2 Timotius 1:10 - Kaili Ledo

¹⁰ Bo sii-sii nakavamo i Yesus Kristus topompakasalama kita bo nikitata kambaso pepotove nu Alatala ka kita. Lako ri Kareba Belo nisanita i Kristus nombadagi kuasa kamate, bo nombadekei katuvua nabelo anu ledo maupu-upu.

2 Timotius 1:10 ပူးပေါင်းရင်းမြစ်များ

Lukas 11:36

Ane pekiri rara ntaita nareme bo ledo naria nuapa-nuapa nalanda, pura-pura katuvuta mareme mpuu mpo anu nivanta mpoindo.” *

Lukas 13:7

Jadi niulikana topokarajaa talua haitu, ‘Peintamo! Talu-mpaemo kasaena tumai njuu yaku mangelo vuana, tapi nau sangu vuana ledo ria nikavaku. Agina ratovosimo kayu hitu. Ledo ria gunana, aga nompakarugi boya ntana.’

Lukas 2:11

Bongina hitu ri ngata pompoanaka Magau Daud, nipoanakamo saito magau mompakasalama komiu. Iamo i Pue, anu nipelisi nu Alatala.

Yohanes 1:9

Reme haitu reme nakana anu nakava ri dunia mompakareme pura-pura manusia.

Yohanes 14:6

Nesana i Yesus, “Yakumo hii dala, Yakumo nompopaisani anu nakana bo Yakumo nombadekei katuvua nabelo. Ledo ria saitoa mamala makava ri ngayo nTuamaKu ane ledo ante Yaku.

Yohanes 20:31

Tapi anu nitulisi riara buku hitu, patujuna ala manggeni komiu momparasaya i Yesus mpuu-mpuu Magau Topepakasalama, Ana nu Alatala. Bo patujuna muni ala komiu mamala manggava katuvua mabelo sampe ri kasae-saena sabana niparasayamiu Ia.

Yohanes 4:42

Naupu sia, niulikara mombine haitu, “Sii-sii niparasaya kami mpuumo, ledo aga lako ri tesamu tapi niepe kami mbotomo tesaNa. Bo nisani kamimo Ia mpuu-mpuu Magau Topompakasalama manusia.”

Yohanes 5:40

Tapi naupa komiu natutu neguru Buku Gasa, komiu bate-batena ledo nadota momparasaya Yaku ala rakavamiu katuvua mabelo haitu.

Suro-Suro 13:23

Lako ri muli i Daud, Alatala nompelisi ka toIsrael saito Magau Topepakasalama nangoseaka pojanjiNa nggaulu, haitumo i Yesus.

Suro-Suro 5:31

Bo Alatala nompakaoge i Yesus bo nipoponturoNa Ia ri sabingga ngganaNa, bo nidekeiNa ka Ia kuasa momparenta bo mompakasalama kita, ala kita toIsrael radekei loga majea lako ri dosa-dosata bo raampungi.

Roma 16:26

Tapi ri tempo sii-sii, nia haitu nipopaisani ka kita riara buku nitulisi nu nabi-nabi nggaulu. Bo Alatala anu natuvu sampe ri kasae-saena, nantudu ala niaNa haitu rapopaisani ka tona ri umba-umba ala pura-pura manusia mamala momparasaya bo matundu nte i Kristus.

Roma 2:7

Sanu tona ledo nasau rarara nokainggu nabelo sabana ira madota ratoiya bo rabila nu Alatala, bo madota manggava katuvu nabelo anu ledo maupu-upu. Bo Alatala mombadekei katuvu nabelo sampe ri kasae-saena ka tona gahaitu.

Roma 3:31

Jadi, kita nireke nanoa sabana pomparasayata i Yesus. Tapi nee rapekirimiu Atura agama ledo noguna. Ledo ntoto nakana! Kakanana, lako ri pomparasayata haitu kita nompakaoge Atura agama.

Roma 6:6

Nisanita katuvuta nokolu nireke namate nosanggani-nggani ante i Kristus ri kayu salib, ala kuasa nu dosa riara nggatuvuta rapakaropu, bo kita domo rakuasai nu dosa.

1 Korintus 15:26

Pade Ia mompakaupu baliNa kaupuna, haitumo kamatea.

1 Korintus 4:5

Jadi nee komiu masalisa mompakatantu sala ntona ane dopa nakava tempona. Popea sampe i Pue Yesus makava mpanjili ri dunia. Iamo mompakalanto pura-pura anu nitabuniaka ri kalandana sii-sii. Iamo mompakalanto mpengaya-ngaya patuju nitabuniaka riara ntai manusia. Ri tempo haitu, Alatala mombatoiya isema-sema masipato ratoiyaNa.

