2 Korintus 5:11 - Kaili Ledo

¹¹ Jadi naeka rara kami movia anu ledo rapokono nTupu, apa nisani kami Ia mombatangara kita pura-pura. Jadi haitumo sabana kami nompasimbuku manggeni tona momparasaya i Yesus. Nisani nu Alatalamo isi rara ntai kami. Bo nisarumakaku rasanimiu muni isi rara ntai kami bo domo monggai raramiu mompekirika kami.

2 Korintus 5:11 ပူးပေါင်းရင်းမြစ်များ

Matius 10:28

Nee maeka nte tona madota mompatesi komiu. Ira mamala mompatesi karomiu tapi ledo ria kuasara mombanavusaka komiu ri narakaa. Aginapa komiu maeka nte Alatala sabana Iamo nakuasa mompatesi karomiu bo Ia muni nakuasa mombahuku komiu riara narakaa.

Matius 25:46

Bo i Yesus nompakaupu tesaNa ante nanguli, “Pura-pura tona nadaa haitu rahuku sampe ri kasae-saena. Tapi tona nanoa, matuvu mabelo sampe ri kasae-saena.”

Lukas 12:5

Kuuli ka komiu isema masipato rapokaekamiu! Aginamo komiu maeka nte Alatala, sabana Ia nakuasa mompatesi karomiu bo mombanavusaka komiu riara narakaa! Pariaramo tesaKu hitu! Aga Alatala masipato rapokaekamiu!

Lukas 16:31

Tapi nesana i Abraham, ‘Ane ledo rapariarara parenta Nabi Musa bo nabi-nabi ntanina, tantu ledo muni raparasayara nau maria tomate matuvu mpanjili!’ ”

Suro-Suro 13:43

Naupu puramo tona nesuvu lako ri banua petupu pangane, nadea toYahudi bo tona ntanina anu nesua agama Yahudi, nomporoa i Paulus bo i Barnabas. Suro-suro haitu nompakaroso rarara ala ira bate-batena manjarumaka kabelo nu Alatala.

Suro-Suro 18:13

Nipangadura ia ivei: “Tona hitu nanggeni todea metupu nte Alatala ante pepatuduki nosisala ante Atura-atura nidekei Nabi Musa ka kami!”

Suro-Suro 18:4

Ri eo-eo penonto i Paulus hau ri banua petupu ntoYahudi notesa nosinjula pekiri ante tona nasiromu ri sia, toYahudi bo toYunani. Ia nompasimbuku nanggeni ira momparasaya i Yesus.

Suro-Suro 19:26

Sii-sii nikitamiu bo niepemiu mbotomo anu nipovia i Paulus! Ia nanguli ka todea, pinoito-pinoito nu viata nipovia mpale manusia, ledo viata mpuu. Bo nadeamo tona nomparasaya pepatudukina haitu, ledo aga ri ngata Efesus hitu, tapi ri pura-pura propinsi Asia muni!

Suro-Suro 26:26

Nisani Magau Agripa mboto anu nitesaku pangane. Haitu sampe yaku ledo naeka notesa ivesia ri ngayona. Nisaniku ledo ria nuapa-nuapa dopa nisanina apa kajadia haitu ledo nitabuniaka.”

Suro-Suro 28:23

Jadi nipakatantura eo rakasiromura ante i Paulus. Nanggavapa eo niovora, nadea tona nakava nasiromu ri banua i Paulus. Lako ri mpadondona sampe nggoviana i Paulus nombatesa Poparenta nu Alatala ka ira bo nombatentei pepatuduki i Yesus. Nibacana lako ri Buku Atura Agama nitulisi Nabi Musa bo Buku Nabi-nabi ntanina, ala rasanira tesana nakana bo raparasayara i Yesus mpuu-mpuu Magau Topepakasalama.

2 Korintus 2:17

Nadea tona nompatolele Tesa nu Alatala ala mangelo untu ka karora mboto. Tapi ledo ivesia kami. Patuju kami nagasa bo tesa kami nakana, apa kami nisuro nu Alatala mompatolele TesaNa. Jadi kami notesa ante kuasa i Kristus bo Alatala nanggita povia kami haitu.

2 Korintus 5:20

Jadi kami hii niposumba i Kristus. Ante potesa kami, Alatala mboto nompasimbayu tesaNa ka komiu. Jadi ante kuasa i Kristus kami merapi mpuu-mpuu nte komiu, posinggabelomo nte Alatala!

2 Korintus 6:1

Jadi kami hii nokarajaa nosanggani-nggani ante Alatala nompatolele TesaNa ka manusia. Haitumo sabana kami merapi nte komiu ante mpuu-mpuu rara, nee sampe kabelo rara nu Alatala nte komiu haitu ledo maria aselena riara nggatuvumiu.

Galatia 1:10

Jadi, berimbamo, sampesuvu-sampesuvu? Yaku nanguli ivesia mbeki ratoiya ntona? Ledo ntoto nakana! Yaku aga madota ratoiya nu Alatala. Bara nipekirimiu yaku aga madota mompakadamba rara nu manusia. Tapi haitu ledo muni nakana, apa ane rapana yaku da nompasimbuku mompakadamba rara nu manusia, ledo masipato yaku majadi batua i Yesus Kristus!

Efesus 5:21

Pekoumo nte roamiu ntanina sampomparasaya sabana komiu nombabila i Kristus.

Ibrani 10:31

Natantumo maviora mpuu rara ntona anu mambela pehuku lako nte Alatala anu natuvu sampe ri kasae-saena!

Ibrani 12:29

Apa Alatala anu nisombata, mombahuku tona nompoara kabeloNa, nasimbayu mpo apu mepalabu.

Yudas 1:23

Naria tona ntanina damo kasalandalana. Tulungimo ira ala ira rapakasalama lako ri pehuku, nasimbayu mpo porabutakamiu tona lako ri apu. Bo poasi munimo tona nikuasai dota rarara nadaa. Tulungi ira manjili ri dala nakana, tapi jagaimo, mbelaka komiu matekeni mangoseaka pokainggura nadaa. Potovemo tona nadosa tapi povuu matamo pokainggura.