2 Korintus 5:10 - Kaili Ledo

¹⁰ Apa kita pura-pura kana mantingayo i Kristus bara maipia ala ratangaraNa. Maupu ratangaraNa, simbo rakavata anu nipakatantu nangoseaka anu nipoviata tempo kita natuvu ri dunia hitu, bara povia nabelo bara povia nadaa.

2 Korintus 5:10 ပူးပေါင်းရင်းမြစ်များ

Matius 16:27

Jadi, oseakamo Yaku nau sampe mamate. Apa domo masae Yaku, Ana nu Manusia makava lako ri suruga ante kuasa bo reme lako nte TuamaKu, mosanggani-nggani ante malaeka-malaekaNa. Bo tempo haitu Kubalasi pura-pura tona nangoseaka pokaingguna.

Suro-Suro 10:42

Bo nituduNa kami mompatolele Kareba Belo haitu ka pura-pura tona, bo manguli ka tona Iamo nianggataka nu Alatala majadi Topotangara pura-pura manusia da natuvu bo anu namatemo.

Suro-Suro 17:31

Apa nipakatantuNamo tempona bara maipia pura-pura manusia ri dunia ratangara ri kanoana. Pokarajaa motangara haitu nidekeiNa ka saito tona nipelisiNa lako ri nggauluname. Alatala nompakatuvu mpanjili tona haitu lako ri kamateNa ala malanto ka pura-pura tona Ia mpuu-mpuu nipelisi nu Alatala majadi Topotangara pura-pura manusia.”

Roma 2:16

Jadi, ivesiamo majadi ri Eo Potangara. Nangoseaka Kareba Belo anu nipatoleleku, ri Eo Potangara Alatala mombatudu i Yesus Kristus mombatangara pura-pura anu nitabuniaka riara ntai nu manusia.

Roma 6:19

Yaku nompake porapa batua ala ledo makaja rapahamiu pepatudukiku, apa kita manusia da nakura pompahata. Bara ipia komiu nipobatua nu dosa sabana komiu nompalamba karomiu nangoseaka dota raramiu nadaa sampe pokainggumiu nantambai kadaana. Jadi hitupa, dekeimo katuvumiu ka Alatala ala komiu majadi batuaNa anu nanoa bo mpuu-mpuu majadi todeaNa.

1 Korintus 4:5

Jadi nee komiu masalisa mompakatantu sala ntona ane dopa nakava tempona. Popea sampe i Pue Yesus makava mpanjili ri dunia. Iamo mompakalanto pura-pura anu nitabuniaka ri kalandana sii-sii. Iamo mompakalanto mpengaya-ngaya patuju nitabuniaka riara ntai manusia. Ri tempo haitu, Alatala mombatoiya isema-sema masipato ratoiyaNa.

2 Korintus 7:3

Patujuku ledo mompakasala komiu, apa kami mpuu-mpuu nompotove komiu evamo niuliku ri bavona. Matuvu atau mamate kami batena mompotove komiu!

Efesus 6:8

Pariaramo! Isema-sema novia nabelo, nau ia batua atau ledo batua, kana rakavana balasina nabelo lako nte i Pue.

Ibrani 9:27

Alatala nompakatantu manusia mamate aga sanggani, bo maupu haitu ratangara.

1 Petrus 4:5

Tapi makava tempona, ira kana mompangaku poviara nadaa haitu ri ngayo nu Alatala. Bo Alatala nasadiamo mombatangara pura-pura tona, nau tona da natuvu bo muni tona namatemo.

Pompakita 2:23

Bo ana-anana Kupatesi sampe malanto ka pura-pura topomparasaya, Yakumo anu nomparesa pekiri bo rara ntai manusia, bo Yakumo anu mombabalasi komiu saito-saito nangoseaka pokainggumiu.

Pompakita 22:12

Bo nanguli munimo i Yesus, “Pariaramo! Domo masae makavamo Yaku manggeni tambo bo Kubalasi pura-pura tona nangoseaka pokainggura.