2 Korintus 5:4

Tempo kita da natuvu ri dunia hitu nasumu rarata apa nirasaita nandasa katuvuta. Kita ledo madota mamate bo mogaa lako ri karota, tapi kita madota radekeika karo nabaru lako ri suruga ala karo anu mamate rasambei ante karo anu matuvu sampe ri kasae-saena.

Galatia 5:4

Ane komiu mompasimbuku majadi manoa ri panggita nu Alatala ante mangoseaka Atura agama, komiu nopudusi posangu raramiu nte i Kristus. Komiu notubengosi kabelo rara nu Alatala.

Efesus 1:18

Kuperapi ala Ia mompakareme pekirimiu ala mpuu-mpuu rasanimiu kabelo anu nisarumakata lako nte Alatala anu nompokio kita majadi todeaNa. Kuperapi ala rasanimiu kabelo bo kaoge nu belo nipakasadia nu Alatala radekei ka todeaNa bara maipia.

Efesus 1:9

Alatala nompopaisani ka kita niaNa anu dopa nisani nu manusia bara ipia. Nangoseaka dotaNa mboto, Alatala nompakatantu lako ri nggauluname ala niaNa haitu rapakadupa i Kristus

2 Tesalonika 2:8

pade meumba Topesapuaka. Tapi tempo i Pue Yesus meonga ante kuasaNa nareme, kuasa nTopesapuaka malipo sanggani, bo i Pue Yesus mompatesi ia ante nosa lako ri sumbaNa.

2 Timotius 1:1

Timotius, iko nipotoveku mpo anaku mboto: Sura hitu lako nte yaku, i Paulus. Nangoseaka dota nu Alatala, yaku nianggatakaNa majadi suro i Yesus Kristus ala mompatolele kareba anu nantesa katuvu mabelo sampe ri kasae-saena anu nijanji nu Alatala. Kita nanggava katuvu nabelo haitu sabana kita nosangu rara nte i Yesus Kristus. Kuperapi Tuamata Alatala bo Tuputa Yesus Kristus mompoasi iko bo mombadekei belo bo katinonto ka iko.

2 Timotius 1:8

Jadi, nee maeya matamu motesaki Tuputa i Yesus, bo nee maeya matamu manggita yaku nitarunggu sabana pokarajaaku nompatolele Kareba i Yesus. Tapi iko kana masadia mantingayo kasusa nasimbayu mpo yaku sabana iko nompatolele Kareba Belo. Bo Alatala mombadekei kuasa ka iko mantingayo kasusa haitu.

2 Timotius 4:1

Timotius, petevai hitu niuliku nte mpuu-mpuu raraku. Makava tempona i Yesus Kristus makava mpanjili momparenta ri dunia hitu, bo ratangaraNa pura-pura manusia, tona da natuvu bo tona namatemo. Jadi, kuuli ka iko ri ngayo nu Alatala bo i Yesus Kristus anu nanggita pura-pura poviata:

2 Timotius 4:8

Jadi hitupa nasadiamo hadia padagi ka yaku sabana katuvuku nompakadamba rara nu Alatala. I Pue Yesus Topotangara nanoa, bo ri Eo Potangara ngena radekeiNa hadia haitu ka yaku, bo ledo aga ka yaku tapi ka pura-pura tona nompotove Ia bo nompopea kakavaNa.

Titus 2:11

Iko kana mompatuduki tona matuvu nte pokainggu nabelo, sabana lako ri kabelo rara nu Alatala, nibukaNamo dala ala pura-pura manusia mamala rapakasalama.

Titus 2:13

Apa ane kita da nonturo ri dunia, kita nanjarumaka kakava i Yesus anu mpuu-mpuu mompakasana rarata. Tempo haitu, pura-pura tona manggita kaoge i Yesus Kristus, Iamo Alatala toNeliu KaogeNa bo Topompakasalama kita.

Titus 3:4

Tapi nau kita nokainggu nadaa bara ipia, Alatala nompotove kita bo nipopakitaNa kabelo raraNa tempo nipakasalamaNa kita lako ri dosata.

Ibrani 10:32

Tapi sampesuvu-sampesuvu, toramo katuvumiu tempo bara ipia. Tempo komiu dako nantarima reme lako nte i Pue, nadea susa bo pari nirasaimiu. Tapi naupa ivesia, komiu batena nomparasaya.

