2 Korintus 2:14 - Kaili Ledo

¹⁴ Yaku nosukuru nte Alatala! Ia batena nanggeniaka kami nosanggani-nggani nte Ia bo nitulungiNa kami najadi padagi sabana kami nosangu rara ante i Kristus. NitulungiNa kami nompatolele Kareba Belo i Kristus ri umba-umba ala pura-pura tona mangepena bo mosisani nte Alatala. Bo Kareba haitu nasimbayu mpo soa navangi nasilele nienga ri umba-umba.

2 Korintus 2:14 ပူးပေါင်းရင်းမြစ်များ

Yohanes 16:33

Pura-pura tesaKu pangane nitesaKu ka komiu ala matinonto raramiu sabana komiu mosangu rara nte Yaku. Ri dunia hitu komiu rapandasa. Tapi pakaroso raramiu! Apa kuasa nadaa ri dunia hitu nidagiKumo!”

Roma 1:8

I Yesus Kristus mosinggava nte yaku nosukuru nte Tupuku Alatala. Pamula-mulana yaku nosukuru sabana lele pomparasayamiu i Yesus niepe ntonamo ri umba-umba ri dunia.

Roma 15:19

bo sabana kabaraka-kabaraka bo tanda-tanda nipokumaaka nipoviaku ante kuasa Nosa Gasa. Lako ri ngata Yerusalem sampe ri tana Ilirikum, nipatoleleku pura-pura Kareba Belo i Yesus Kristus ka tona.

Roma 6:17

Bara ipia, dopame niparasayamiu i Yesus, komiu najadi batua nu dosa. Tapi nosukuru mpuu nte Alatala! Sii-sii komiu mpuu-mpuu nangoseaka pepatuduki nakana anu nipatolele ka komiu.

Roma 8:37

Tapi nau bara nuapa-nuapa majadi nte kita, kita mpuu-mpuu padagi ante petulungi i Kristus anu nompotove kita!

1 Korintus 12:8

Saito tona nidekeika nu Nosa Gasa pompakule mapande motesa. Tona ntanina nidekeika nu Nosa Gasa haitu muni pompakule mombatentei anu nipopaisani nTupu ka ia.

1 Korintus 15:37

Bo anu nitudamiu haitu aga batuna nggoo, nau angu gando bara angu tuda-tuda ntanina. Ledo nituda njumanggayu, aga anguna nituda.

1 Korintus 15:57

Tapi kita nosukuru nte Alatala! Iamo nombakabasaka kita lako ri kuasa nu dosa bo Atura agama sampe kita majadi padagi sabana anu nipovia nTuputa Yesus Kristus!

2 Korintus 1:11

Nisani kami ane komiu muni mantulungi mosambayaka kami, Alatala bate-batena mompakasalama kami riara kasusa. RadekeiNa belo ka kami sabana madea tona mosambaya ka kami. Bo madea tona manguli tarima kasi ka Ia ane rakitara nipoiyoNa pomperapira ka kami.

2 Korintus 8:16

Kami nosukuru nte Alatala sabana Ia nompakaoge rara i Titus mompekirika kabelomiu nasimbayu mpo kami mboto.

2 Korintus 9:15

Masipato mpuu kita motarima kasi nte Alatala, sabana pedekeiNa nelabi mpuu kabelona. Ledo rapakuleta mombasovadaka kabelo nu pedekeiNa haitu ka kita!

Efesus 5:2

Bo komiu kana matuvu mompotove roa, nasimbayu mpo i Kristus nompotove kita. Lako ri toveNa haitu, nidekeiNa karoNa nipatesi ala mombatolosi kita. PoviaNa haitu nompakadamba rara nu Alatala nasimbayu mpo pesomba navangi nisomba ka Ia.

Efesus 5:20

Komiu kana masaro motarima kasi nte Tuamata Alatala ka pura-pura anu najadi. Ulimo tarima kasi ka Ia sabana komiu nosangu rara nte Tuputa Yesus Kristus.

Filipi 4:18

Jadi, ala rasanimiu, nitarimaku puramo pedekei nipakatumiu, bo nelabi-labi! Pura-pura pedekei nipakatumiu nitarimakumo lako nte i Epafroditus. Sii-sii nagana puramo anu niparaluuku. Pedekeimiu haitu nasimbayu mpo pesomba navangi, anu nitarima nu Alatala bo nipodamba raraNa.

Kolose 1:23

Jadi komiu kana batena momparasaya bo nee molengga-lengga. Nee radekei tona mombabagiu komiu. Nee menonto manjarumaka anu nijanji nu Alatala ka komiu riara Kareba Belo. Kareba Belo haitu niepemiumo bo nipatolele sampe ri njumangu dunia. Bo yaku muni, i Paulus, nianggataka najadi topompatolele Kareba haitu.

Kolose 1:6

bo natolele ri umba-umba ri dunia sampe da kapantambai-mbaina kadea ntona nomparasaya i Yesus bo katuvura nipakabaru. Ivesia muni najadi ante komiu, nompamula lako ri tempo niepemiu Kareba Belo bo mpuu-mpuu nirasaimiu kabelo nu Alatala.

Kolose 2:15

Bo tempo i Yesus nipatesi nipaku ri kayu salib, nidagiNa pura-pura seta bo malaeka nadaa anu nakuasa. NilelakasiNamo kuasara nomparenta bo nipopakitaNa ka pura-pura isi dunia Iamo padagi bo ira nidagiNamo.

1 Tesalonika 1:8

Nompamula nte komiu, kareba i Yesus natolelemo sampe ri propinsi Makedonia bo Akhaya. Bo ledo aga haitu. Ri umba-umba ngata niepe ntonamo tesa pomparasayamiu Alatala. Jadi, ledo paraluu kami motesaki pomparasayamiu, sabana ri umba-umba nikalau kami, tesa haitu nisani ntonamo.

1 Tesalonika 3:9

Ane kami nosambaya ka Tuputa Alatala, nadamba mpuu rara kami nantora komiu! Kami nasaro notarima kasi nte Alatala sabana komiu, tapi eva ledo nagana rabalasi ka Ia kadamba rara nirasai kami.

1 Timotius 2:8

Dotaku ala ri umba-umba topomparasaya nasiromu mombasomba Alatala, langgai mosambaya ante rara nagasa. Ledo masipato mosambaya ane narau rara atau nosinjanai.

2 Timotius 2:2

Niepemumo pepatudukiku bo nadea tona ntanina nangepe bo nosabikina muni. Jadi pepatuduki haitu kana mupatuduki ka tona anu namala raparasaya bo anu nompakule mompatuduki tona ntanina.

Pompakita 7:12

Niulira, “Amin! Ratoiyata Tuputa Alatala! Rapakaogeta Ia! Ratesata kanotoNa, raulita tarima kasi ka Ia. Rabilata Ia bo ratesata kuasaNa bo kabarakaNa sampe ri kasae-saena. Amin!”