nosa Gasa nipopanau nu Alatala ka kita ledo nompakaeka kita, tapi nompakaroso rarata, bo nompopompakule kita mombatidamaka dota rarata mboto bo mompotove singgamanusiata.

2 Timotius 1:7 ပူးပေါင်းရင်းမြစ်များ

Lukas 10:19

Jadi, pariaramo! Yaku mombadekei kuasa ka komiu ala rapakulemiu mombajeje ule bo supitole bo mombadagi pura-pura karoso nu balita, bo ledo ria nuapa-nuapa mamala mombakuyasi komiu.

Lukas 15:17

Kaupuna, nanotomo rarana, bo nipekirina, ‘Tona nokarajaa ka tuamaku nelabi-labi kandeara, tapi yaku ri sii mamate ara.

Lukas 24:49

Pariaramo! Kupopanau ka komiu Nosa Gasa anu nijanji nTuamaKu Alatala. Jadi popeamiu ri sii ri ngata Yerusalem sampe kuasa nu Alatala manau nte komiu.”

Lukas 8:35

Nangepe tesa ntopojaga bavu, hau puramo ira manggita anu najadi. Tempo ira nakava nte i Yesus, nikitara tona nipesua nu seta pangane nakabasakamo lako ri seta-seta bo nonturo ri sinjori i Yesus. Nopakeamo ia bo nanotomo rarana. Nanggita haitu, naeka puramo ira.

Yohanes 14:27

Katinonto rara Kudekei ka komiu, haitumo katinonto nu raraKu mboto. Bo anu Kudekei ka komiu haitu ledo nasimbayu nte anu nidekei nu dunia nadaa ka komiu. Jadi nee masusa raramiu, nee maeka.

Suro-Suro 1:8

Tapi komiu manggava kuasa ane Nosa Gasa nu Alatala manau nte komiu. Bo komiu mompatolele karebaKu ka tona ri ngata Yerusalem, ri bagia Yudea bo Samaria, sampe ri njumangu dunia.”

Suro-Suro 10:38

Nisanimiu muni Alatala nompelisi i Yesus toNazaret bo nidekeiNa Nosa Gasa bo kuasa. Nisanimiu muni i Yesus hau ri umba-umba novia anu nabelo, bo nipakabeloNa pura-pura tona nipandasa Magau nu Seta sabana Alatala naria nte Ia.

Suro-Suro 20:24

Tapi ledo kupotove katuvuku hitu. Nau yaku mpuu-mpuu rapatesi, ledo makuya, asaa kupakaupu pokarajaa nidekei i Pue Yesus ka yaku mompatolele Kareba Belo anu nombatesa kabelo nu Alatala nte kita.

Suro-Suro 21:13

Tapi nesana i Paulus, “Nakuya komiu notumangi nompakabuku raraku? Yaku hii nasadiamo hau ri ngata Yerusalem nau yaku rasaka, nau sampe rapatesi sabana pangoseakaku i Pue Yesus!”

Suro-Suro 26:11

Nadea ngganimo yaku nompandasa ira riara banua petupu. Nipasimbukuku nobarusu ira ala domo raoseakara i Yesus. Nagigi mpuu raraku nompekirika ira sampe yaku hau nangelo ira ri ngata-ngata nakavao.”

Suro-Suro 26:25

Tapi nesanamo i Paulus, “Yaku hii ledo nabaya. Tesa-tesa niuliku hitu nakana bo nesuvu lako ri pekiriku nanoto.

Suro-Suro 6:8

I Stefanus mpuu-mpuu nipobelo nu Alatala. Bo naria kuasa nu Alatala nte ia sampe nadea kabaraka bo tanda nipokumaaka nipoviana ri ngayo ntodea.

Suro-Suro 9:22

Tapi nasae-sae nantambai-mbai karoso i Saulus nompatuduki tona. Ia mpuu-mpuu natau nompakalanto ka ira, i Yesusmo Magau Topepakasalama anu nijanji nu Alatala, sampe toYahudi nonturo ri ngata Damsyik domo nipakulera nombabali tesana.

Roma 5:5

Ane kita manjarumaka Alatala, ledo masoa bukuta. Nisanita Ia mpuu-mpuu mompakadupa pura-pura pojanjiNa, sabana nirasaita tove nu Alatala riara ntaita lako ri pokarajaa nu Nosa Gasa anu nidekei nu Alatala ka kita.

Roma 8:15

Nosa Gasa anu nidekei nu Alatala ka kita, ledo manggeni kita majadi batua sampe kita matuvu ante eka rara. Tapi Nosa Gasa haitu nanganggataka kita majadi ana-ana nu Alatala. Ante pekeniaka Nosa Gasa kita mamala mekakai nte Alatala, <>

1 Korintus 2:4

Tesa nipatoleleku ledo niuliku ante tesa-tesa mpeopa anu nopuna lako ri kapande nu manusia. Tapi tempo yaku nompatolele kareba haitu, nikitamiumo kuasa lako ri Nosa Gasa nu Alatala.

Galatia 5:22

Tapi ane tona nikeniaka Nosa Gasa nu Alatala, iveimo inggura: ira nosimpotove, ira nadamba bo natinonto rarara. Ira nosabara, nalusu bo nabelo rarara nte tona ntanina. Ira namala raparasaya,

Kolose 1:8

Iamo nanguli ka kami, komiu nosimpotove sabana pekeniaka Nosa Gasa.

Ibrani 2:15

Ante nompakaropu kuasa Magau nu Seta, nikabasakaNa tona anu natuvu mpo batua kasae nggatuvura ri dunia hitu sabana naeka ka kamate.

1 Petrus 1:22

Sampesuvu-sampesuvu, katuvumiu nipakagasamiu sabana komiu nangoseaka pepatuduki nakana. Haitumo sampe komiu namala nompotove sampesuvumiu sampomparasaya ante rara naliangu. Sabana haitu, posipotovemo ante rara mpuu-mpuu.

1 Yohanes 4:18

Ane mpuu-mpuu nirasaita tove nu Alatala nte kita, kita domo maeka nte Alatala. Apa tove nu Alatala ka kita nompakaroso rarata sampe kita domo maeka nte Ia. Ane kita naeka nompekirika Eo Potangara ri kaupu nu dunia, batuana dopa nisanita mpuu Alatala nompotove kita.