2 Tesalonika 1:8 - Kaili Ledo

⁸ bo ante apu navaya-vaya. Ia manau mombahuku tona ledo nadota nompeili Alatala bo ledo nadota nangoseaka Kareba Belo anu notesaki Tuputa Yesus.

2 Tesalonika 1:8 ပူးပေါင်းရင်းမြစ်များ

Matius 25:41

Maupu haitu Kuuli ka ira ri sabingga njidiKu, ‘Palaimo lako nte Yaku, komiu anu nihuku nTuamaKu! Koi hau riara apu anu navaya sampe ri kasae-saena nipakasadia ka Magau nu Seta ante malaeka-malaeka anu nangoseaka ia.

Matius 25:46

Bo i Yesus nompakaupu tesaNa ante nanguli, “Pura-pura tona nadaa haitu rahuku sampe ri kasae-saena. Tapi tona nanoa, matuvu mabelo sampe ri kasae-saena.”

Yohanes 3:19

Ana nu Alatala nakava ri dunia eva reme nombavanta kalandana, tapi ira nihuku sabana nipokonorapa kalandana pade karemena apa pokainggura nadaa.

Yohanes 8:19

Bo nekutana vaimo ira, “Ri umba TuamaMu?” Nesana i Yesus, “Ledo nisanimiu mpuu Yaku. Bo ledo muni nisanimiu mpuu TuamaKu. Ane rapana nisanimiu mpuu Yaku, natantu rasanimiu mpuu TuamaKu.”

Suro-Suro 6:7

Ivesiamo kareba nu Alatala nipatolele njuu bo kadea ntopomparasaya i Yesus ri ngata Yerusalem nantambai mpuumo. Bo nadea muni topanggeni pesomba nangoseaka i Yesus.

Roma 1:28

Tona gahaitu ledo nadota mosisani ante Alatala. Jadi Alatala nompalamba ira rakeniaka mpekirira nadaa sampe ira novia anu ledo masipato rapoviara.

Roma 1:5

Alatala nabelo raraNa nte yaku bo yaku nipajadiNa suroNa sabana i Yesus. Yaku niposuroNa mompatolele Kareba Belo ka tona ri umba-umba ri dunia bo manggeniaka ira momparasaya bo matundu nte i Yesus, ala Ia rabila bo rapakaoge

Roma 10:16

Tapi ledo pura-pura tona nomparasaya Kareba Belo haitu. Naria tesa Nabi Yesaya nggaulu nanguli ivei: <> Yesaya 53:1

Roma 15:18

Ledo mabia yaku motesaki anu nipoviaku mboto. Aga anu nipoviaku ante kuasa i Kristus riara nggatuvuku kutesaki. Nadea tona ledo toYahudi nangoseaka i Kristus sabana pepatudukiku bo pokarajaaku,

Roma 16:26

Tapi ri tempo sii-sii, nia haitu nipopaisani ka kita riara buku nitulisi nu nabi-nabi nggaulu. Bo Alatala anu natuvu sampe ri kasae-saena, nantudu ala niaNa haitu rapopaisani ka tona ri umba-umba ala pura-pura manusia mamala momparasaya bo matundu nte i Kristus.

Roma 6:16

Nisanimiu mboto ane kita matundu nte tona bo mangoseaka parentana, kita majadi batuana. Ivesia muni ante dosa. Ane kita batena mangoseaka dota rarata anu nadaa, kita majadi batua nu dosa bo kaupuna kita mamate bo rapopogaa lako nte Alatala. Tapi ane kita matundu nte Alatala, kita majadi batuaNa bo kita rapakanoa ri panggitaNa.

1 Korintus 15:34

Jadi pakanoto mpanjili pekirimiu bo tumo rapovia dosa! Da nariapa sanu komiu dopa nosisani belo nte Alatala. Niuliku ivesia ala maeya matamiu.

2 Korintus 10:5

Ante kuasa nu Alatala kami nompakule nombadagi pekiri ntopangeva pepatuduki nakana, pekiri ntona nasombo, bo pekiri ntona anu nombalava tona ntanina mosisani nte Alatala. Ante kuasa lako nte Alatala kami nanggeni ira nombabali pekirira sampe ira natundu nte i Kristus.

Galatia 3:1

Nadoyo mpuu komiu toGalatia! Isema nanjalipuyo komiu sampe komiu domo nadota nangoseaka pepatuduki nakana? Nipakalantoku mpuu nanguli ka komiu bara ipia patuju kamate i Yesus Kristus ri kayu salib.