2 Petrus 1:1

Sampesuvu-sampesuvuku anu mpuu-mpuu nomparasaya i Yesus Kristus, nasimbayu mpo kami. Iamo Alatala bo Topompakasalama kita, anu nompopompakule pura-pura kita nomparasaya sabana Ia nanoa bo ledo nompelenje. Sura hitu lako nte yaku, i Simon Petrus. Yaku batua bo suro i Yesus Kristus.

2 Petrus 1:11

bo Alatala mboto mantarima komiu ante mabelo riara Poparenta anu naroo sampe ri kasae-saena, haitumo Poparenta nTuputa Yesus Kristus, Topompakasalama kita.

2 Petrus 1:3

Alatala nompake barakaNa mboto mombadekei pura-pura niparaluuta ala rapakuleta matuvu mangoseaka dotaNa. Nitarimata pura-pura haitu sabana kita nosisani ante Alatala, anu nompokio kita mombarasai kaogeNa bo kabeloNa.

2 Petrus 2:20

Mandasa mpuumo ira! Apa bara ipia ira mpuu-mpuu nosisani nte Tuputa Yesus, Topompakasalama kita, sampe ira nikabasakamo lako ri pokainggu nadaa anu nompakagero manusia ri dunia hitu. Tapi naupu sia, ira nipemala bo nikuasai nu pokainggu-pokainggu nadaa haitu mpanjili. Kaupuna, nelabipa kandasa katuvura pade ri pamulana.

2 Petrus 3:18

Tapi komiu kana mantambai mosisani belo ante Tuputa Yesus Kristus, Topepakasalama, bo mantambai mombarasai kabelo raraNa riara nggatuvumiu. Iamo masipato ratoiyata bo rabilata, sii-sii bo sampe ri kasae-saena. Amin. Tabe lako nte yaku, Petrus

2 Petrus 3:2

Patujuku, ala ratoramiu tesa-tesa niboto nu nabi-nabi nu Alatala nggaulu, bo ala ratoramiu muni parenta-parenta lako nte Tuputa Yesus, Topepakasalama. ParentaNa nipasimbayu nu suro-suroNa anu nakava nte komiu.

1 Yohanes 1:2

Tempo Ia naria ri dunia, nikita kami Ia. Bo sii-sii kami nompasimbayu ka komiu anu nikita kami. Kami nosabiki Iamo anu nombadekei katuvua nabelo sampe ri kasae-saena. Ri lamba pamulana Ia naria nosanggani-nggani ante Tuamata Alatala bo Ia natuvu ri dunia hitu nte kami.

1 Yohanes 4:14

Ledo aga haitu. Kami ana-anaguru i Yesus nikita kamimo Ia, Ana nu Alatala, bo kami nosabiki Iamo nitudu nTuamaNa Alatala tumai ri dunia majadi Topompakasalama manusia.

Pompakita 18:1

Naupu malaeka pangane notesa, nikitaku saito malaeka ntanina nanau lako ri suruga. Naoge mpuu kuasana, bo lako ri karemena njumangu dunia nareme.

Pompakita 2:7

Isema-sema naria talingana epemo pakabelo-belo anu niuli Nosa Gasa nu Alatala ka todea topomparasaya ri umba-umba ngata. Isema-sema padagi kana Kudekei mangande vua lako ri Kayu Katuvua anu naria riara Pampa nu Alatala ri suruga.”

Pompakita 20:14

Isema-sema ledo nitulisi sangana riara Buku Katuvua haitu, nitedaka riara ntasi apu. Haitumo niuli kamatea karongganina, pehuku riara ntasi apu. Naupu haitu domo ria kamatea bo domo ria ponturo ntomate, apa kamatea bo ponturo ntomate nitedaka riara ntasi apu.

Pompakita 22:14

Nabelo mpuumo tona notoposi pakeana sampe nagasa, apa iramo rapaloga mangande vua lako ri Kayu Katuvua. Iramo rapaloga mesua riara ngata haitu mangose bobaa.

Pompakita 22:17

Nosa Gasa bo boti mombine anu nasadia rapoberei nu Ana Bimba haitu nanguli, “Kamaimo!” Bo pura-pura tona nangepe tesa hitu kana manguli, “Kamaimo!” Isema-sema nabai tambolona, kamaimo! Isema-sema madota, kamaimo manginu uve anu nombadekei katuvua. Uve haitu nidekei bayangi, ledo paraluu raali.