2 Korintus 13:7 - Kaili Ledo

⁷ Kami nosambaya nerapi nte Alatala ala komiu nee movia dosa. Patuju kami nosambaya ivesia, ledo mompopakita kami hitu mpuu-mpuu suro i Kristus. Tapi patuju kami ala komiu batena movia anu nabelo. Jadi nau sanu tona ri situ da nombareke kami ledo suro i Kristus, ledo makuya, asaa komiu movia anu nabelo!

2 Korintus 13:7 ပူးပေါင်းရင်းမြစ်များ

Matius 6:13

Nee rapalamba kami rapesori bo kabasakamo kami lako ri kuasa Magau nu Seta. [Sabana Komiumo Magau nakuasa bo nipokumaaka sampe ri kasae-saena. Amin.]

Yohanes 17:15

Ledo Kuperapi Komiu mangala ira lako ri dunia hitu. Tapi Kuperapi ala Komiu mojagai ira lako ri Magau nu Seta.

Roma 1:28

Tona gahaitu ledo nadota mosisani ante Alatala. Jadi Alatala nompalamba ira rakeniaka mpekirira nadaa sampe ira novia anu ledo masipato rapoviara.

Roma 12:17

Ane maria tona mompakadaa komiu, nee rabalasi ante daa! Poviamo anu nireke ntodea nabelo.

Roma 13:13

Kita kana matuvu ante pokainggu masipato ka tona natuvu riara karemena. Nee masiromu mangande mompebasa bo manginu sampe malangu. Nee mosipogau ante tona ledo bereimiu mboto bo nee mangoseaka dota raramiu nadaa. Nee mosinggarau atau masiriati.

Roma 16:10

Pakavote tabeku ka i Apeles. Nadea kasusa nirasaina, tapi ia bate-batena nangoseaka i Kristus. Bo pakavote tabeku ka gi Aristobulus sambanua.

1 Korintus 11:19

Komiu kana matebagi-bagi mami ala rasani isema komiu mpuu-mpuu nangoseaka i Yesus!

2 Korintus 10:10

Nisaniku naria tona nanguli ivei: “Riara sura-sura i Paulus tesana nalonto bo nasodo, tapi ane ia mboto naria nte kita, ingguna damo nanonto, bo tesana ledo ria gunana.”

2 Korintus 10:18

Sabana, tona nipokono nu Alatala ledo topantoiya karona mboto tapi tona nitoiya nu Alatala.

2 Korintus 13:6

Nisarumakaku nisanimiumo kami hii mpuu-mpuu suro i Kristus.

2 Korintus 13:8

Ane komiu mangoseaka anu nakana, ledo rapakule kami mangeva komiu. Kami aga madota mantulungi komiu mangoseaka anu nakana.

2 Korintus 13:9

Nadamba mpuu rara kami ane kami nalente, asaa komiu maroso momparasaya. Jadi kami bate-batena mosambaya ala pokainggumiu majadi mabelo pura.

2 Korintus 6:4

Nau bara nuapa-nuapa najadi, kami batena nokainggu nabelo ala malanto kami mpuu-mpuu batua nu Alatala. Kami batena nosabara naupa kami nombarasai mpengaya pepandasa bo kasusa.

2 Korintus 8:21

Apa kami madota movia anu nanoa ri panggita nu Alatala, bo muni ri panggita nu manusia.

Filipi 4:8

Kaupuna, sampesuvu-sampesuvu, tanondoakamo anu nakana, anu nanoa, bo anu masipato rapakaoge. Pekirikamo anu nagasa, anu nagaya, bo anu nabelo raepe ntona. Tanondoakamo anu mpuu-mpuu nabelo, bo anu masipato ratoiya.

1 Tesalonika 5:23

Kuperapi nte Alatala, topombadekei katuvua nabelo ka kita, ala Ia mboto mompakagasa katuvumiu sampe komiu mpuu-mpuu matuvu mpo todeaNa nagasa. Kuperapi Alatala mombajagai karomiu, rara ntaimiu, bo pekirimiu sampe ledo ntoto maria nuapa-nuapa rasalai tempo Tuputa Yesus Kristus makava mpanjili.

1 Timotius 2:2

Posambayaka muni magau-magau bo pura-pura tona anu nidekeika kuasa momparenta, ala kita mamala matuvu masiayu bo matinonto, bo ala kita maloga metupu nte Alatala bo mokainggu mabelo, anu masipato rabila ntona.

2 Timotius 2:15

Tapi iko kana mompasimbuku mpuu-mpuu mokarajaa mabelo ala madamba rara nu Alatala bo rarekeNa iko masipato mokarajaa ka Ia. Pasimbukumo ala ledo maeya matamu manggita pokarajaamu tapi mupatuduki tesa nakana lako nte Alatala ante kakana-kanana.

2 Timotius 4:18

Bo niparasayaku i Pue bate-batena mombakabasaka yaku lako ri pura-pura anu nadaa bo manggeni yaku ante masalama mesua ri PoparentaNa ri suruga. Ia masipato rabila bo ratoiya sampe ri kasae-saena! Amin.

Yakobus 1:12

Nabelo mpuu tona naroso rarana riara kasusa bo pesori! Ane maroso rarana sampe ri kaupu pesori haitu, Alatala mombadekei katuvu nabelo ka ia sampe ri kasae-saena. Katuvu nabelo haitu nijanji nu Alatala ka tona nompotove Ia.

1 Petrus 2:12

Komiu kana matuvu ante pokainggu nabelo mpuu ri tatanga ntona ledo nosisani nte Alatala. Ane mabelo pokainggumiu, nau rasalaira komiu bo raulira komiu novia anu nadaa, tapi kaupuna kana rapangakura nabelo pokainggumiu, bo ratoiyara Alatala tempo Ia makava.