2 Petrus 3:7 - Kaili Ledo

⁷ Sii-sii ledo nikitata anu nabali tapi langi bo tana anu naria sii-sii nijagai ante kuasa tesa nu Alatala sampe rapakaropu ante apu bara maipia. Sii-sii dunia da nijagai sampe Eo Potangara bara maipia tempo pura-pura tona anu ledo nangoseaka dota nu Alatala rahuku.

2 Petrus 3:7 ပူးပေါင်းရင်းမြစ်များ

Matius 10:15

Pariaramo tesaKu hitu! Ri Eo Potangara ri kaupu nu dunia melabipa kadaana pehuku nu Alatala ka ira pade pehuku rapambela ka tupu ngata Sodom bo Gomora anu nadaa mpuu pokainggura!”

Matius 11:22

Pariaramo! Tempo Alatala mombatangara manusia bara maipia, pehuku ka komiu melabipa kantamona pade pehuku ka toponturo ri ngata Tirus bo Sidon.

Matius 11:24

Jadi pariaramo! Ri Eo Potangara bara maipia mandasapa pehuku rapambela ka komiu pade pehuku rapambela ka tupu ngata Sodom!”

Matius 12:36

Jadi pariaramo! Ri Eo Potangara bara maipiapa, pura-pura tona kana ratangguna mboto pura-pura tesana ledo noguna niulira.

Matius 24:35

Langi bo tana malipo, tapi tesaKu bate-batena sampe ri kasae-saena.”

Matius 25:41

Maupu haitu Kuuli ka ira ri sabingga njidiKu, ‘Palaimo lako nte Yaku, komiu anu nihuku nTuamaKu! Koi hau riara apu anu navaya sampe ri kasae-saena nipakasadia ka Magau nu Seta ante malaeka-malaeka anu nangoseaka ia.

Markus 6:11

Tapi ane maria tupu ngata ledo madota mantarima komiu ri ngatara bo ledo rapokonora mangepe pepatudukimiu, tapaimo sovu lako ri kadamiu tempo komiu mompalaisi ngata haitu, tandana Alatala mompoara ira.>>

Yohanes 12:48

Tona nompoara Yaku bo ledo nompariara tesaKu, naria anu mombahuku ira. TesaKu haitu mombahuku ira ri kaupu nu dunia,

Roma 2:5

Tapi nau nisanimiu tona nokainggu nadaa kana rahuku, da nakaa bagamiu, bo komiu ledo nadota najea. Sabana haitu, komiu mbotomo nantambai kantamo nu pehuku rapambela ka komiu ri Eo Potangara. Ri Eo Potangara Alatala mombatangara pura-pura manusia ante nanoa bo Ia mombahuku pura-pura tona novia nadaa.

1 Korintus 3:13

Rapana ane mapapu banua, tantu pareva nabelo nipake novia banua haitu maboli, tapi pareva ledo nabelo mapapu puramo. Ivesia muni ante pokarajaa ntopokarajaa ka Alatala. Kabelo nu pokarajaara saito-saito kana rapakalanto bara maipia tempo i Yesus makava mpanjili ri dunia. Pokarajaara haitu rauji nu Alatala ala malanto pokarajaara haitu bara mabelo bara ledo.

Filipi 1:28

Bo nee rapokaeka tona mangeva komiu. Apa kabiamiu haitu nompakalanto ka ira iramo rahuku nu Alatala bara maipia, tapi komiu rapakasalamaNa, sabana Alatalamo nombatulungi komiu.

2 Tesalonika 2:3

Nau bara berimba ntoto kareba haitu, nee sampe komiu rabagiu ntona, sabana dopame makava eo haitu, naria rongaya kana majadi ntani ruru. Pamulana, madea mpuu tona moura pomparasayara bo mombasapu Alatala. Bo karongayana, kana meumba Topesapuaka anu ranavusaka riara narakaa bara maipia.

1 Timotius 6:9

Tapi tona madota majadi makalumana mambela pesori. Ia ratoliani mpengaya-ngaya dota rara nadaa bo nadoyo, bo dota-dota haitu mompakagero katuvuana, mompakanavu ia, bo mompakaropu ia

Ibrani 12:29

Apa Alatala anu nisombata, mombahuku tona nompoara kabeloNa, nasimbayu mpo apu mepalabu.

2 Petrus 2:9

Jadi lako ri tesa pangane, nisanita Alatala nompakule mompakasalama topangoseaka dotaNa tempo ira manggava pesori. Bo nipakuleNa muni mombatavani tona nadaa sampe ira rahuku ri Eo Potangara.

2 Petrus 3:10

Tapi i Pue Yesus mpuu-mpuu makava mpanjili! KakavaNa ledo rasani-sani ntona, nasimbayu mpo kakava ntopangangga. Ri eo haitu langi malipo sanggani ante moni mamangga mpuu mpo suu nu apu oge. Bo pura-pura anu naria ri langi maropu rakande nu apu, bo dunia ante pura-pura isina malipo sanggani.

2 Petrus 3:12

Apa kita hii nantongoraka Eo Potangara nipakatantu nu Alatala. Jadi kita kana mompasimbuku matuvu magasa ala Eo haitu masalisa makava. Ri Eo haitu langi maropu rakande nu apu bo pura-pura anu naria ri langi magonu ante kapanena.

1 Yohanes 4:17

Ane kita nompotove sampesuvuta sampomparasaya, haitumo tandana kita mpuu-mpuu nompotove Alatala sampe ledo makaja rarata mantingayo Ia ri Eo Potangara ri kaupu dunia. Ledo makaja rarata mantingayo Ia sabana pokaingguta ri dunia hitu masimbayu mpo pokainggu i Kristus.

Yudas 1:7

Tora munimo tupu ngata Sodom bo Gomora nggaulu bo ngata-ngata ri sinjorina. Ira nasimbayu nte malaeka-malaeka pangane, haitumo ira muni ledo nabasa-basa nosipogau nte tona ledo bereira mboto bo nangoseaka pokainggu nabuga ntotomo. Ngatara nipalabusi ante apu rapopatora ka pura-pura tona, pokainggu nadaa rahuku ante apu sampe ri kasae-saena.

Pompakita 17:11

Binata anu natuvu nokolu bo sii-sii domo naria, ia haitumo magau kauvaluna. Tapi ia muni saito lako ri magau papitu pangane. Kaupuna ia kana rahuku sampe ri kasae-saena.

Pompakita 17:8

Da nokolu, binata nikitamu haitu da naria natuvu, tapi sii-sii domo naria. Tapi ia meumba mpanjili bara maipia lako riara lovu anu ledo rapakule mantuvu kandalana. Maliu haitu ia rahuku sampe ri kasae-saena. Bo tona natuvu ri dunia anu ledo nitulisi sangara riara Buku Katuvua dopame dunia nipajadi nu Alatala, ira mpuu-mpuu mokumaa manggita binata haitu. Sabana, da nokolu binata haitu natuvu, sii-sii domo naria, tapi meumba mpanjili bara maipia.

Pompakita 20:11

Naupu haitu nikitaku sangu Gadera Kamagaua nabula bo nambaso. Bo nikitaku muni Toponturo ri Gadera haitu. Nariapa Ia ri sia, nalipo singganimo dunia, bo domo naria nikita.

Pompakita 21:1

Naupu haitu nikitaku dunia nabaru. Langi pamulana bo tana pamulana naliumo, bo domo ria tasi.