2 Korintus 12:21 - Kaili Ledo

²¹ Nakini raraku ane tou nte komiu vai yaku, Alatala mompakaeya yaku ri ngayomiu, bo yaku motumangi ri ngayomiu sabana madea komiu anu nadosa bara ipia dopa najea lako ri pokainggura nadaa bo nabuga. Bara maria da nompogau tona ledo bereina mboto, bara movia anu ledo ntoto masipato mpo anu nabiasa nipoviara bara ipia.

2 Korintus 12:21 ပူးပေါင်းရင်းမြစ်များ

Roma 13:13

Kita kana matuvu ante pokainggu masipato ka tona natuvu riara karemena. Nee masiromu mangande mompebasa bo manginu sampe malangu. Nee mosipogau ante tona ledo bereimiu mboto bo nee mangoseaka dota raramiu nadaa. Nee mosinggarau atau masiriati.

Roma 9:2

nabuku mpuu raraku bo ledo naupu kasusa raraku nompekirika sampesuvuku toYahudi apa ledo nadea ira nomparasaya i Yesus.

1 Korintus 5:1

Niepeku lelena naria saito komiu nokainggu nabuga ntoto. Ia nompogau berei ntuamana mboto. Iyapa tona ledo nomparasaya Alatala, ledo nokainggu nadaa ivehaitu!

2 Korintus 10:6

Jadi ane rakita kami komiu pura-pura mpuu-mpuu natundu nte i Kristus, masadiamo kami mombahuku tona ntanina anu ledo natundu.

2 Korintus 12:7

Tapi ledo mabelo ane malanga gaga raraku nantora pura-pura anu nipokumaaka nipopakita i Yesus ka yaku. Haitumo sabana nidekeiNa dua mompandasa yaku. Dua haitu nirapaka suro lako ri Magau nu Seta nompandasa yaku ala yaku ledo majadi masombo.

2 Korintus 8:24

Jadi kuperapi nte komiu popakitamo tovemiu ka ira tatalu ala rakita ntodea topomparasaya pepotovemiu, bo rasanira muni tesa-tesa kami nombatoiya komiu ri ngayora bara ipia, mpuu-mpuu nakana.

Galatia 5:19

Nalanto mpuu pokainggu ntona anu nangoseaka dota rara nadaa. Jonjona ivei: ira nosipogau nte tona ledo bereira mboto. Pokainggura nabuga bo ledo nasipato.

Kolose 3:5

Sabana haitu, kabasakamo pokainggu-pokainggu anu nopuna lako ri dunia nadaa hitu. Nee mosipogau ante tona ledo bereimiu mboto, nee movia pokainggu anu ledo masipato, nee mangoseaka dota raramiu nabuga bo dota-dota ntanina anu nadaa. Bo nee muni maoge rara manggava melabipa pade tona ntanina, sabana anu nipooge rarata haitumo najadi anu nisombata, bo haitu nasimbayu nte metupu nte tupu ntanina.

Ibrani 13:4

Ponjamboko kana rabilamiu pura-pura. Nee mompakagero ponjambokomiu ante mompogau tona ledo bereimiu mboto, sabana Alatala mombahuku tona nompogau tona ledo bereina mboto.

2 Petrus 2:18

Apa ira nombasovadaka ante nalanga rara, tapi tesa-tesara ledo ria gunana. Ante tesara niopara tona dako nenonto novega nte roara nadaa pokaingguna. Tona haitu niopara ante nompadidisi dota rarara nadaa ala raoseakara mpanjili pokainggu nadaa anu dako nikabasakara.

Yudas 1:23

Naria tona ntanina damo kasalandalana. Tulungimo ira ala ira rapakasalama lako ri pehuku, nasimbayu mpo porabutakamiu tona lako ri apu. Bo poasi munimo tona nikuasai dota rarara nadaa. Tulungi ira manjili ri dala nakana, tapi jagaimo, mbelaka komiu matekeni mangoseaka pokainggura nadaa. Potovemo tona nadosa tapi povuu matamo pokainggura.

Yudas 1:7

Tora munimo tupu ngata Sodom bo Gomora nggaulu bo ngata-ngata ri sinjorina. Ira nasimbayu nte malaeka-malaeka pangane, haitumo ira muni ledo nabasa-basa nosipogau nte tona ledo bereira mboto bo nangoseaka pokainggu nabuga ntotomo. Ngatara nipalabusi ante apu rapopatora ka pura-pura tona, pokainggu nadaa rahuku ante apu sampe ri kasae-saena.

Pompakita 21:8

Aga tona naeka mangoseaka Yaku, atau ledo niparasayana Yaku, bo tona nadaa pokaingguna, topepatesi, tona nokainggu nabuga, topedoti, tona nombasomba tupu-tupu ntanina, bo pura-pura topodava, ira pura-pura kana rahuku riara ntasi apu anu navaya ante vatu-vatu colonggata. Haitumo niuli kamatea karongganina.”

Pompakita 22:15

Tapi tona nadaa, topedoti, tona nogau sala ante tona ledo bereina mboto, topepatesi, tona netupu nte tupu ntanina, topodava bo pura-pura tona nompokono dava, ponturora pura-pura aga ri savaliku ngata haitu.

Pompakita 22:20

Bo i Yesus anu nompasimbayu pura-pura tesa hitu nanguli, “Nakana! Domo masae makavamo Yaku!” Amin! Maranata! Kakavamo, Pue Yesus!