2 Korintus 2:17 - Kaili Ledo

¹⁷ Nadea tona nompatolele Tesa nu Alatala ala mangelo untu ka karora mboto. Tapi ledo ivesia kami. Patuju kami nagasa bo tesa kami nakana, apa kami nisuro nu Alatala mompatolele TesaNa. Jadi kami notesa ante kuasa i Kristus bo Alatala nanggita povia kami haitu.

2 Korintus 2:17 ပူးပေါင်းရင်းမြစ်များ

Matius 24:24

Apa kana meumba topodava manguli iramo Magau Topepakasalama, bo meumba muni nabi-nabi mpodava anu movia tanda-tanda nipokumaaka bo kabaraka-kabaraka mombabagiu tona. Ane mamala, nau tona nipelisi nu Alatala rabagiura muni!

Suro-Suro 20:20

Nisanimiu ledo nakaja raraku nompasimbayu anu noguna ka komiu. Yaku batena nompatuduki komiu ri kasiromu ntodea, bo ri banua-banuamiu.

Suro-Suro 20:27

Apa, ledo nasau raraku nompatuduki ka komiu, pura-pura nia nu Alatala ka kita.

1 Korintus 5:8

Sabana haitu, kita muni mosusa madamba. Kita kana mombatedaka ragi njae bo mangande roti ledo noragi. Batuana, kita kana menonto mokainggu nadosa bo matuvu ante pokainggu nabelo bo nanoa.

2 Korintus 1:12

Nadamba mpuu rara kami apa nisani kami nabula rara kami. Kami nasaro nokainggu nanoa nte tona pura-pura, nelabipa nte komiu. Pura-pura anu nipovia kami, ledo ria nuapa-nuapa nitabuniaka kami. Patuju kami nanoa, nangoseaka dota nu Alatala. Pokainggu kami ledo nangoseaka kapande nu manusia, tapi nangoseaka pompakule nidekei nu Alatala.

2 Korintus 1:18

Tapi ledo ivesia, sampesuvu-sampesuvu. Alatala namala raparasaya bo nisaniNa tesa kami ka komiu namala muni raparasaya. Ledo nebalingoya kami, ledo sanggani “Iyo” bo sanggani, “Ledo.”

2 Korintus 11:11

Nuapa sabana yaku ledo nadota nompakantamo komiu? Bara raulimiu ledo nipotoveku komiu. Ledo nakana! Nisani nu Alatalamo nipotoveku komiu!

2 Korintus 12:19

Nipekirimiu tesa kami hitu bara aga manjaliku karo kami ri ngayomiu? Sampesuvu-sampesuvu nipotoveku, ledo ntoto nakana! Pura-pura hitu nitesa kami sabana kami nosangu rara nte i Kristus bo Alatala mboto nanggita kami. Pura-pura anu nipovia kami, nipovia ala mompakaroso pomparasayamiu.

2 Korintus 4:2

Tapi ane kami, kami domo nangoseaka pokainggu nadaa anu nepakaeya. Kami ledo nebagiu bo ledo nantenggoaka Tesa nu Alatala. Alatala sabi kami bo nikitaNa kami aga nompatolele anu nakana ala rasani ntodea kami namala raparasaya.

2 Korintus 6:7

Nalantomo kami batua nu Alatala sabana kami nompatolele pepatuduki nakana, bo kuasa nu Alatala nikita riara nggatuvu kami. Kami batena nokainggu nanoa. Bo pokainggu nanoa haitumo najadi pareva posieva kami, apa ane nanoa pokainggu kami, kami mamala mangeva bali kami bo kami mamala manjaliku karo kami lako ri peeva nu bali.

Galatia 1:6

Nokumaa ntoto yaku nangepe komiu! Dopa nasae niparasayamiu Kareba Belo, nitubengosimiumo Alatala! NipokioNa komiu majadi todeaNa sabana kabelo rara i Kristus nte komiu. Tano komiu aga nangoseaka pepatuduki ntanina anu niuli ntona “kareba belo”.

