2 Korintus 7:4 - Kaili Ledo

⁴ Ledo nakaja raraku notesa pakalanto ka komiu. Nadamba mpuumo raraku nantora komiu. Nau nadeamo susa bo pari nambela kami, hitupa narosomo raraku bo nelabi kadamba raraku nantora komiu.

2 Korintus 7:4 ပူးပေါင်းရင်းမြစ်များ

Suro-Suro 5:41

Suro-suro nompalaisi Polibu haitu bo nadamba mpuu rarara sabana ira nireke nu Alatala masipato mombarasai kasusa bo kapari sabana pangoseakara i Yesus.

Roma 5:3

Bo ledo aga haitu, kita nadamba sabana nirasaita kasesa bo kapari, apa nisanita lako ri kasesa bo kapari haitu rarata majadi maroso.

1 Korintus 1:4

Yaku ledo nenonto nanguli tarima kasi nte Alatala, sabana kabelo raraNa nte komiu anu nosangu rara ante i Yesus Kristus.

2 Korintus 1:4

Ia nompakaroso rara kami riara mpengaya-ngaya kasusa bo kapari nirasai kami, ala karoso rara nitarima kami lako nte Alatala, rapake kami mompakaroso rara ntona ntanina anu nombarasai kasusa bo kapari.

2 Korintus 10:8

Nau yaku madamba gaga mombatesa kuasa nidekei i Kristus ka kami, ledo maeya mataku. Sabana kuasa haitu nidekei i Pue ka kami, ledo mompakagero pomparasayamiu, tapi mompakaroso pomparasayamiu.

2 Korintus 11:21

Ledo naeya mata kami nanguli kami ledo mabia mokainggu ivesia nte komiu! Tapi ane maria tona mabia mangoe karora mboto, yaku muni mabia mangoe karoku mboto! Yaku notesa mpo todoyo!

2 Korintus 2:14

Yaku nosukuru nte Alatala! Ia batena nanggeniaka kami nosanggani-nggani nte Ia bo nitulungiNa kami najadi padagi sabana kami nosangu rara ante i Kristus. NitulungiNa kami nompatolele Kareba Belo i Kristus ri umba-umba ala pura-pura tona mangepena bo mosisani nte Alatala. Bo Kareba haitu nasimbayu mpo soa navangi nasilele nienga ri umba-umba.

2 Korintus 3:12

Kami nanjarumaka pojanji nu Alatala anu nabaru, anu ledo mabali-bali. Haitumo sampe kami nabia mpuu nompatolele Kareba Belo.

2 Korintus 7:14

Dopame ia tou mompelioda komiu, nitoiyaku mamimo komiu nte ia. Bo pokainggumiu nikita i Titus ledo nompakaeya yaku. Pura-pura tesa kami ka komiu nakana, ivesia muni pura-pura potoiyaku komiu nitesaku ka i Titus nakana muni.

2 Korintus 8:24

Jadi kuperapi nte komiu popakitamo tovemiu ka ira tatalu ala rakita ntodea topomparasaya pepotovemiu, bo rasanira muni tesa-tesa kami nombatoiya komiu ri ngayora bara ipia, mpuu-mpuu nakana.

Filipi 1:14

Bo deanapa sampesuvu sampomparasaya ri sii nantambai karoso pomparasayara i Pue Yesus, sabana nikitara Tupu nantulungi yaku ri tarunggu sampe domo naeka ira, tapi nantambaimo kabiara nompatolele Tesa nu Alatala.

Filipi 1:20

Yaku mpuu-mpuu nanjarumaka yaku ledo rapakaeya nokarajaa nompatolele Kareba i Kristus. Nisarumakaku yaku bate-batena mabia mosabi, nemopa sii-sii, ala nau mamate atau matuvu yaku, rakita ntona kaoge i Kristus riara nggatuvuku.

Filipi 1:26

Jadi, ane yaku manjili tou nte komiu, komiu mpuu-mpuu madamba mantoiya Yesus Kristus sabana yaku.

Filipi 2:17

Pangoseakamiu i Kristus nirapaka pesombamiu ka Alatala anu mompakadamba raraNa. Tempo bara ipia, ane tona nombadekei pesomba ka Alatala, kana nombatoli uve anggur ala mompakagana pesombana. Ane rapana yaku rapatesi sabana pokarajaaku nompatolele Kareba Belo, raaku rarapaka uve anggur nitoli haitu, apa yaku nasadia mamate ane rapodota nTupu. Jadi, nau yaku rapatesi, ledo nakuya! Yaku batena manguli tarima kasi nte Alatala bo yaku muni madamba mpasanggani-nggani nte komiu.

Kolose 1:24

Sampesuvu-sampesuvu, sii-sii nadamba raraku nombarasai susa bo pari nikavaku sabana yaku nokarajaa nantulungi komiu. Apa yaku nombadupai ri karoku susa bo pari nipakatantu i Kristus kana kurasai. Bo susa bo pari nirasaiku nanggeni belo ka todea topomparasaya. Pura-pura kita topomparasaya nirapaka karo i Kristus.

1 Tesalonika 2:19

Naoge rara kami mosinggava nte komiu, apa ane Tuputa Yesus Kristus meonga mpanjili bo kita mosinggava ri ngayoNa, komiumo majadi asele pokarajaa kami anu nisarumaka kami. Tempo haitu madamba mpuu rara kami sabana komiu, bo masana rara kami sabana pomparasayamiu.

1 Tesalonika 2:2

Dopame kami nakava ri ngatamiu, kami mpuu-mpuu nipandasa bo nipakadaa ntona ri ngata Filipi. Nisanimiumo tesana. Nau nadea tona nangeva kami, tapi Tuputa nompakaroso rara kami ala kami ledo maeka mompatolele Kareba BeloNa ka komiu ri ngata Tesalonika.

2 Tesalonika 1:4

Sia sampe ri ngata-ngata ntanina kami nantoiya pokainggumiu ri ngayo ntodea topomparasaya i Yesus. Ante damba rara, kami nanguli ka ira, “Nabelo mpuu toTesalonika! Ira ledo nenonto nomparasaya i Kristus nau nipandasa bo nipakasusa ntona.”

Filemon 1:7

Sampesuvuku, nadamba mpuu yaku, bo raraku nipakaroso nangepe pepotovemu ka todea nu Alatala. Bo petulungimu mpuu-mpuu nompakasana rarara!

Yakobus 1:2

Sampesuvu-sampesuvu, ane komiu mambela mpengaya kasusa bo pesori, kana madamba raramiu.