2 Korintus 12:15 - Kaili Ledo

¹⁵ Jadi yaku nasadia mombadekei ka komiu pura-pura anu naria nte yaku, nau karoku mboto. Ane ivesia kambaso pepotoveku ka komiu, nakuya pepotovemiu ka yaku aga sakide?

2 Korintus 12:15 ပူးပေါင်းရင်းမြစ်များ

Roma 9:3

Ane rapana mamala, aginapa yaku rapindasi nu Alatala bo rapopogaa lako nte i Kristus, asaa sampesuvuku toYahudi momparasaya.

2 Korintus 1:6

Kami nombarasai kasusa bo kapari ala rapakule kami mompakaroso raramiu, bo ala komiu rapakasalama. Ane rara kami rapakaroso nu Alatala riara kasusa bo kapari, tantu raramiu muni rapakarosoNa sampe komiu mosabara mombatidamaka kasusa bo kapari nasimbayu mpo kasusa nirasai kami.

2 Korintus 11:11

Nuapa sabana yaku ledo nadota nompakantamo komiu? Bara raulimiu ledo nipotoveku komiu. Ledo nakana! Nisani nu Alatalamo nipotoveku komiu!

2 Korintus 12:14

Pariaramo tesaku hitu. Sii-sii nasadiamo yaku tou mompelioda komiu katalu-ngganina, bo yaku batena ledo mekitanggu nte komiu. Sabana, ledo kakalumanamiu nieloku tapi pepotovemiu! Apa ledo ngana anu masipato mompasiromu kakalumana ka totuana tapi totua masipato mompasiromu kakalumana ka ngana.

2 Korintus 12:9

Tapi niuliNa ka yaku, “Nemo. Nipotoveku iko, bo haitu naganamo ka iko. Apa ane nalente iko, kuasaKu malanto mpuumo riara nggatuvumu.” Jadi, haitumo sampe yaku nadamba nangoe anu nompopakita kalenteku, apa ane yaku nalente, kuasa i Kristus nokarajaa riara ntaiku.

2 Korintus 2:3

Bo haitumo patujuku notulisi sura ka komiu bara ipia. Apa ledaku tou ane aga masusa raraku manggita pokainggumiu. Kakanana komiu masipato mompakadamba raraku. Bo ane madamba yaku, tantu komiu muni madamba.

2 Korintus 4:12

Jadi kami bate-batena nantingayo kamate ala manggeni komiu manggava katuvua nabelo sampe ri kasae-saena.

2 Korintus 7:2

Sampesuvu-sampesuvu, kami madota ala komiu mompotove kami bo mantarima kami! Ledo ria sanggania kami novia nadaa ka komiu, ledo ria saitoa nipakarugi kami. Ledo muni naria saitoa nibagiu kami ala mompakauntu karo kami mboto.

2 Korintus 7:3

Patujuku ledo mompakasala komiu, apa kami mpuu-mpuu nompotove komiu evamo niuliku ri bavona. Matuvu atau mamate kami batena mompotove komiu!

Galatia 4:10

Komiu natutu nompakaoge eo-eo mbaso, bula-bula natantu, atau mpae-mpae natantu, apa da nisarumakamiu maria gunana mompakanoa komiu ri panggita nu Alatala.

Filipi 2:17

Pangoseakamiu i Kristus nirapaka pesombamiu ka Alatala anu mompakadamba raraNa. Tempo bara ipia, ane tona nombadekei pesomba ka Alatala, kana nombatoli uve anggur ala mompakagana pesombana. Ane rapana yaku rapatesi sabana pokarajaaku nompatolele Kareba Belo, raaku rarapaka uve anggur nitoli haitu, apa yaku nasadia mamate ane rapodota nTupu. Jadi, nau yaku rapatesi, ledo nakuya! Yaku batena manguli tarima kasi nte Alatala bo yaku muni madamba mpasanggani-nggani nte komiu.

Kolose 1:24

Sampesuvu-sampesuvu, sii-sii nadamba raraku nombarasai susa bo pari nikavaku sabana yaku nokarajaa nantulungi komiu. Apa yaku nombadupai ri karoku susa bo pari nipakatantu i Kristus kana kurasai. Bo susa bo pari nirasaiku nanggeni belo ka todea topomparasaya. Pura-pura kita topomparasaya nirapaka karo i Kristus.

1 Tesalonika 2:8

Nambaso mpuu tove kami nte komiu, sampe kami nadamba nompatolele Kareba Belo ka komiu. Bo kami muni nasadia mantulungi komiu nau kami mamate, sabana kami mpuu-mpuu nompotove komiu!

2 Timotius 2:10

Jadi yaku nombatidamaka mpengaya-ngaya kasusa ala mamala kutulungi tona nipelisi nu Alatala sampe ira muni mamala momparasaya i Yesus Kristus bo rapakasalama bo matuvu mabelo mosanggani-nggani nte Alatala sampe ri kasae-saena.

Ibrani 13:17

Oseakamo parenta-parenta nu pakeni-pakenimiu bo pekoumo nte ira, sabana iramo nombajagai pomparasayamiu. Makava tempona bara maipia ira kana manguli pakalanto ri ngayo nu Alatala berimbana komiu nikeniakara. Jadi pekoumo nte ira ala ira mamala mantui pokarajaa haitu ante damba nu rara. Ane komiu ledo mekou, aga masusa rarara bo haitu ledo manggeni belo ka komiu.