2 Petrus 3:4 - Kaili Ledo

⁴ bo manguli, “I Yesus nojanji makava mpanjili ri dunia. Tapi ledo ria nakava. Tantu ledo majadi, sabana lako ri tempo kamate ntotuata nggaulu sampe sii-sii, dunia hitu ledo nabali-bali. Pura-pura bate-batena nasimbayu lako ri lamba pamulana tempo dunia nipajadi sampe sii-sii.”

2 Petrus 3:4 ပူးပေါင်းရင်းမြစ်များ

Matius 16:27

Jadi, oseakamo Yaku nau sampe mamate. Apa domo masae Yaku, Ana nu Manusia makava lako ri suruga ante kuasa bo reme lako nte TuamaKu, mosanggani-nggani ante malaeka-malaekaNa. Bo tempo haitu Kubalasi pura-pura tona nangoseaka pokaingguna.

Matius 16:28

Pariaramo tesaKu hitu! Naria bara sako-ndua komiu ri sii ledo mamate ane dopa rakitara Yaku, Ana nu Manusia, makava ri dunia hitu eva Magau.”

Matius 24:28

Ane rakitamiu tonji kalikoa masiromu, tantu naria matepudu ri sia.”

Matius 24:48

Tapi mandasa mpuu ane batua haitu madaa pokaingguna bo nipekirina riara ntaina ivei: ‘Wee! Da masaepa pade manjili madikaku.’

Markus 10:6

Tapi ri lamba pamulana tempo Alatala nompajadi dunia, Ia nompajadi manusia langgai bo mombine.

Markus 13:19

Apa ri tempo haitu maria pepandasa anu nadaa mpuu, anu dopa naria nirasai manusia lako ri pamulana dunia nipajadi nu Alatala. Bo domo majadi hanupa ri tempo makava.

Lukas 12:45

Tapi mandasa mpuu batua haitu ane aga mompekiri riara ntaina ivei: ‘Wee! Da masaepa pade manjili madikaku.’ Bo ia aga nombaboba batua-batua ntanina langgai bo mombine, bo aga mangande manginu bo malimpuno.

Suro-Suro 7:60

Bo nantaputu ia bo nongare ante suara namangga, “Pue, ampungimo dosara hitu!” Naupu haitu, namatemo ia.

1 Tesalonika 2:19

Naoge rara kami mosinggava nte komiu, apa ane Tuputa Yesus Kristus meonga mpanjili bo kita mosinggava ri ngayoNa, komiumo majadi asele pokarajaa kami anu nisarumaka kami. Tempo haitu madamba mpuu rara kami sabana komiu, bo masana rara kami sabana pomparasayamiu.

2 Petrus 3:12

Apa kita hii nantongoraka Eo Potangara nipakatantu nu Alatala. Jadi kita kana mompasimbuku matuvu magasa ala Eo haitu masalisa makava. Ri Eo haitu langi maropu rakande nu apu bo pura-pura anu naria ri langi magonu ante kapanena.

Pompakita 3:14

Ana nu Manusia netudu vai ala kutulisi ka malaeka anu nanggeniaka todea topomparasaya ri ngata Laodikia ivei: “Hitumo tesa lako nte Yaku anu nipoposanga ‘Amin’, haitumo sabi natutu notesa anu nakana. Yakumo Tupu nu pura-pura anu nipajadi nu Alatala.