1 Tesalonika 2:4

Kami ledo notesa aga mompakadamba rara manusia. Kami notesa mompakadamba rara nu Alatala, sabana Iamo nomparesa rara ntai kami, bo Iamo nombareke kami masipato mompatolele Kareba Belo.

Titus 1:11

Tona ivehaitu kana ratagi, nee mpuu mudekei ira mompatuduki! Apa nadea pobanua ntona naingu nangepe pepatudukira anu ledo masipato. Patujura mompatuduki aga manggava doi ante akala ledo nabelo.

Ibrani 11:27

Lako ri pomparasaya i Musa, nipalaisina tana Mesir. Ia ledo naeka ka Magau Mesir nau narau mpuu rara Magau. I Musa batena naroo rarana, apa eva nikitana Alatala anu ledo nikita.

1 Petrus 4:11

Jonjona, isema-sema nidekeika pompakule mompasimbayu Tesa nu Alatala kana motesa mpo tona niposumba nu Alatala mboto. Isema-sema nidekeika pompakule mantulungi tona ntanina, kana mantulungi ante karoso nidekei nu Alatala ka ia. Pakemo pompakule-pompakule haitu ala nau damo nuapa majadi, Alatala ratoiya bo rabila sabana anu nipovia i Yesus Kristus ri katuvumiu. Alatalamo nakuasa bo masipato ratoiya bo rabila sampe ri kasae-saena. Amin!

1 Yohanes 4:1

Sampesuvu-sampesuvu nipotoveku, nee kaliu-liu raparasayamiu pura-pura tona nanguli naria Nosa Gasa nu Alatala nte ira. Tapi peintaka ruru, ala rasanimiu bara Nosa Gasa mpuu naria nte ira, bara ledo. Niuliku ivesia apa nadeamo nabi mpodava ri umba-umba ri dunia sii-sii.

Yudas 1:4

Nariamo bara sako-ndua tona nesua nggalino-lino ri tatangata ntopomparasaya. Pangulira ira sampesuvuta sampomparasaya, tano mai ira ledo nangoseaka dota nu Alatala. Pangulira ledo makuya kita mangoseaka dota rarata nadaa, apa Alatala nompotove kita bo raampungiNa salata haitu. Tapi pepatuduki haitu ledo ntoto nakana, ira aga nombatenggoaka pepatuduki anu nombatesa kabelo nu Alatala. Nisapura i Yesus Kristus saito-itoNa Magau bo Tuputa. Lako ri nggauluname pehuku rapambela ka ira nipakatantu mamimo bo nitulisi riara Buku Gasa.

Pompakita 12:9

Jadi ule naga haitu nipopalai lako ri suruga bo nitedaka hau ri dunia nosanggani-nggani ante malaeka-malaeka anu nantulungi ia. Ia haitumo Ule Ntua anu nosanga Topangadu atau Magau nu Seta, anu nombabagiu manusia ri njumangu dunia.

Pompakita 19:20

Tapi binata nadaa nisaka sanggani ante nabi mpodava bo ira randua nitedaka nggatuvu riara ntasi apu anu navaya ante vatu-vatu colonggata navaya. Nabi mpodava haitumo novia tanda-tanda nipokumaaka ante kuasa nidekei nu binata nadaa ka ia. Ante tanda-tanda nipokumaaka, ia nombabagiu tona nimere ante tanda nu binata nadaa bo tona nombasomba pinoitona.

Pompakita 2:20

Tapi da nariapa sangaya pokainggumiu anu ledo ntoto nipodambaKu. Haitumo mombine anu nosanga i Izebel anu nompangaku karona nabi. Komiu nompaloga ia nompatuduki bo nombabagiu topangoseaka Yaku. Ia nompatuduki ira mosipogau ante tona ledo bereira mboto bo mangande kandea nipopali sabana nipakande ka tupu-tupu ntanina.