Galatia 4:8

Bara ipia, dopame nisanimiu Alatala, komiu nipobatua nu tupu-tupu ntanina anu nisarumakamiu nakuasa, tano mai, ledo Alatala.

1 Tesalonika 4:5

Nee aga matuvu nte bereimiu mangoseaka dota nu rara mabuga, anu biasa najadi nte tona ledo nosisani nte Alatala.

Ibrani 10:27

Ane ivesia pokaingguta, damo aga maviora rarata mompopea pehuku bo apu narega mpuu anu mompalabu tona nangeva Alatala.

Ibrani 10:30

Nisanitamo Alatala nanguli ivei: “Yakumo topombabalasi. Yaku mombahuku ira.” Bo niuliNa muni, “Tupu mombatangara todeaNa.”

Ibrani 11:8

Lako ri pomparasaya i Abraham, nioseakana parenta nu Alatala. Alatala nompokio ia bo nituduNa hau ri ngata nakavao. Alatala nojanji ngata haitu majadi bagia i Abraham. Jadi, nau dopa nisanina ri umba ngata rakalauna haitu, nipalaikanamo ngatana mboto nangoseaka parenta nu Alatala.

Ibrani 12:29

Apa Alatala anu nisombata, mombahuku tona nompoara kabeloNa, nasimbayu mpo apu mepalabu.

Ibrani 2:3

Ane ivesia nte Atura nTupu, nemopa Kareba Belo anu nipatolele i Yesus! Kareba haitu nombatesaki carana kita mamala rapakasalama. Kareba haitu nelabipa kabelona pade Atura nipapola malaeka-malaekaNa nggaulu. Jadi ane ledo rapeilita kareba haitu, berimbamo kita makabasaka lako ri pehuku? Kareba haitu pamulana nipatolele i Pue Yesus mboto. Tona anu nangepe Ia nompakalanto ka kita, kareba haitu mpuu-mpuu nakana bo namala rasarumakata.

Ibrani 5:9

Naganapa pura-pura haitu nirasaiNa, Ia najadi puna katuvua nabelo sampe ri kasae-saena ka pura-pura tona matundu nte Ia.

1 Petrus 3:6

Jonjona, i Sara nanturusi anu niuli i Abraham ka ia bo nanggasangai i Abraham “i tua”. Bo komiu masimbayu nte i Sara ane komiu batena mokainggu mabelo bo ledo maeka ka nuapa-nuapa.

1 Petrus 4:17

Nakavamo tempona Alatala mombatangara pura-pura manusia. Bo kita todeaNa mboto mokolu ratangaraNa. Ane kita todeaNa mokolu ratangaraNa natantu mantamo mpuumo pehukuNa ka tona ledo nadota nomparasaya Kareba Belo lako nte Ia!

2 Petrus 3:7

Sii-sii ledo nikitata anu nabali tapi langi bo tana anu naria sii-sii nijagai ante kuasa tesa nu Alatala sampe rapakaropu ante apu bara maipia. Sii-sii dunia da nijagai sampe Eo Potangara bara maipia tempo pura-pura tona anu ledo nangoseaka dota nu Alatala rahuku.

Yudas 1:7

Tora munimo tupu ngata Sodom bo Gomora nggaulu bo ngata-ngata ri sinjorina. Ira nasimbayu nte malaeka-malaeka pangane, haitumo ira muni ledo nabasa-basa nosipogau nte tona ledo bereira mboto bo nangoseaka pokainggu nabuga ntotomo. Ngatara nipalabusi ante apu rapopatora ka pura-pura tona, pokainggu nadaa rahuku ante apu sampe ri kasae-saena.

Pompakita 20:10

Maupu haitu Magau nu Seta anu nombabagiu ira ratedaka riara ntasi apu navaya ante vatu-vatu colonggata narega. Haitumo ponturo nipotedaka binata nadaa bo nabi mpodava nokolu. Hamai, eo bongi ira rapandasa sampe ri kasae-saena.

Pompakita 21:8

Aga tona naeka mangoseaka Yaku, atau ledo niparasayana Yaku, bo tona nadaa pokaingguna, topepatesi, tona nokainggu nabuga, topedoti, tona nombasomba tupu-tupu ntanina, bo pura-pura topodava, ira pura-pura kana rahuku riara ntasi apu anu navaya ante vatu-vatu colonggata. Haitumo niuli kamatea karongganina.”

Pompakita 6:10

Ira nongare sanggani ante suara namangga mpuu, “O Pue, Komiu nelabi nakuasa! Komiu nagasa bo nanoa! Sakuyapa kasaena pade ratangaraMiu bo rabalasiMiu tona nadaa ri dunia nompatesi kami?”